1 Korinti 7:1-40

  • Pedah man kalak si lenga ras si nggo erjabu (1-16)

  • Tetap bagi keadanna sanga ilebuh (17-24)

  • Kalak si lenga erjabu ras diberu si mbalu (25-40)

    • Keuntungen kalak si la erjabu (32-35)

    • ‘Erjabu asalken ras pengikut Tuan’ (39)

7  Gundari, enda jawapen man penungkunen si itulis kena: Ulin sekalak dilaki la njemak-jemak* sekalak diberu,  tapi erkiteken i japa pe nterem kalak nggo ngelakoken perbahanen seks si salah,* tiap dilaki lit min ndeharana sekalak-sekalak, janah tiap diberu lit min perbulangenna sekalak-sekalak.  Sekalak perbulangen arus min iberekenna hak* ndeharana, janah ndehara pe arus bage man perbulangenna.  Sekalak ndehara la erkuasa nandangi dagingna, si erkuasa nandangi dagingna eme perbulangenna. Bage ka pe sekalak perbulangen la erkuasa nandangi dagingna, si erkuasa nandangi dagingna eme ndeharana.  Ula itahan kena hak teman geluh kena, pala ersada arih kena ngelakokenca i bas waktu si kentisik si nggo itetapken. Alu bage banci ipake kena waktu e guna ertoto, jenari ersada mulihken gelah la kena igoda Setan erkiteken kurangna penguasan diri.  Si kukataken enda banci ilakoken kena, tapi enda labo perentah.  Kuarapken kerina kalak bagi aku. Aminna pe bage, tiap kalak lit pemere si ialokenna sekalak-sekalak i bas Dibata nari. Lit pemere bagi si enda, lit ka pemere bagi si ah.  Kukataken man kena si lenga erjabu bage pe man diberu si nggo mbalu, ulin nge kena tetap bagi aku.  Tapi adi la banci ikuasai kena diri kena, ulin kena erjabu asangken gara rusur napsu kena. 10  Man si nggo erjabu, kubereken petunjuk enda, labo i bas aku nari tapi i bas Tuan nari, gelah sekalak ndehara ula ranggung ras perbulangenna. 11  Aminna pe ranggung, la banci ia erjabu. Pala, ersada ia mulihken ras perbulangenna. Sekalak perbulangen pe la banci nadingken ndeharana. 12  Man si deban kukataken bagenda, tapi enda i bas aku nari labo i bas Tuan: Adi lit sekalak perbulangen si ndeharana la sada kiniteken ras ia, janah ndeharana e nggit tetap tading ras ia, la banci itadingkenna ndeharana e. 13  Adi lit sekalak ndehara si perbulangenna la sada kiniteken ras ia, janah perbulangenna e nggit tetap tading ras ia, la banci itadingkenna perbulangenna e. 14  Perbulangen si la sada kiniteken nggo badia erkiteken ndeharana e, janah ndehara si la sada kiniteken nggo badia erkiteken perbulangenna e. Adi lang, anak-anak kena jadi najis. Tapi gundari kalak e nggo badia. 15  Adi ndehara ntah pe perbulangen si la sada kiniteken, ipilihna nadingken* teman geluhna e, pediatlah ia lawes. I bas keadan si bage, turang ntah pe senina e la arus tetap ersada ras teman geluhna e. Tapi nggo ibereken Dibata man kena kedamen. 16  O kena ndehara, ja nari iteh kena maka la banci iselamatken kena perbulangen kena? O kena perbulangen, ja nari iteh kena maka la banci iselamatken kena ndehara kena? 17  Aminna pe bage, tiap kalak arus nggeluh sue ras kai si ibereken Jahwe man bana, eme sue ras keadanna si mbarenda sanga ia ilebuh Dibata. Emaka, kubereken petunjuk enda man kerina runggun. 18  Adi sekalak nggo isunat sanga ia ilebuh, ulin ia tetap bage, janah adi lenga ia isunat sanga ia ilebuh, la padah ia isunat. 19  Isunat ntah pe la isunat, e labo penting, si penting eme ndalanken perentah Dibata. 20  Uga pa pe keadan sekalak jelma sanga ia ilebuh, ulin ia tetap i bas keadanna e. 21  Budak kin kena sanga kena ilebuh? Ula kuatir kerna si e. Tapi adi lit kesempaten kena jadi bebas, gunakenlah e. 22  Sekalak budak si ilebuh gelah jadi budak Tuan eme kalak si ibebasken janah jadi jang Tuan. Bage ka pe, kalak si bebas sanga ia ilebuh eme budak Kristus. 23  Enggo merga kel kena itukur, emaka ula nai kena jadi budak manusia. 24  O turang senina, ugapa pe keadan sekalak jelma sanga ia ilebuh, ulin ia tetap i bas keadanna e i lebe-lebe Dibata. 25  Gundari man si lenga pernah erjabu, labo lit kudat perentah i bas Tuan nari, tapi selaku kalak si setia erkiteken kualoken perkuah ate Tuan, kubereken pendapat enda: 26  Perban kita nggeluh i bas jaman si susah, ulin sekalak dilaki tetap i bas keadanna si gundari. 27  Adi nggo lit ndehara kena, ula nari idarami kena dalan nadingken ia. Adi la lit ndehara kena, ula nari idarami kena ndehara. 28  Bicara nggo pe kena erjabu, labo kena erdosa. Janah adi si lenga erjabu dungna erjabu, labo ia erdosa. Tapi kalak si erjabu inanamina me melala kesusahen. Ateku min gelah ula inanami kena kesusahen si bage. 29  Maksudku bagenda o turang senina: Waktuna kentisik nari ngenca. Mulai gundari nari, ulin kalak si lit ndeharana, tempa-tempa la lit ndeharana. 30  Kalak si tangis tempa-tempa la tangis, kalak si ermeriah ukur tempa-tempa la ermeriah ukur, kalak si nukur tempa-tempa si itukurna e labo jangna. 31  Janah kalak si make doni tempa-tempa la kerinana ipakena doni enda, erkiteken keadan si lit i bas doni enda sangana berubah. 32  Ateku min gelah bebas kena arah kekuatiren nari. Dilaki si la erjabu, si ikuatirkenna kerna kai si lit hubungenna ras pelayanen man Tuan, eme uga gelah ngena ate Tuan. 33  Tapi dilaki si nggo erjabu si ikuatirkenna kerna kai si lit i bas doni enda, eme uga gelah ngena ate ndeharana, 34  emaka ukurna terbagi. Diberu si la erjabu bage pe singuda-nguda, si ikuatirkenna kerna kai si lit hubungenna ras pelayanen man Tuan, gelah dagingna ras perukurenna banci badia. Tapi diberu si erjabu si ikuatirkenna kerna kai si lit i bas doni enda, uga gelah ngena ate perbulangenna. 35  Si enda kukataken guna kiniulin kena, labo guna mbatasi kena. Tapi, kuiahken ateku kena gelah ngelakoken kai si mehuli janah terus ngelayani Tuan alu la lit ganggun. 36  Tapi, ise pe si lenga erjabu si la ngasup akapna ngkuasai napsuna, janah adi nggo cukup umurna, padin ia erjabu. Labo ia erdosa adi bage. 37  Tapi, ise pe si akapna la perlu erjabu janah banci ikuasaina napsuna, emaka ibanna keputusen gelah la erjabu janah nggo itetapkenna keputusenna e i bas pusuhna, si mehuli kap si ilakokenna e. 38  Emaka, lit manpaat si idatken kalak si erjabu, tapi buen manpaat si idatken kalak si la erjabu. 39  Ndehara ersada ras perbulangenna sedekah perbulangenna e nggeluh denga. Tapi adi perbulangenna e medem i bas kematen, banci ia erjabu ras ise pe si atena ngena asalken erjabu ia ras pengikut Tuan. 40  Tapi menurutku, senangen nge iakapna adi lanai ia erjabu, janah menurutku kesah Dibata lit i bas aku.

Cataten kaki

Ntah banci saja “la erjabu janah la ngelakoken hubungen seks ras sekalak diberu.”
Bahasa Junani, porneia. Nen Kamus.
Maksudna, keperlun seks.
Ntah “ranggung ras.”