2 Johanes 1:1-13

  • Salam (1-3)

  • Terus erdalan i bas kebenaren (4-6)

  • Hati-hatilah man nterem penipu (7-11)

    • Ula kataken mejuah-juah (10, 11)

  • Rencana guna reh ras salam-salam (12, 13)

 Aku sekalak pertua,* kutulisken surat enda man Diberu* si ipilih ras anak-anakna si seh kel ateku kelengna. Labo aku saja si rate keleng man kena, tapi kerina kalak si meteh kebenaren pe ngkelengi kena.  Sebap kebenaren e tetap ras kita janah lit i bas kita seh rasa lalap.  Sidatken me lias ate si mbelin, perkuah ate, kedamen, kebenaren, ras kekelengen i bas Dibata nari eme Bapakta, bage pe i bas AnakNa nari, Jesus Kristus.  Seh kel riahna ukurku perban kuidah piga-piga anakndu erdalan i bas kebenaren, bali bagi si iperentahken Bapak man banta.  Emaka gundari kupindo man bandu o Diberu, gelah kita sikeleng-kelengen. Kai si kutulis enda labo perentah si mbaru, tapi perentah si nggo sialoken tangtangna nari.  Kekelengen e ertina terus ndalanken perentah-perentahNa. Bali bagi si nggo ibegi kena tangtangna nari, perentahNa eme: Teruslah buktiken kekelengen kena.  Sebap nggo nterem penipu reh ku doni enda si la ngakui Jesus Kristus nggo reh selaku manusia. Kalak e penipu ras musuh Kristus.  Jagalah diri kena, gelah ula bene kai si nggo idahiken kena e, tapi gelah dem pagi upah si ialoken kena.  Ise pe si la tetap i bas ajaren Kristus janah iajarkenna kai si salah, la ngena ate Dibata. Tapi, kalak si tetap i bas ajaren Kristus, ngena ate Bapak bage pe Anak. 10  Adi lit si ndahi kam janah ibabana ajaren si la sue ras ajaren Kristus, ula alokenndu ia i bas rumahndu janah ula ikatakenndu mejuah-juah man bana. 11  Sebap ise si ngatakenca mejuah-juah man kalak si bage, ikut ia i bas perbahanenna si jahat e. 12  Melala kel ateku si kukataken man kena, tapi la ateku arah surat enda kupeseh, tapi kuarap maka banci kudahi kena janah langsung ngerana ras kena, gelah dem kel keriahen ukurta. 13  Anak-anak seninandu pe, si nggo ipilih, kirim salam man bandu.

Cataten kaki

As. “dilaki si nggo metua.”
Banci ka maksudna man runggun.