1 Korinti 16:1-24

  • Sumbangen si ipepulung man kalak Kristen i Jerusalem (1-4)

  • Rencana perdalanen Paulus (5-9)

  • Rencana kerehen Timotius ras Apolos (10-12)

  • Pedah ras salam (13-24)

16  Gundari, kerna sumbangen si ipepulung man kalak si badia, ikutkenlah petunjuk si nggo kubereken man runggun-runggun si lit i Galati.  I bas wari pertama tiap minggu, perlu isusun kena sen kena sekalak-sekalak sue ras kengasupen kena, gelah sen e lanai perlu ipepulung paksa aku reh.  Kenca reh aku, kusuruh piga-piga kalak si nggo isetujui kena i bas surat-surat kena guna maba sumbangen si ibereken kena alu ermeriah ukur ku Jerusalem.  Tapi, adi ulin kin aku ikut lawes ku jah, lawes me aku radu ras kalak e.  Kudahi kari kena kenca aku lawes ku Makedoni, sebap kulewati nge Makedoni.  Banci saja kari aku tading ras kena ngayak dung musim mbergeh. Kenca si e banci kari itemani kena aku kentisik i bas perdalanen.  Ateku min i bas kerehenku ndahi kena, labo terjeng singgah saja. Adi ibere Jahwe, terdekahen min ateku tading ras kena.  Gundari tading denga aku i Epesus seh asa Perayan Pentakosta,  sebap lit kesempaten si mbelin* man bangku guna ngelayani, tapi nterem si ngelawan. 10  Adi reh kari Timotius, usahakenlah gelah la kari ia mbiar sanga ras kena, sebap ia erdahin guna Jahwe, bali bagi aku. 11  Emaka ula ise pe sepele nandangi ia. Temani ia kentisik i bas perdalanenna gelah ia selamat. Alu bage banci idahina aku, perban aku ras turang senina si deban nggo nimai ia. 12  Kerna turang seninata Apolos, nggo kupindoken kel man bana gelah ikut ia radu ras turang senina si deban ndahi kena. Memang la ia nggit reh gundari, tapi adi lit pagi kesempaten pasti nge ia reh ndahi kena. 13  Tetaplah sadar, cikeplah alu nteguh kiniteken kena, perpanglah, janah megegehlah. 14  Lakokenlah kerinana alu kekelengen. 15  O turang senina, iteh kena maka rumah tangga Stepanas eme pengikut Kristus si pertama i Akaya, janah katawari pe kalak e nggit ngelayani kalak si badia. Emaka kupindoken man kena: 16  Teruslah patuh man kalak si bage, bage pe man kerina kalak si ras-ras erdahin janah kerja keras. 17  Meriah ukurku kerna kerehen Stepanas, Portunet, ras Akaikus, sebap kalak e si nampati aku sanga kena la lit i jenda. 18  Ipegegehina aku bage pe kena. Emaka ergailah kalak si bage. 19  Runggun-runggun si lit i Propinsi Asia kirim salam man kena. Akuila ras Persila,* bage pe runggun si pulung i bas rumahna, kirim salam ka man kena alu bulat ukur i bas Tuan. 20  Kerina turang senina kirim salam man kena. Alo-alolah sada ras si debanna alu dem kekelengen.* 21  Enda me salam si kutulis alu tanku sendiri, i bas aku nari, Paulus. 22  Kalak si la keleng atena Tuan, patut isumpahi. O Tuan kami, rehlah kam! 23  Mbera lias ate si mbelin i bas Tuan Jesus nari terus lit bas kena. 24  Keleng ateku kena kerina si ersada ras Kristus Jesus.

Cataten kaki

As. “sebap nggo terbuka pintu si mbelang.”
Ntah “Priska.”
As. “alu ciumen si badia.”