Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 Artikel Pelajaren 21

Ula Tertipu “Kepentaren Doni Enda”

Ula Tertipu “Kepentaren Doni Enda”

“Menurut Dibata, kepentaren doni enda kebodohen kap.”​—1 KOR. 3:19.

LAGU 98 Pustaka bas Jahwe nari

SI IBAHAS *

1. Kai si iajarken Pustaka banta?

JAHWE me Guruta si Mbelinna, emaka banci siteh uga cara ndungi masalahta. (Jes. 30:20, 21) Iajarken Pustaka kita gelah “tuhu-tuhu ngasup janah ilengkapi guna ngelakoken kerina perbahanen si mehuli.” (2 Tim. 3:17) Adi sidalanken ajaren Pustaka, pentaren me kita asangken kalak si ngataken maka arus siikutken “kepentaren doni enda.”​—1 Kor. 3:19; Msm. 119:97-100.

2. Kai si man bahasenta bas artikel enda?

2 Bagi si nandangi sibahas, kepentaren doni enda rusur erban reh belinna sura-sura dagingta. Emaka banci saja mesera siakap nulak cara rukur ras perbahanen kalak bas doni enda. Eme sebapna nina Pustaka, “Hati-hatilah gelah kena la iperbudak kalak alu ajaren manusia ras tipun si kosong si rehna arah adat manusia.” (Kol. 2:8) Bas artikel enda, sibahas kari uga tangtangna maka tek kalak man dua tipun si kosong, ntah pe bual si iajarken Setan. Bas tiap bual e, sibahas ka ngkai maka kepentaren doni enda kebodohen kap janah ngkai maka kepentaren arah Kata Dibata ndauh ulin asangken kai pe.

PERUKUREN SI NGGO BERUBAH KERNA SEKS

3-4. Bas awal abad pe-20-ken, perubahen kai saja si terjadi i Amerika Serikat kerna perukuren kalak soal seks?

3 Bas awal abad pe-20-ken i Amerika Serikat, terjadi me perubahen si mbelin kerna perukuren kalak soal seks. Sebelumna, nterem si erpengakap maka kalak si nggo erjabu ngenca si banci erhubungen seks janah labo cocok ncakapken kerna seks bas jelma si nterem. Tapi gundari lanai bage, janah perukuren si salah nggo reh belangna.

 4 Bas tahun 1920-en, eme kenca dung Perang Doni I, nggo berubah kel perbahanen ras perukuren kalak kerna seks. Nina sekalak peneliti, “Melala film, drama pentas, lagu, buku, bage pe iklan nggo mulai ncidahken kai pe si lit hubungenna ras seks.” Bas tahun-tahun e, perlandek kalak erban kalak si deban ngukuri kerna seks janah peruis kalak pe nggo lanai rorat. Bagi si inubuatken bas Pustaka kerna wari-wari pendungi, nterem kalak si “kesenangenna saja si idaramina.”​—2 Tim. 3:4.

Umat Jahwe la tertipu patoken doni enda si reh dekahna reh bebasna (Nen paragrap 5 ras 9) *

5. Uga nge perukuren kalak kerna seks bas tahun 1960-en?

5 Bas tahun 1960-en, reh buena kalak si nggeluh ras-ras ope lenga sah erjabu, reh buena kalak si homo, janah reh buena ka kalak si cerai. Melala kel hiburen si terang-terangen ncidahken kerna seks. Kai nge akibatna? Lit sekalak penulis si ngataken maka melala kel akibatna adi lanai ikutken kalak patoken kerna si benar ras si salah soal seks. Contohna, orang tua lanai ersada, lit si jadi orang tua tunggal perban itadingken teman geluhna, nterem si rate mesui, janah lit ka si kecandun pornografi. Akibat si debanna, nterem ka si kena pinakit arah hubungen seks, misalna AIDS. Kerina enda mbuktiken maka kepentaren doni enda kebodohen kap.​—2 Pet. 2:19.

6. Engkai maka perukuren doni enda kerna seks nggo bali bagi sura-sura Setan?

6 Perukuren doni enda kerna seks nggo bali bagi sura-sura Setan. Pasti meriah kel akap Setan ngidah kalak erhubungen seks alu cara si la ngena ate Dibata janah la ngergai pemereNa eme perjabun. (Ep. 2:2) Adi ilakoken kalak perbahanen seks si salah, la iergaina pemere Jahwe guna ngasilken keturunen. Kalak si bage pe la banci ndatken kegeluhen si rasa lalap.​—1 Kor. 6:9, 10.

KAI NINA PUSTAKA KERNA SEKS

7-8. Engkai maka kai si ikataken Pustaka kerna seks ndauh ulin asangken kai si ikataken kalak bas doni enda?

7 Kalak si ngikutken kepentaren doni enda la iergaina patoken Pustaka kerna seks. Ikatakenna maka patoken e lanai cocok gundari. Banci saja ning kalak e, ‘Engkai maka ibere Dibata kita sura-sura ngelakoken hubungen seks tapi suruhNa ka gelah sikendaliken?’ Bage ning kalak e perban salah carana rukur. Iakapna  adi merhat kita ngelakoken sada hal, lakoken sajalah. Tapi la bage nina Pustaka. Pustaka ngatakenca labo arus siikutken kerina sura-surata, janah ngasup nge kita ngelawan sura-sura si salah. (Kol. 3:5) Selain si e, lit ban Jahwe perjabun. Alu bage, manusia banci ngelakoken hubungen seks janah tetap denga ngena ate Dibata ia. (1 Kor. 7:8, 9) Emaka, perbulangen ras ndehara banci erhubungen seks alu la kuatir janah la nyesal bas pudi wari, bagi si biasana igejapken kalak si ngelakoken perbahanen seks si salah.

8 La bagi doni enda, iajarken Pustaka kita gelah benar perukurenta kerna seks. Ikataken Pustaka maka hubungen seks banci erban meriah ukurta. (Kua. 5:18, 19) Tapi nina ka, “Arus iteh kena sekalak-sekalak uga ngkuasai daging kena gelah tetap badia ras mehamat. Labo bagi bangsa-bangsa si la nandai Dibata si la terkuasaisa napsu seksna janah la pernah puas.”​—1 Tes. 4:4, 5.

9. (a) Bas awal abad pe-20-ken, kai si ngiahken umat Jahwe gelah ngikuti kepentaren si lit bas Kata Dibata? (b) Pedah kai si lit bas 1 Johanes 2:15, 16? (c) Bagi si ikataken bas Roma 1:24-27, perbahanen salah kai saja si arus situlak?

9 Bas awal abad pe-20-ken, umat Jahwe la tertipu cara rukur kalak si ‘pusuh peratenna lanai erpenggejapen.’ (Ep. 4:19) Iusahaken umat Jahwe kel ngikutken patoken Jahwe. Bas Watch Tower 15 Mei 1926, ikataken maka “sekalak dilaki ntah pe diberu arus tetap bersih ras badia bas perukuren bage pe perbahanenna, khususna sanga erurusen ras lawan jenis.” La soal kai pe si terjadi i sekeliling umat Jahwe, tetap ikutken kalak e kepentaren si lit bas Kata Dibata. Kepentaren e me si mehulina. (Baca 1 Johanes 2:15, 16.) Ngata bujur kel kita perban lit Kata Dibata! Ngata bujur ka kita perban nggo ibereken Jahwe pangan rohani si tepat waktu gelah la kita tertipu kepentaren doni enda kerna seks. *Baca Roma 1:24-27.

PERUKUREN SI NGGO BERUBAH KERNA NGKELENGI DIRI SENDIRI

10-11. Kai si ikataken Pustaka si terjadi bas wari-wari pendungi?

10 Enggo ikataken Pustaka maka bas wari-wari pendungi, nterem kalak si “ngkelengi dirina saja.” (2 Tim. 3:1, 2) Emaka labo ateta mamang sanga ipengaruhi doni enda kalak gelah jadi egois. Lit sada ensiklopedia si ngataken maka bas tahun 1970-en, “melala kel buku kerna kunci sukses.” Piga-piga buku e ngataken maka kalak la perlu berubah janah labo lit si salah bas dirina. Misalna, perdiatekenlah kai si ikataken bas salah sada buku e, “Kelengilah bandu perban kam kap si mejilena, si mantapna, ras si jagona.” Bas buku e pe ikataken maka tep-tep kalak banci iputuskenna sendiri kai si atena ilakokenna, janah banci ilakokenna kai pe si benar ras meriah iakapna.

11 Pernah nge ibegindu perukuren si bage? Mbarenda iajuk Setan me Hawa guna ngelakokenca. Ikatakenna banci Hawa ‘bali ras Dibata, meteh si bujur ras si jahat.’ (Kej. 3:5) Gundari nterem kalak si ganjangen akapna bana asangken kalak si deban. La kapna lit ise pe, termasuk Dibata, si banci nentuken kai si benar ras kai si salah. Perukuren si bage nggo jelas kel teridah, misalna bas perjabun.

Kalak Kristen ngutamaken kepentingen kalak si deban, khususna teman geluhna (Nen paragrap 12) *

12. Uga nge perukuren doni enda kerna perjabun?

12 Ikataken bas Pustaka maka arus  iergai perbulangen ndeharana bage pe sebalikna. Arus ka iergai kalak e janjina sanga erjabu. Iiahken Pustaka gelah perbulangen ras ndehara tetap ersada, nina, “Em sabapna dilaki nadingken nande bapana, gelah ersada ia ras ndeharana, maka duana enggo jadi sada.” (Kej. 2:24) Tapi kalak si terpengaruh kepentaren doni enda ngataken maka kalak si nggo erjabu arus ngutamaken kepentingenna saja. Nina sada buku kerna kalak si cerai, “Bas piga-piga upacara perjabun, janji si isina ‘sedekah kita duana nggeluh’ nggo iganti jadi ‘sedekah kita duana sikeleng-kelengen.’” Iakap kalak perjabun e labo hubungen si tahan rasa lalap, emaka melala keluarga si dungna sirang janah rate mesui. Jelas me, perukuren doni enda kerna perjabun kebodohen kap.

13. Kai salah sada alasen maka ciga ate Jahwe kalak si sombong?

13 Nina Pustaka, “Nembeh ate [Jahwe] man kerina kalak si meganjang rukur.” (Kua. 16:5) Engkai maka ciga ate Jahwe kalak si meganjang rukur ntah pe sombong? Salah sada alasenna eme perban kalak si sombong lalap mentingken bana janah ipengaruhina ka kalak gelah mentingken bana, bali bagi Setan. Bayangken, iakap Setan maka arus Jesus erjimpuh janah nembah ia, padahal Jesus me si igunaken Dibata nciptaken kerinana! (Mat. 4:8, 9; Kol. 1:15, 16) Aminna pe kalak si meganjang rukur erpengakap maka ia pentar, tapi situhuna motu nge ia iakap Dibata.

KAI NINA PUSTAKA KERNA NGKELENGI DIRI SENDIRI

14. Kai si ikataken Roma 12:3 si nampati kita gelah benar perukurenta kerna dirita?

14 Pustaka banci nampati kita gelah benar perukurenta kerna dirita. Ikataken bas Pustaka maka labo salah adi sikelengi dirita. Nina Jesus, “Arus ikelengindu kalak si deban bagi kam ngkelengi dirindu.” (Mat. 19:19) E ertina perlu siperdiateken keperlunta. Tapi iajarken Pustaka maka  ula min siakap pentingen kita asangken kalak si deban. Nina, “Ula lakoken kai pe erkiteken nggit rubati ntah pe erkiteken mentingken bana, tapi alu meteruk ukur anggaplah kalak si deban ganjangen asangken kena.”​—Pil. 2:3; baca Roma 12:3.

15. Menurutndu, ngkai maka mehuli adi siikutken pedah Pustaka kerna ngkelengi diri sendiri?

15 Gundari nterem kalak si pentar iakap kalak ngataken maka pedah Pustaka la lit gunana. Menurut kalak e, adi ganjangen siakap kalak si deban asangken kita, imanpaatkenna me kita. Tapi, kai saja akibatna adi siikutken perukuren arah doni Setan e? Uga menurutndu? Tuhu-tuhu nge kalak si egois ermeriah ukur? Ermeriah ukur nge keluargana? Lit nge teman rembakna? Rembak ka nge ia ras Dibata? Menurutndu, apai nge si mehulina, kepentaren doni enda ntah kepentaren arah Kata Dibata?

16-17. Kerna kai saja kita perlu ngata bujur, janah ngkai?

16 Kalak si ngikutken pedah arah kalak si pentar menurut doni enda, bali bagi turis si nungkun dalan man turis si deban, padahal kalak e duana sangana papak. Ikataken Jesus kerna kalak si ianggap pentar bas jamanna, “Kalak e penegu-negu si pentang. Adi kalak pentang negu kalak pentang, ndabuh me ia duana ku lubang.” (Mat. 15:14) Jelas me, kepentaren doni enda kebodohen kap menurut Dibata.

Meriah kel ukur umat Dibata perban terus ikutkenna kepentaren arah Jahwe i bas geluhna (Nen paragrap 17) *

17 Pedah Pustaka lalap terbukti “erguna i bas ngajar, ncidahken kesalahen, pekena kerinana, janah mereken disiplin guna ngelakoken kai si benar.” (2 Tim. 3:16) Ngata bujur kel kita perban ilindungi Jahwe kita arah kepentaren doni enda erkelangken organisasiNa! (Ep. 4:14) Pangan rohani si iberekenNa erban ngasup kita ngikutken patoken bas Pustaka. Luar biasa kel siakap perban itegu-tegu Jahwe kita janah iberekenNa kepentaren si erguna kel i bas Pustaka!

LAGU 54 “Enda kap Dalan”

^ par. 5 Artikel enda erban kita reh tekna maka Jahwe ngenca si tuhu-tuhu banci negu-negu kita. Sibahas ka kai akibatna adi siikutken kepentaren doni enda, tapi adi siikutken kepentaren arah Kata Dibata erguna kel i bas geluhta.

^ par. 9 Misalna, nenlah Pertanyaan Kaum Muda—Jawaban yang Praktis, Jilid 1, psl. 24, 25, 26, ras Jilid 2, psl. 4-5, bage pe Jabapen man 10 Penungkunen Anak Muda, penungkunen 7, hal. 21-23.

^ par. 50 KETERANGEN GAMBAR: Piga-piga kejadin bas kegeluhen sepasang Saksi Jahwe.

^ par. 52 KETERANGEN GAMBAR: Erberita kalak e bas pendungi tahun 1960-en.

^ par. 54 KETERANGEN GAMBAR: Bas tahun 1980-en, iurus perbulangen e ndeharana si sangana sakit, janah anakna si kitik denga lit i je. Gundari, inget kalak e mulihi kerina kenangen si erban meriah ukurna perban ikutkenna kepentaren Jahwe. Anakna si nggo galang bage pe keluargana ikut ermeriah ukur ras kalak e.