1 Timotius 6:1-21

  • Budak arus nghamati tuanna (1, 2)

  • Guru palsu janah merangap nandangi sen (3-10)

  • Petunjuk man umat Dibata (11-16)

  • Bayaklah i bas perbahanen si mehuli (17-19)

  • Jagalah kai si nggo ibereken man bandu (20, 21)

6  Kerina si jadi budak arus erpengakap maka tuanna patut ndatken kerina kehamaten, gelah gelar Dibata bage pe ajarenNa la ihina kalak.  Aminna pe tuanna e temanna sada kiniteken, arus tetap ihamatina ia janah reh ulina min ia ngelayanisa, erkiteken si ndatken ulih i bas pelayanenna eme temanna sada kiniteken si ikelengi. Teruslah ajarken kerna si enda janah berekenlah nasehat-nasehat enda.  Adi lit si ngajarken ajaren si deban janah la ia setuju nandangi petunjuk si benar,* si rehna i bas Tuan Jesus Kristus nari, ntah pe ajaren si ncidahken cara nembah Dibata,  kalak si bage sombong janah la iangkana kai pe. Meriah kel akapna sijawapen kerna kata-kata. Si enda kerina erban cian, rubat, pitnah, curiga,  bage pe perubaten si la erngadi-ngadi kerna masalah si kitik. Si e ilakoken kalak si ceda perukurenna, si erpengakap maka nembah Dibata eme cara guna ndatken untung.  Situhuna, lit untung si galang man kalak si nembah Dibata ras si puas iakapna nandangi kai si lit i bas ia.  Sebap labo lit kai pe sibaba ku doni enda janah labo lit kai pe sibaba ndarat arah doni enda.  Emaka puas min siakap adi lit pangan ras pakenta.  Tapi kalak si usahakenna jadi bayak ndabuh me ia ku bas percuban, kena siding, janah gedap i bas sura-sura si motu ras si la erguna, si e maba ku kiniseran ras kematen. 10  Merangap nandangi sen eme sumber erbage-bage kejahaten, janah perban lalap ngayaki sen, lit piga-piga kalak si nadingken kinitekenna janah isusahina bana alu erbage-bage kiniseran. 11  Tapi selaku umat Dibata, kiamlah kena nadingken si e kerina. Ayakilah kai si benar, tutus nembah Dibata, kiniteken, kekelengen, megenggeng, janah lemah lembut. 12  Erjuanglah alu tutus guna kiniteken. Jemaklah kegeluhen si rasa lalap, guna si e me kam ilebuh janah ersaksi alu mehuli i lebe-lebe jelma si nterem bage pe i lebe-lebe nterem saksi. 13  I lebe-lebe Dibata si erban kerina tetap nggeluh, janah i lebe-lebe Kristus Jesus si ersaksi kerna kinitekenna man Pontius Pilatus i lebe-lebe jelma si nterem, kusuruh kam 14  gelah ipatuhindu perentah enda, tetap bersih, janah la erpandangen seh asa reh Tuanta Jesus Kristus ncidahken dirina. 15  I bas waktu si nggo itetapken, icidahken Penguasa si tonggal si ermeriah ukur e me kemulianna. Ia me Raja nandangi kerina si merentah selaku raja janah Tuan nandangi kerina si merentah selaku tuan, 16  ia ngenca si la banci mate, si tading i bas terang eme ingan si la banci ideheri, janah ise pe la pernah ntah pe la banci ngidah ia. Man bana me kehamaten ras kuasa seh rasa lalap. Amin. 17  Berekenlah petunjuk* man kalak bayak si lit i bas jaman* gundari gelah ula ia sombong, janah gelah erpengarapen ia labo man kebayakenna si banci keri, tapi erpengarapen man Dibata si alu melumbar nikapken kerinana guna kesenangenta. 18  Kataken man kalak e gelah ngelakoken kai si mehuli, jadi bayak i bas perbahanen si mehuli, nggit mere, janah kai si lit i bas ia nggit ia kongsi ras kalak si deban, 19  ipepulungna erta rohani si njamin masa depanna, alu bage banci ijemakna kegeluhen situhu-tuhu. 20  O Timotius, jagalah kai si nggo ibereken man bandu. Ula begiken ranan si la erguna si la sue ras kai si badia, ntah pe pendapat si iakap kalak “pemeteh” tapi situhuna erlawanen ras kai si benar. 21  Erkiteken ngikutken pemeteh si bage, lit kalak si nadingken kinitekenna. Mbera lias ate Dibata si mbelin lit ras kam.

Cataten kaki

Ntah “erguna.”
Ntah “perentah.”
Ntah “doni.” Nen Kamus.