1 Timotius 5:1-25

  • Perbahanen man kalak si metua ras si nguda (1, 2)

  • Penampat man diberu-diberu si mbalu (3-16)

    • Nikapken keperlun keluarga sendiri (8)

  • Hamati pertua-pertua si kerja keras (17-25)

    • “Inem sitik anggur gelah sikap beltekndu” (23)

5  Ula persingeti alu kasar dilaki si tuan asangken kam. Tapi persingetilah ia alu mehuli tempa-tempa ia bagi bapakndu janah dilaki si terngudan tempa-tempa ia bagi seninandu,  diberu si tertuan tempa-tempa ia bagi mamakndu, janah diberu si terngudan tempa-tempa ia bagi turangndu, alu pusuh si bersih.  Perdiatekenlah* diberu-diberu si mbalu si tuhu-tuhu merluken penampat.  Tapi adi lit denga anakna ntah pe kempuna, kalak e arus leben mbuktiken dirina maka ia kalak si nembah Dibata alu ngurus keluargana. Janah arus iberena kai si patut man orang tuana ras nini bulangna sebap enda me si ngena ate Dibata.  Diberu si mbalu si tuhu-tuhu merluken penampat janah kadena pe lanai lit, erpengarapen ia man Dibata. Terus ia ertoto janah mindo man Dibata suari ras berngi.  Tapi diberu si mbalu si geluhna pesenangken napsuna saja, situhuna ia nggo mate aminna pe ia nggeluh denga.  Emaka teruslah bereken petunjuk-petunjuk* enda gelah kalak e la erpandangen.  Ise pe si la nikapken keperlun kade-kadena terutama anggota keluargana, lanai kap ia erkiniteken janah jahaten asangken kalak si la erkiniteken.  Diberu si mbalu si banci idaptarken eme si umurna lebih 60 tahun, janah mbarenda sada ngenca dilakina, 10  janah itandai ia alu perbahanenna si mehuli. Contohna, ipebelinna anakna alu mehuli, nggit mere, icucina nahe* kalak si badia, isampatina kalak si susah, janah iberekenna dirina guna ngelakoken kai pe si mehuli. 11  Tapi, ula daptarken diberu si mbalu si nguda denga. Erkiteken sanga reh sura-sura dagingna si ngambati ia i bas ngelayani Kristus, erjabu me ia. 12  Alu bage ihakimi me ia erkiteken ilanggarna janji si nggo ibanna. 13  Tambah si e, jadi pengangguren ia kari janah lawes ku rumah-rumah kalak. Selain nganggur, meriah akapna cekurak, icampurina urusen kalak, janah icakapkenna kai si la perlu icakapken. 14  Emaka ulin kuakap diberu si mbalu si nguda denga gelah erjabu saja, ngelahirken anak, ngurus rumah tangga. Alu bage la lit kesempaten musuh guna mandangisa. 15  Situhuna, lit piga-piga diberu si mbalu si nggo nadingken kebenaren janah ikutina Setan. 16  Adi sekalak diberu si nggo tek man Jesus lit anggota keluargana si mbalu, arus isampatina ia. Alu bage, ia la jadi tanggungen man runggun janah banci isampati runggun diberu si mbalu si tuhu-tuhu merluken penampat. 17  Ergaindu min pertua-pertua si minpin alu mehuli, terutama si kerja keras i bas mpeseh ras ngajarken kata Dibata. 18  Sebap lit ayat si ngataken, “Ula tutupi babah lembu si sangana ngerik gandum,” bage pe, “Kalak si erdahin arus dat upah.” 19  Ula begiken kalak si nuduh pertua, pala lit dua ntah telu kalak si ersaksi. 20  Kalak si ersalah arus ipersingeti i lebe-lebe jelma si nterem, gelah e jadi persinget ka man kalak si deban.* 21  I lebe-lebe Dibata ras Kristus Jesus bage pe malekat si ipilih, kubereken man bandu perentah guna ngikuti petunjuk-petunjuk enda janah periksalah kerinana alu megermet sope ibanndu keputusen. 22  Ula metersa itamakenndu tanndu ku datas ise pe,* janah ula sempat kam ikut muat bagin i bas dosa kalak si deban. Jagalah perbahanenndu tetap bersih. 23  Ula lau saja si inemndu, tapi inem sitik anggur gelah sikap beltekndu, sebap rusur kam sakit. 24  Lit piga-piga kalak si dosana iteh jelma si nterem emaka minter ia iukum, tapi lit kalak si dosana terbukti i bas waktu si reh. 25  Bage ka pe, lit perbahanen si mehuli si iteh jelma si nterem, janah lit ka si la iteh, tapi si e labo terus terbuniken.

Cataten kaki

As. “Hamatilah.”
Ntah “perentah-perentah.”
Bas jaman Pustaka, nuci nahe mbuktiken lias ateta i bas ngalo-ngalo tamu.
As. “gelah kalak si deban jadi mbiar.”
Maksudna, ula merudu i bas milih sekalak jelma.