1 Petrus 2:1-25

  • Pebelinlah sura-sura nandangi kata Dibata (1-3)

  • Batu si nggeluh ibangun jadi rumah rohani (4-10)

  • Nggeluh selaku kalak asing i doni (11, 12)

  • Patuh si benar (13-25)

    • Kristus jadi usihen man banta (21)

2  Emaka tadingkenlah kerina si jahat, ula nai nipu, munapik, cian ate, ntah pe nghina kalak.  Bali bagi bayi si mbaru lahir, pebelinlah sura-sura kena guna minem susu si la icampur, eme kata Dibata, gelah reh belinna kena janah iselamatken,  perban nggo igejapken kena maka mehuli kel Tuan e.  Tuanta eme batu si nggeluh, si itulak manusia. Tapi ipilih Dibata ia janah meherga akapNa ia. Sanga idahi kena ia,  kena si jadi batu-batu si nggeluh, ibangun jadi rumah rohani gelah kena jadi imam-imam si badia guna mpersembahken korban-korban rohani si ialoken Dibata erkelangken Jesus Kristus.  Lit ayat si ngataken, “Nenlah! Enggo Kupilih sada batu si meherga, si Kutamaken i Sion jadi batu si utama. Ise pe si erkiniteken man bana, labo pernah ikecewaken.”*  Meherga iakap kena ia perban kena tek man bana. Tapi man kalak si la tek, “batu si itulak tukang bangunen, batu enda nggo jadi batu si utama,”  janah “batu si erbanca kalak tertuktuk ras batu si erbanca kalak jongkang.” Tertuktuk kalak e perban la ipatuhina kata e. E me kedungen si nimai kalak e.  Tapi kena me “bangsa pilihen, imam-imam si jadi raja, bangsa si badia, umat Dibata si istimewa, gelah iberitaken kena kemulian”* Dibata, si nggo maba kena ndarat i bas gelap nari ku bas terangNa si luar biasa. 10  Mbarenda kena labo umat Dibata, tapi gundari kena nggo jadi umatNa. Mbarenda la idat kena perkuah ateNa, tapi gundari nggo idat kena. 11  Turang senina si kukelengi, mindo kel aku gelah kena selaku kalak asing ras penduduk sementara, terus min itulak kena sura-sura daging si erdosa si erperang ngelawan kena. 12  Mehuli min lagu langkah kena i tengah bangsa-bangsa, gelah adi ituduh kalak e kena ngelakoken kai si la mehuli, kalak e banci jadi saksi mata perbahanen kena si mehuli, janah asilna imuliaken kalak e Dibata paksa kerehenNa guna nghakimi. 13  Guna Tuanta, patuhlah man kerina pemerentah manusia ras man raja si ganjangen kedudukenna asangken kena, 14  bage pe man gubernur-gubernur si isuruh raja guna ngukum kalak si jahat janah muji kalak si mehuli. 15  Sura-sura Dibata eme gelah mehuli perbahanen kena, alu bage banci ipesinik kena kalak si nggo nuduh kena perban la lit pemetehna. 16  Nggeluhlah bagi kalak bebas, tapi ula ban kebebasen kena guna nutupi perbahanen si salah, tapi nggeluhlah bagi budak Dibata. 17  Hamatilah erbage-bage jelma, kelengilah teman si sada kiniteken, mbiarlah man Dibata, janah mehamatlah man raja. 18  Budak-budak arus patuh janah mehamat man tuanna, labo saja man tuan si mehuli ras erpengangka, tapi pe man tuan si mesera muat ukurna. 19  Ngena ate Dibata man kalak si megenggeng ngadapi kiniseran ras si iperlakoken alu la adil erkiteken bersih atena pusuh peratenna i lebe-lebe Dibata. 20  Kai gunana igengken kena ipekpeki sanga ilakoken kena dosa? Adi megenggeng kena ngadapi kiniseran erkiteken ngelakoken si mehuli, ngena ate Dibata nandangi kena. 21  Situhuna, kena ipilih Dibata guna ndalani kegeluhen si bage. Perban Kristus pe ngenanami kiniseran guna kena, janah ia jadi usihen gelah ikutken kena dalan-dalanna alu megermet. 22  La ilakokenna dosa janah la pernah ia erbual. 23  Sanga ia ihina, la ihinana mulihken. Sanga inanamina kiniseran, la iancamna kalak si erbanca ia ngenanami kiniseran. Tapi iserahkenna kerina man Hakim si adil. 24  Alu dagingna sendiri itanggungna dosa-dosata sanga ia ipakuken i bas tiang,* gelah kita banci ibebasken arah dosa nari janah nggeluh guna ngelakoken kai si benar. Selain si e “erkiteken lukana, kena nggo ipepalem.” 25  Mbarenda kena bali bagi biri-biri si papak. Tapi gundari kena nggo mulihken ku permakan ras si njagai kegeluhen kena.

Cataten kaki

As. “ipemelaken.”
Maksudna, sipat-sipat ras perbahanenNa si patut ipuji.
Ntah “kayu.”