1 Tesalonika 3:1-13

  • Paulus nimai i Aten (1-5)

  • Laporen Timotius si mere pengapul (6-10)

  • Toto man runggun i Tesalonika (11-13)

3  Erkiteken lanai tertahanken kami tedeh kami, padin iakap kami tading i Aten.  Isuruh kami turang seninata Timotius, ia pelayan* Dibata, si mberitaken berita si meriah kerna Kristus guna mpegegehi kiniteken kena ras ngapuli kena,  gelah ula sada pe kena jadi lemah* erkiteken kiniseran-kiniseran enda. Sebap iteh kena maka la banci sielakken kiniseran si bage.*  Sanga kami ras kena denga, nggo rusur ikataken kami maka sinanami pagi kiniseran, janah bagi si nggo iteh kena eme si terjadi.  Emaka sanga lanai tertahanku tedehku e, kusuruh Timotius ndahi kena gelah kuteh uga kesetian kena. Erkiteken mbiar aku kena nggo tergoda iban Iblis,* janah kerja keras kami jadi sia-sia.  Tapi gundari, Timotius nggo mulih janah ibabana berita si meriah kerna kesetian ras kekelengen kena. Ikatakenna ka maka lalap iinget kena kai si mehuli kerna kami janah tedeh ka ate kena kami, bali bagi kami pe rate tedeh man kena.  Eme sebapna o turang senina, i bas kerina kesusahen ras kiniseran kami, terapuli kami erkiteken kena bage pe erkiteken kesetian si ibuktiken kena.  Adi tetap kena paguh i bas ngelayani Tuan, kami pe terpegegehi mulihi.  Bujur ikataken kami man Dibata, erkiteken nggo iban kena meriah kel ukur kami i lebe-lebeNa. 10  Tutus kel ate kami ertoto man Dibata suari ras berngi gelah banci langsung jumpa ras kena janah kai pe si kurang i bas kiniteken kena banci itambahken. 11  Mbera Dibata eme Bapakta bage pe Tuanta Jesus Kristus erban dalan man kami gelah jumpa ras kena. 12  Selain si e, mbera kekelengen kena reh bagesna iban Tuan nandangi sada ras si debanna bage pe man kerina kalak, bali bagi kekelengen kami man kena. 13  Alu bage sanga reh Tuanta Jesus ras kerina umatna si badia, ipegegehina pusuh kena, ibanna kena la erpandangen, janah badia i lebe-lebe Dibata eme Bapakta.

Cataten kaki

Ntah banci saja “teman erdahin.”
As. “terpengaruh.”
Ntah “maka kita nggo ipilih guna si enda.”
Ntah “Penggoda.”