1 Johanes 2:1-29

  • Jesus, korban pendamen (1, 2)

  • Matuhi perentah-perentah Dibata (3-11)

    • Perentah si ndekah ras si mbaru (7, 8)

  • Alasen Johanes nulis surat (12-14)

  • Ula kelengi doni enda (15-17)

  • Hati-hati nandangi musuh Kristus (18-29)

2  O anak-anakku, si enda kutulisken gelah ula kena erban dosa. Tapi adi lit si erban dosa, lit kap si nampati kita si tading ras Bapak, eme Jesus Kristus, si benar perbahanenna.  Ia kap korban pendamen guna dosata, labo guna dosata saja tapi pe guna dosa kerina kalak si lit bas doni enda.  Janah adi terus sipatuhi perentah-perentahna, e tandana sitandai ia.  Adi lit si ngataken, “Kutandai kap ia,” tapi la ipatuhina perentah-perentahna, perbual kap ia janah la lit kebenaren i bas dirina.  Tapi, kalak si matuhi kata-katana, ia me si ngkelengi Dibata alu sempurna. E me tandana ersada kita ras ia.  Kalak si ngaku ersada ras ia, arus ikutkenna dalan geluhna.  O turang senina si kukelengi, kutulisken man kena labo perentah si mbaru, tapi perentah si nggo ndekah ialoken kena mulai kin tangtangna nari. Perentah si ndekah e me si nggo pernah ibegi kena.  Amin bage gia, perentah si kutulisken enda banci ikataken perentah si mbaru, erkiteken kebenaren perentah e teridah i bas Jesus Kristus bage pe i bas kena. Sebap kegelapen e nandangi lepas, janah terang situhu-tuhu nggo ersinar.  Adi lit si ngataken maka ia i bas terang, tapi segat atena turang seninana, i bas gelap denga kap ia. 10  Kalak si ngkelengi turang seninana, i bas terang kap ia. La lit kai pe i bas dirina si banci erban ia tertuktuk. 11  Tapi kalak si segat atena turang seninana, i bas gelap kap ia janah erdalan ia i bas gelap. Pentang matana iban gelap e, emaka la itehna ku ja perlawesna. 12  O anak-anakku, kutulisken enda man kena sebap dosa-dosa kena nggo iampuni erkiteken gelarna. 13  O perbapan, kutulisken enda man kena perban nggo itandai kena ia si mbarenda nari nggo lit. O anak muda, kutulisken enda man kena perban nggo italuken kena si jahat.* O anak si kitik denga, kutulisken enda man kena perban nggo itandai kena Bapak. 14  O perbapan, kutulisken enda man kena perban nggo itandai kena ia si mbarenda nari nggo lit. O anak muda, kutulisken enda man kena perban kena nggo paguh, janah kata Dibata tetap lit i bas kena, ras nggo italuken kena si jahat.* 15  Ula kelengi doni enda ntah pe kai si lit i bas doni enda. Sebap adi ikelengi kena doni enda, labo ikelengi kena Bapak. 16  Sebap kerina si lit bas doni enda, eme sura-sura daging, sura-sura mata, bage pe sura-sura i bas ncidahken erta. Si enda kerina labo rehna i bas Bapak nari tapi i bas doni nari. 17  Selain si e, doni ras kerina sura-surana nandangi ikernepken me. Tapi kalak si ngelakoken peraten Dibata nggeluh kap rasa lalap. 18  O anak-anak, enda me jam si terakhir. Enggo ibegi kena maka nandangi reh me musuh Kristus. Gundari pe nggo nterem musuh Kristus. Arah si e, nggo siteh maka kita nggeluh i bas jam si terakhir. 19  Kalak e sange radu ras kita, tapi ndarat kalak e perban kalak e la seri ras kita. Adi seri kalak e ras kita, pasti ras denga kita. Tapi ndarat kalak e gelah jelas teridah maka la kerina kalak bali bagi kita. 20  Kena nggo ipilih kesah si badia, janah kerina kena erpemeteh. 21  Kutulisken surat enda man kena labo perban la iteh kena kebenaren, tapi perban nggo iteh kena nge, janah labo lit bual si rehna i bas kebenaren nari. 22  Ise kin si perbual e, adi la kin ia si nulak Jesus Kristus? Enda me musuh Kristus, kalak si nulak Bapak bage pe Anak. 23  Ise pe si nulak Anak, itulak Bapak ka nge ia. Janah ise pe si ngakui Anak, ialoken Bapak ka nge ia. 24  Kai si nggo ibegi kena tangtangna nari, arus tetap lit i bas kena. Adi kai si nggo ibegi kena tangtangna nari tetap lit i bas kena, kena pe tetap nge ersada ras Anak bage pe ras Bapak. 25  Selain si e, enda kap si nggo ijanjiken Dibata man banta, eme kegeluhen si rasa lalap. 26  Kutulis surat enda perban lit kalak si icubakenna erban kena papak. 27  Enggo ilantikNa kena alu kesah si badia, janah kesah si badia e tetap lit i bas kena. Alu bage kena lanai perlu iajari ise pe. Kesah e benar, labo bual janah iajarina kena kerna kai pe. Bali bagi si iajarken kesah e, tetaplah kena ersada ras ia. 28  Emaka, o anak-anak si kukelengi, tetaplah kena ersada ras ia. Alu bage, paksa icidahkenna dirina i bas wari kerehenna, banci kita bebas ngerana, la mela, janah la sipedauh dirinta arah ia. 29  Enggo kap iteh kena maka benar kap Jesus, janah nggo ka iteh kena maka kalak si ngelakoken kai si benar, ia kap anak Dibata.

Cataten kaki

Maksudna, Setan.
Maksudna, Setan.