1 Johanes 4:1-21

  • Ujilah kata-kata si tempa-tempa rehna i bas Dibata nari (1-6)

  • Nandai Dibata ras ngkelengi Dibata (7-21)

    • “Dibata kekelengen kap” (8, 16)

    • I bas kekelengen la lit kebiaren (18)

4  O turang senina si kukelengi, ula kena tek nandangi kata-kata si tempa-tempa rehna i bas Dibata nari. Tapi ujilah lebe guna metehsa tuhu kin e i bas Dibata nari, sebap nggo nterem nabi palsu i bas doni enda.  Bagenda me cara metehsa adi tuhu kin e i bas Dibata nari: Adi kata-kata si tempa-tempa rehna i bas Dibata nari e ngakui maka Jesus Kristus nggo reh jadi manusia, si e rehna i bas Dibata nari.  Tapi adi kata-kata si tempa-tempa rehna i bas Dibata nari e la ngakui maka Jesus nggo reh jadi manusia, si e labo rehna i bas Dibata nari, tapi i bas musuh Kristus nari. Enggo ibegi kena maka kerna si enda nandangi terjadi me, janah gundari nggo lit i doni enda.  O anak-anak si kukelengi, kena rehna i bas Dibata nari janah nggo italuken kena nabi-nabi palsu e, perban gegehen si ersada ras kena asangken si ersada ras doni enda.  Kalak e rehna i bas doni enda nari, eme sebapna kai si ikataken kalak e rehna i bas doni enda nari janah ibegiken doni enda kalak e.  Tapi kita rehna i bas Dibata nari. Ise pe si nandai Dibata, ibegikenna kita. Tapi si labo rehna i bas Dibata nari, labo ibegikenna kita. Bagenda me carana gelah banci sibedaken benar ntah salah kata-kata si tempa-tempa rehna i bas Dibata nari e.  O turang senina si kukelengi, teruslah kita sikeleng-kelengen perban kekelengen e rehna i bas Dibata nari. Ise pe si lit kekelengenna, anak Dibata kap ia janah itandaina Dibata.  Ise pe si la lit kekelengenna, labo itandaina Dibata, perban Dibata kekelengen kap.  Bagenda me cara Dibata mbuktiken kekelengenNa man banta: IsuruhNa AnakNa si tonggal ku doni enda, gelah banci sidatken kegeluhen erkelangken ia. 10  Isuruh Dibata AnakNa jadi korban pendamen guna dosa-dosata, labo perban nggo sikelengi Ia, tapi perban Ia si ngkelengi kita. 11  O turang senina si kukelengi, adi bagenda cara Dibata ngkelengi kita, kita pe arus sikeleng-kelengen. 12  Ise pe la pernah ngidah Dibata, tapi adi terus kita sikeleng-kelengen, Dibata tetap ras kita janah kekelengenNa jadi sempurna i bas dirita. 13  Erkiteken nggo ibereken Dibata kesahNa man banta, siteh maka ersada kita ras Ia, janah Ia ersada ras kita. 14  Selain si e, nggo idah kami janah nggo isaksiken kami, maka Bapak nggo nuruh AnakNa ku doni jadi Juru Selamat man doni enda. 15  Ise pe si ngakui maka Jesus e Anak Dibata, Dibata tetap kap ersada ras ia janah ia ersada ras Dibata. 16  Gundari nggo siteh janah tek kita maka keleng ate Dibata kita. Dibata kekelengen kap. Ise pe si erkeleng ate, ia tetap ersada ras Dibata, janah Dibata tetap ersada ras ia. 17  Erkiteken si e me kekelengen jadi sempurna i bas dirita. Alu bage banci kita bebas ngerana i bas wari penghakimen sebap geluhta i doni enda bali bagi geluh Kristus. 18  I bas kekelengen la lit kebiaren. Malahen kekelengen si sempurna erban kita lanai mbiar, perban perasan mbiar erban kita la bebas. Kalak si mbiar denga, e tandana lenga lit i bas ia kekelengen si sempurna. 19  Kita ngkelengi, sebap leben kap Dibata si ngkelengi kita. 20  Adi lit si ngataken, “Keleng ateku Dibata,” tapi segat atena turang seninana, ia perbual kap. Kalak si la ngkelengi turang seninana si banci idahna, labo tuhu banci ikelengina Dibata si la pernah idahna. 21  Enda me perentah si iberekenNa man banta: Kalak si ngkelengi Dibata, arus ka ikelengina turang seninana.

Cataten kaki