1 Korinti 14:1-40

  • Pemere ernubuat ras ngerana i bas bahasa si deban (1-25)

  • Perpulungen Kristen si teratur (26-40)

    • Keduduken diberu i bas runggun (34, 35)

14  Usahakenlah ncidahken kekelengen, janah usahakenlah ndatken pemere-pemere i bas Dibata nari, terlebih-lebih pemere guna ernubuat.  Kalak si ngerana i bas bahasa si deban, labo ia ngerana man manusia tapi man Dibata. Aminna pe alu kesah si badia banci icakapkenna kerna rahasia si badia, tapi ise pe la ngangkaisa.  Tapi kalak si ernubuat banci mpegegehi, nampati, ras ngapuli kalak si deban alu rananna.  Kalak si ngerana i bas bahasa si deban, dirina ngenca si ipegegehina. Tapi kalak si ernubuat mpegegehi runggun.  Ateku min kerina kena ngerana i bas bahasa si deban, tapi padin kuakap kena ernubuat. Ulin ernubuat asangken ngerana i bas bahasa si deban, pala e iterjemahken, alu bage runggun banci ipegegehi.  O turang senina, adi reh aku janah ngerana alu bahasa si deban, kai gunana man kena? Gelah erguna, la kin arus aku ngerana alu pemeteh, ntah nubuat, ntah ajaren, ntah alu kai si ipebetehken Dibata?  Bali bagi alat-alat musik, eme barang si la erkesah tapi ersora, contohna sarune ntah kulcapi, adi la jelas nadana imainken, uga banci iteh kalak laguna?  Adi la jelas sora trompet e, ise si ersikap guna erperang?  Bage ka pe, adi kata-kata si ipake kena mesera ngangkaisa, uga kalak banci ngangkai si ikataken kena e? Situhuna, seri saja kena ngerana ku angin. 10  Lit erbage-bage bahasa i bas doni enda, tapi kerina bahasa e lit ertina. 11  Adi la kuangkai kai si ikataken sekalak jelma man bangku, aku jadi kalak asing man bana, janah ia jadi kalak asing man bangku. 12  Bage ka pe kena, erkiteken ersura-sura kel kena ngaloken pemere-pemere i bas Dibata nari, usahakenlah ndatken terbuen pemere guna mpegegehi runggun. 13  Emaka kalak si ngerana i bas bahasa si deban, perlu ia ertoto gelah banci iterjemahkenna kai si ikatakenna e. 14  Sanga aku ertoto i bas bahasa si deban, ukurku labo ikut i bas toto e. Tapi banci kulakoken bage perban kudat pemere i bas Dibata nari. 15  Adi bage, kai si arus kulakoken? Ertoto aku alu pemere i bas Dibata nari, tapi ukurku pe ikut ka nge i bas toto e. Kuendeken pujin alu pemere i bas Dibata nari, tapi ukurku pe ikut ka nge i bas enden e. 16  Adi ipuji kena Dibata alu pemere i bas Dibata nari, janah kai si ikataken kena e la iangkai kalak si lenga iajari si lit i tengah-tengah kena, uga banci ikatakenna “Amin” kenca kena ertoto ngata bujur? 17  Memang mejile pertoton kena i bas ngataken bujur man Dibata, tapi kalak e la terpegegehi. 18  Bujur kukataken man Dibata perban banci aku ngerana i bas terbuen bahasa asangken kena kerina. 19  Aminna pe bage, gelah banci kuajari kalak i bas runggun, ulin kubelasken lima kata si banci iangkai asangken sepuluh ribu kata i bas bahasa si deban si la iangkai. 20  O turang senina, ula bagi anak-anak carandu rukur. Tapi i bas si la mehuli, bagi anak-anak min kena, janah bagi kalak dewasa min cara kena rukur. 21  Lit tertulis i bas Undang-Undang Musa, “‘Kupake me kalak si ngerana i bas bahasa si deban bage pe kalak asing guna ngerana man kalak e, tapi kalak e tetap la nggit megiken Aku,’ nina Jahwe.” 22  Emaka, pemere guna ngerana i bas bahasa si deban jadi bukti man kalak si la tek, labo bukti man kalak si tek. Tapi pemere ernubuat jadi bukti man kalak si tek, labo man kalak si la tek. 23  Adi kerina runggun pulung janah kerina ngerana i bas bahasa si deban, jenari reh kalak si lenga iajari ntah si lenga tek, la kin ikataken kalak e kari maka kena kerina nggo adon? 24  Tapi adi kerina kena ernubuat, jenari reh kalak si lenga iajari ras kalak si lenga tek, kata-kata kena banci jadi persinget man kalak e janah ngiahken kalak e guna mereksa dirina. 25  Iteh kalak e me kai si terbuni i bas pusuhna, alu bage erjimpuh ia nembah Dibata. Nina, “Tuhu-tuhu kepe Dibata lit i tengah-tengah kena.” 26  Adi bage, uga turang senina? Sanga kena pulung, lit si ngendeken masmur, lit si ngajar, lit si mpeseh kai si ipebetehken Dibata, lit si ngerana alu bahasa si deban, janah lit si nerjemahken. Lakokenlah kerinana guna mpegegehi. 27  Adi lit si ngerana i bas bahasa si deban, bias nge dua ntah telu kalak saja si pegancih ngerana, janah arus lit sekalak jelma si nerjemahkenca. 28  Adi la lit si nerjemahkenca, arus kalak e tetap sinik i bas runggun janah ngerana man Dibata i bas pusuhna saja. 29  Adi lit nabi, bias dua ntah telu nabi saja si ngerana, tapi si debanna ngusahaken gelah ngangkai ertina. 30  Tapi adi ipeseh Dibata kataNa man sekalak jelma si sangana kundul i je, kalak si sanga ngerana arus sinik. 31  Kerina kena banci pegancih ernubuat, alu bage kerina kalak banci erlajar janah ipegegehi. 32  Pemere si ialoken nabi-nabi arus ipakena alu cara si benar. 33  Dibata labo Dibata si la teratur, tapi Dibata kedamen kap. Bali bagi kerina runggun kalak si badia, 34  diberu arus sinik i bas runggun. La banci kalak e ngerana. Tapi arus kalak e patuh, bagi si ikataken Undang-Undang Musa. 35  Adi lit si atena itehna, i rumah sajalah ia nungkun man dilakina, sebap man kemelanken kap adi diberu ngerana i bas runggun. 36  I bas kena nari kin rehna kata Dibata, ntah man kena saja kin kata Dibata e ipeseh? 37  Adi lit si erpengakap maka ia nabi ntah lit bas ia pemere i bas Dibata nari, arus iakuina maka kai si kutulis man kena enda eme perentah Tuan.* 38  Adi lit kalak si la mperdiateken si enda, ia pe labo iperdiateken.* 39  Emaka turang senina, teruslah usahaken guna ndatken pemere ernubuat, tapi ula larang kalak si deban ngerana i bas bahasa si deban. 40  Lakokenlah kerinana alu cara si benar ras teratur.

Cataten kaki

Bahasa Junani, Kyrios. Ntah banci saja “Tuhan.”
Ntah banci saja “Adi lit si kurang erpemeteh, tetap nge kurang pemetehna.”