1 Korinti 5:1-13

  • Masalah kerna perbahanen seks si salah (1-5)

  • Sitik ragi erban kerina tepung si iaduk jadi kembang (6-8)

  • Kalak jahat arus ipedauh (9-13)

5  Situhuna, kubegi berita maka lit perbahanen seks si salah* i tengah-tengah kena, eme lit dilaki si ngelakoken perbahanen seks si salah* ras diberu bapakna. Perbahanen si bage la pernah ilakoken i tengah-tengah bangsa si deban.  Megah nge iakap kena kerna si e? La kin arusna ceda nge ate kena janah ipedarat kena kalak si bage i tengah-tengah kena nari?  Aminna pe dagingku la i je, tapi ukurku i je, janah nggo kuhakimi kalak si bage perbahanenna tempa-tempa aku i je ras kena.  Sanga pulung kena, perukurenku ras kuasa Tuanta Jesus lit ras kena. Emaka i bas gelar Tuanta Jesus,  kalak si bage arus iserahken man Setan, gelah pengaruhna si la mehuli e ikernepken janah kerohanin runggun tetap terjaga i bas wari Tuan.  La mehuli kena ermegah ate. La kin iteh kena maka sitik ragi banci erban tepung si nggo iaduk jadi kembang?  Ambekkenlah ragi si ndekah gelah kena jadi tepung si mbaru si nggo iaduk, erkiteken nggo bebas kena arah ragi nari mulai kin Kristus, anak biri-biri Paskahta ikorbanken.  Emaka marilah sirayaken perayan e, labo alu ragi si ndekah ntah pe alu ragi dosa bage pe alu ragi kejahaten, tapi sirayaken alu roti si la lit ragina si ngertiken kiniulin ras kebenaren.  Enggo kutulis surat enda gelah lanai kena erteman ras kalak si ngelakoken perbahanen seks si salah.* 10  Maksudku labo gelah kena lanai erteman ras kerina kalak si ngelakoken perbahanen seks si salah* i doni enda, ntah pe ras kalak si merangap, tukang kompas, kalak si nembah berhala. Sebap adi bage ilakoken kena, arus kena ndarat i bas doni enda nari. 11  Gundari, kutulis surat enda gelah lanai kena erteman ras turang senina si ngelakoken perbahanen seks si salah,* si merangap, si nembah berhala, si nggit nghina, tukang mabuk, ntah pe tukang kompas, janah man pe ula ras kalak e. 12  Me labo urusenku nghakimi kalak si lit i darat runggun? Arusna ihakimi kena kalak si lit i bas runggun, 13  janah kalak si lit i darat runggun, Dibata kap si nghakimisa. Nina Kitap si Badia, “Pedaratlah kalak si jahat e i tengah-tengah kena nari.”

Cataten kaki

Bahasa Junani, porneia. Nen Kamus.
Bahasa Junani, porneia. Nen Kamus.
Bahasa Junani, porneia. Nen Kamus.
Bahasa Junani, porneia. Nen Kamus.
Bahasa Junani, porneia. Nen Kamus.