1 Petrus 4:1-19

  • Nggeluh guna ngelakoken peraten Dibata, bali bagi Kristus (1-6)

  • Nggo ndeher kedungen kerinana (7-11)

  • Kiniseran kalak Kristen (12-19)

4  Erkiteken nggo inanami Kristus kiniseran paksa ia jadi manusia, kena pe arus iperlengkapi kena diri kena alu perukuren si seri bagi perukuren Kristus. Sebap kalak si ngenanami kiniseran selaku manusia lanai erban dosa.  Alu bage, lanai ia nggeluh menurut sura-sura manusia tapi igunakenna geluhna guna ngelakoken peraten Dibata.  Sebap nggo cukup ndekah ilakoken kena sura-sura kalak si lit i bas doni enda, eme ngelakoken perbahanen si la meteh mela,* ersura-sura ngelakoken kai si salah, mabuk, pesta pora, pesta minem-minem, janah penembahen si salah man berhala.  Mamang ate kalak e perban lanai ikutken kena perbahanenna si najis si bali bagi kubang. Eme sebapna ihina kalak e kena.  Tapi arus ipertanggungjawapken kalak e dirina man Kristus, si nghakimi kalak si nggeluh ras si nggo mate.  Situhuna, erkiteken si e me maka berita si meriah pe iberitaken ka man kalak mate, gelah aminna pe kalak e ihakimi menurut kai si teridah i bas manusia, tapi kalak enda banci nggeluh alu penegu-negu kesah si badia.  Tapi nggo ndeher kedungen kerinana. Emaka sikaplah ban perukuren kena janah tetaplah erjaga-jaga guna ertoto.  Si pentingna, sikeleng-kelengenlah kena, sebap kekelengen nutupi melala dosa.  Alo-alolah kalak si deban alu ermeriah ukur, labo alu jungut-jungut. 10  Sue ras pemere si ialoken kena sekalak-sekalak selaku pengurus si mehuli arah lias ate Dibata si mbelin, gunakenlah e i bas ngelayani kalak si deban, si icidahken alu erbage cara. 11  Adi lit si ngerana, ngeranalah ia tempa-tempa rananna e i bas Dibata nari. Adi lit si ngelayani, ernalemlah ia man gegeh si ibereken Dibata. Alu bage, erkelangken Jesus Kristus, Dibata imuliaken i bas kai pe. Kemulian ras kuasa lit i bas Ia rasa lalap seh rasa lalap. Amin. 12  O turang senina si kukelengi, ula sengget nandangi percuban si mberat* si inanami kena, tempa-tempa percuban si inanami kena e kejadin si mbaru. 13  Tapi, ermeriah ukurlah kena perban ikut ngenanami kiniseran bali bagi Kristus, gelah kena dem alu keriahen ukur paksa icidahken Kristus kemulianna. 14  Adi kena ihina erkiteken gelar Kristus, kena ermeriah ukur perban kesah si mulia, eme kesah Dibata lit i bas kena. 15  Tapi, ula min lit i bas kena si ngenanami kiniseran erkiteken jadi sekalak pemunuh, pinangko, kalak jahat, ntah pe perban icampuri kena urusen kalak si deban. 16  Adi inanami kena kiniseran erkiteken kena kalak Kristen, ula kena mela. Tapi, teruslah muliaken Dibata janah teruslah nggeluh selaku kalak Kristen. 17  Enggo seh waktu si itetapken guna nghakimi. Penghakimen e imulai arah rumah Dibata. Adi kita lebe si ihakimi, kai nge si terjadi nandangi kalak si la patuh man berita si meriah si rehna i bas Dibata nari? 18  “Adi kalak si benar pe mesera guna iselamatken, kai nge si terjadi man kalak si la nghamati Dibata janah si ngelakoken dosa?” 19  Emaka adi inanami kena kiniseran erkiteken ngelakoken peraten Dibata, serahkenlah diri kena man Ia si setia, eme Si Njadiken kita, janah teruslah lakoken si mehuli.

Cataten kaki

As. aselgeia. Nen Kamus.
Ntah “percuban si bagi api.”