1 Petrus 5:1-14

  • Permakanilah rarasen biri-biri Dibata (1-4)

  • Meteruk ukur janah tetap erjaga-jaga (5-11)

    • Benterkenlah kerina kekuatiren kena man Dibata (7)

    • Iblis bagi singa si erngaung (8)

  • Kata pendungi (12-14)

5  Aku pe pertua ka nge, bali bagi kena. Kusaksiken kerna kiniseran Kristus janah dat bagin aku i bas kemulianna si icidahken pagi. Emaka kubereken nasehat-nasehat enda man pertua-pertua si lit i tengah-tengah kena:  Permakanilah rarasen biri-biri Dibata si nggo iberekenNa man kena. Kena arus ngelayani selaku pengawas,* labo alu terpaksa tapi alu ukur meriah i lebe-lebe Dibata, janah labo alu ndarami keuntungen si la jujur tapi alu semangat,  ula iperentah kena kalak si nggo iserahken* man kena tapi jadilah usihen man rarasen.  Sanga icidahken permakan e pagi dirina, ialoken kena me mahkota si mulia si la banci ceda.  Bage ka pe kena dilaki-dilaki si terngudan, patuhlah kena man kalak si lebih metua.* Meteruk ukurlah kena i bas erurusen ras kalak si deban, sebap kalak si meganjang rukur itulak Dibata, tapi man kalak si meteruk ukur iberekenNa lias ateNa si mbelin.  Emaka peteruklah diri kena i teruh tan Dibata si megegeh, gelah ipeganjangNa kena i bas waktu si tepat.  Benterkenlah kerina kekuatiren* kena man Dibata, sebap iperdiatekenNa kap kena.  Jagalah perukuren kena janah tetaplah erjaga-jaga! Sebap musuh kena, Iblis, erdalan ku jah ku je bagi singa si erngaung ndarami si man jerngemenna.*  Tapi lawanlah ia alu kiniteken si paguh. Bagi si nggo iteh kena, kerina teman kena pe si sada kiniteken i belang-belang doni, ngenanami kiniseran si seri. 10  Tapi kenca inanami kena kiniseran i bas waktu si kentisik, Dibata si dem alu lias ate si mbelin, si ngelebuh kena ku kemulian si rasa lalap i bas persadan ras Kristus, Ia me si ndungi pelatihen kena. IbanNa me kena paguh, ibanNa me kena megegeh, janah ibanNa me kena nteguh. 11  Dibata kap si erkuasa seh rasa lalap. Amin. 12  Surat si gendek enda kuban man kena alu penampat Silvanus,* eme sekalak turang seninata si kuanggap ia kalak si setia. Kupegegehi ateku kena ras kubereken kesaksin, maka enda me lias ate Dibata situhu-tuhu. Tetaplah kam i bas lias ate e. 13  Diberu* si lit i Babilon eme kalak si ipilih bali bagi kena, ras anakku Markus, kirim salam kalak e man kena. 14  Sisalam-salamenlah kena alu dem kekelengen.* Mbera kerina kena si ersada ras Kristus banci nggejapken kedamen.

Cataten kaki

Ntah “si ngepkep.”
Ntah “iwarisken Dibata.”
Ntah “man pertua-pertua.”
Ntah “kearun ate.”
Ntah “terkamenna; panganenna.”
Igelari ka Silas.
“Diberu,” banci saja maksudna sada runggun.
As. “alu ciumen si jadi tanda kekelengen.”