1 Timotius 4:1-16

  • Persinget kerna ajaren malekat-malekat jahat (1-5)

  • Cara jadi pelayan Kristus si mehuli (6-10)

    • Latihen gerak badan ras nembah man Dibata (8)

  • Perdiateken pengajarenndu (11-16)

4  Tapi, jelas ikataken kesah si badia maka lit pagi waktuna bene kiniteken kalak, ibegikenna kata-kata si tempa rehna i bas Dibata nari si erban sesat, janah ibegikenna ajaren malekat-malekat jahat  si ipeseh kalak si munapik si nggit erbual, si pusuh peratenna nggo lanai erpenggejapen bali bagi besi si itutung.  Kalak si bage ilarangna kalak erjabu ras ilarangna man pangan tertentu. Padahal pangan iciptaken Dibata gelah ipan kalak si erkiniteken ras si meteh kebenaren alu tepat, janahna ngataken bujur man Dibata.  Kerina si iciptaken Dibata e mehuli, la lit si man pantangenken adi ipan alu ngataken bujur,  sebap pangan e ipebadiaken alu kata Dibata ras toto.  Adi iberekenndu pedah enda man turang senina, kam jadi pelayan Kristus Jesus si mehuli, si nggo iajar kerna kata-kata si nampati kita erkiniteken man Dibata bage pe kerna ajaren si mehuli si nggo tuhu-tuhu ikutkenndu sedekah enda.  Ula begiken cerita-cerita si la tuhu si nghina Dibata, bagi si biasa iceritaken jelma si nterem.* Tapi ajarlah dirindu alu tujun guna nembah Dibata.  Latihen gerak badan sitik ngenca gunana, tapi nembah man Dibata erguna i bas kai pe. Erkiteken nembah man Dibata mereken jaminen guna kegeluhen si gundari bage pe kegeluhen i bas waktu si nandangi reh.  Kata-kata enda banci iteki janah ialoken alu bulat ukur. 10  Eme sebapna kita kerja keras janah erjuang, erkiteken erpengarapen kita man Dibata si nggeluh, Si Nelamatken erbage-bage jelma, terlebih kalak si setia. 11  Teruslah perentahken janah ajarken si enda. 12  Ula pediat ise pe sepele man bandu erkiteken kam nguda denga. Tapi jadi usihenlah kam man kalak si setia i bas pengerana, perbahanen, kekelengen, kiniteken, bage pe lagu langkah si bersih. 13  Seh asa reh pagi aku, teruslah kam mbaca i lebe-lebe jelma si nterem alu tutus, mereken nasehat,* ras ngajar. 14  Ula sia-siaken pemere si ibereken man bandu erkelangken nubuat, sanga itamaken badan pertua tanna ku datas takalndu. 15  Ukurilah si enda kerina alu mbages janah tuhu-tuhulah perdiateken, gelah kerina kalak ngidah kemajunndu alu jelas. 16  Teruslah perdiateken dirindu ras pengajarenndu. Tetaplah lakokenndu si e, alu bage iselamatkenndu dirindu bage pe kalak si megiken kam.

Cataten kaki

As. “iceritaken diberu-diberu si metua.”
Ntah “mpegegehi.”