Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 Artikel Pelajaren 22

Reh Ulinalah Ban Carandu Erlajar!

Reh Ulinalah Ban Carandu Erlajar!

‘Pastikenlah kai si lebih penting.’​—PIL. 1:10.

LAGU 35 Pelebelah Kai si Penting

SI IBAHAS *

1. Engkai maka piga-piga kalak lanai atena erlajar?

GUNDARI, nterem kalak si arus kerja keras guna ncukupi keperlunna. Enterem ka turang seninata si arus erdahin sada wari ben gelah banci lit si man pangan, si man paken, bage pe ingan tading man keluargana. Si debanna ndauh kel inganna erdahin, emaka keri-keri bas dalan waktuna. Melala ka si mberat kel pendahinna. Emaka mulih erdahin, nggo latih kel iakap turang seninata e! Lanai kalak e ngasup erlajar.

2. Ndigan nge ibanndu waktundu guna erlajar?

2 Arus siban waktuta guna tuhu-tuhu mpelajari Kata Dibata bage pe buku-bukuta. Enda seh kel pentingna adi ateta rembak ras Jahwe janah nggeluh si rasa lalap! (1 Tim. 4:15, 16) Lit si lampas medak tiap wari gelah banci erlajar sanga tenang keadan i rumahna janah segar denga iakapna. Lit ka si iaturna waktuna guna mpelajari ras ngukuri Pustaka bage pe buku-bukuta bas berngi wari sanga la lit ganggun.

3-4. Perubahen kai si nggo iban kerna bahan si icetak bage pe bahan elektronik, janah ngkai?

3 Pasti setuju kam maka perlu siban waktuta guna erlajar. Tapi kai nge si arus sipelajari? Banci saja nindu, ‘Melala kel si man bacan. Lo terbacaku kerina.’ Lit turang seninata si banci ibacana kerina buku-bukuta janah itontonna ka kerina videota si erpalasken Pustaka, tapi si deban mesera kapna ngelakokenca. Iteh Badan Pinpinen kerna si e. Emaka, iputusken kalak e ngkurangi bahan si icetak bage pe bahan elektronik.

4 Misalna, Buku Tahunan Saksi-Saksi Yehuwa lanai iterbitken  perban nggo melala pengalamen si mpegegehi kita si lit bas jw.org® ras JW Broadcasting®. Selain si e, majalah Sora Ermomo man jelma si nterem ras Sadarlah! nggo telu kali setahun nari ngenca iterbitken. Perubahen e iban labo gelah reh buena waktuta ngelakoken dahin si deban. Tapi tujunna eme gelah banci siutamaken “kai si lebih penting.” (Pil. 1:10) Mari sibahas uga cara ngelakokenca janah uga carana gelah melala sidat manpaat sanga erlajar pribadi.

UTAMAKENLAH KAI SI LEBIH PENTING

5-6. Buku kai saja si arus sipelajari?

5 Kai nge si terutama perlu sipelajari? Pustaka, arus siban waktuta mpelajarisa tiap wari. Gundari, nggo ikurangi jumlah pasal si lit bas jadwal pembacan Pustaka tiap minggu bas runggun. Alu bage, reh lalana waktuta ngukurisa alu mbages janah erban riset. Tujunta ula min gelah nggo sibaca saja kerina ayat-ayat e, tapi sibanlah gelah kai si nggo sibaca kena ku pusuhta janah erban kita reh rembakna ras Jahwe.​—Msm. 19:15.

6 Kai ka si arus sipelajari? Sipersiapken ka artikel si ibahas bas Pelajaren Sora Ermomo ras Pelajaren Pustaka si Badia Runggun bage pe kerina si ipelajari bas perpulungen tengah pekan. Selain si e, sibaca ka min tiap terbiten Sora Ermomo ras Sadarlah!

7. Engkai maka ula min kitik ukurta adi la banci sibaca ras sitonton kerina si lit bas jw.org bage pe JW Broadcasting?

7 Banci saja nindu, ‘Memang kerina buku ndai perlu nge ipelajari, tapi uga kerna artikel ras video si lit bas jw.org bage pe JW Broadcasting? Mbue ka kel!’ Cuba bayangkenndu enda: Melala kel pangan si ntabeh si iban i datas meja bas sada restoran. Labo terpan kalak si reh ku restoran e kerina jenis pangan si lit i je. Arus ipilih kalak e pangan si apai si atena ipanna. Bage ka pe, adi la banci ibacandu ntah pe itontonndu kerina pangan rohani si lit bas bentuk elektronik, ula kitik ukurndu. Baca ras tontonlah kai si banci ibacandu ras itontonndu. Gundari, mari sibahas kai kin maksudna erlajar janah kai si arus silakoken gelah kai si ipelajari kita e banci erguna.

ERLAJAR PERLU USAHA!

8. Uga nge carana mpersiapken Sora Ermomo, janah kai gunana adi ilakokenndu e?

8 Sanga erlajar, fokuslah kita ku kai si sangana sibaca gelah banci sidat pelajaren penting je nari. Tapi, erlajar labo asal mbaca saja janah nggarisi jawapenna. Misalna, sanga persiapen Pelajaren Sora Ermomo, sibaca lebe bagin “Si Ibahas” si lit bas pemena artikel. Kenca si e, baca ras ukuri judul artikelna, subjudulna, bage pe penungkunen si lit bas pendungi pelajaren. Dung e, bacalah artikelna alu manjar-anjar janah megermet. Perdiatekenlah kalimat si mpebetehken kai si ibahas bas sada paragrap. Biasana, kalimat e eme kalimat si pertama bas tiap paragrap. Arah kalimat e banci siteh kai si nandangi ijelasken bas paragrap e. Sanga ibacandu kerina artikel e, ukurilah kai hubungen tiap paragrap ras subjudulna, bage pe ras tema utama artikel e. Catatlah kata-kata si la iangkaindu ras kai si atendu ipelajarindu terbagesen.

9. (a) Sanga mpersiapken Sora Ermomo, ngkai maka arus siperdiateken ayat-ayatna, janah uga carana? (b) Menurut Masmur 1:2, kai ka si arus silakoken kenca sibaca ayat bas Pustaka?

9 Sanga sipelajari Sora Ermomo bas perpulungen, banci lebih siangkai kerna  Pustaka. Emaka, perdiatekenlah ayat-ayatna, khususna ayat si ibacaken kari sanga artikel e ibahas bas perpulungen. Perdiateken ka kai hubungen kata kunci bas ayat e ras pokok utama bas paragrap e. Selain si e, ukurilah ayat e alu mbages gelah itehndu pelajaren kai si banci idalankenndu bas geluhndu.​—Baca Masmur 1:2.

Orang tua, ajarilah anak-anakndu uga carana erlajar (Nen paragrap 10) *

10. Menurut Heber 5:14, ngkai maka sanga Kebaktin Jabu arus iajari orang tua anakna kerna carana erlajar ras erban riset?

10 Wajar nge adi ate orang tua meriah min iakap anakna sanga Kebaktin Jabu tiap minggu. Emaka arus irencanaken orang tua kai si man bahasen bas Kebaktin Jabu. Melala keluarga si meriah akapna erban proyek si khusus, misalna erban bahtra Nuah, tapi kegiaten si bage labo perlu iban tiap minggu. Selain erban kegiaten si bage ntah pe nonton JW Broadcasting, penting ka iajari orang tua anakna uga carana erlajar. Misalna, perlu iteh anak-anak uga carana erban persiapen guna perpulungen, ntah pe uga carana erban riset kerna masalahna i sekolah. (Baca Heber 5:14.) Adi nggo ipelajari kalak e Pustaka i rumah, reh nukahna kari iakapna ngangkai kai si ipeseh bas perpulungen ras kebaktin, amin gia labo lalap lit video si iputarken. Janah, arus iperdiateken orang tua umur ras sipat anakna gelah banci itentukenna asa kai dekahna kalak e erlajar.

11. Engkai maka perlu siajari kalak si erlajar Pustaka ras kita carana erban pelajaren pribadi?

11 Kalak si erlajar Pustaka ras kita pe perlu iajari uga cara erlajar. Sanga tangtangna kalak e erlajar Pustaka, igarisina saja pe buku pelajarenna ntah pe bahan si ibahas bas perpulungen, nggo meriah kel siakap. Tapi perlu ka siajari ia carana erban riset bage pe pelajaren pribadi. Alu bage, sanga lit masalahna, la kari mis isungkunina kalak si deban bas runggun kerna kai si arus ilakokenna. Enggo itehna uga carana ndatken keterangen arah buku-bukuta si banci nampati ia.

BANLAH TUJUNNDU SANGA ERLAJAR

12. Kai saja nge tujunta erlajar?

12 Adi la kam hobi erlajar, banci jadi nindu, “Labo kari meriah kuakap erlajar.” Tapi situhuna labo bage. Tangtangna ntisik saja kam lebe erlajar, reh dekahna reh buena ban waktundu. Ukurilah kai tujunndu erlajar. Tujun si pentingna eme gelah  reh rembakna ras Jahwe. Tujun si deban eme gelah banci sijawap penungkunen kalak man banta ntah pe gelah banci sidat keterangen kerna masalahta.

13. (a) Jelaskenlah kai saja si banci ilakoken anak muda guna njelasken kinitekenna i sekolah. (b) Uga anak muda banci ndalanken pedah si lit bas Kolose 4:6?

13 Contohna, sekolah denga nge kam? Banci saja teman sekelasndu ngerayaken wari ulang tahun. Ijelaskenndu atendu man kalak e arah Pustaka ngkai maka la kam nggit ngerayakenca, tapi banci saja iakapndu la kam beluh njelaskenca. Emaka perlu kam erlajar! Lit dua tujunna: (1) gelah reh paguhna kinitekenndu maka Dibata la senang nandangi perayan ulang tahun, janah (2) gelah reh beluhna kam njelasken kebenaren. (Mat. 14:6-11; 1 Pet. 3:15) Ukuri lebe enda, ‘Engkai maka irayaken teman sekelasku wari ulang tahun?’ Kenca si e, risetlah kam nggunaken buku-bukuta. Banci saja, njelasken kinitekenndu labo bagi si ibayangkenndu serana. Enterem kalak ngerayaken wari ulang tahun perban kerina kalak ngerayakenca. Adi datndu sada ntah dua keterangen si banci iceritakenndu man kalak e, banci isampatindu temanndu si tuhu-tuhu merhat meteh kebenaren.​—Baca Kolose 4:6.

ERUSAHALAH GELAH REH RIAHNA KAPNDU ERLAJAR

14-16. (a) Kai nge si banci ilakokenndu guna meteh terbuen kerna sada buku bas Pustaka? (b) Jelaskenlah uga ayat-ayat si lit i jenda banci erban kam lebih nandai buku Amos. (Nen ka kotak “Erusahalah Nandai Tokoh-Tokoh bas Pustaka!”)

14 Misalna bas perpulungen berikutna, sibaca ras sibahas me kerna salah sada buku bas 12 buku terakhir arah Kitap-Kitap Heber. Banci saja lenga itehndu kel isi buku e. Emaka perlu iusahakenndu gelah merhat kam meteh terbuen kerna isina. Uga carana?

15 Si pertama, ukurilah, ‘Kai saja nge si kuteh kerna penulis buku e? Ise nge ia, ja ia tading, kai nge pendahinna?’ Adi ipelajarindu terbuen kerna penulis buku e, banci lebih iangkaindu ngkai maka igunakenna kata-kata ntah pe perumpaman tertentu. Emaka sanga mbaca Pustaka, daramilah kata-kata si banci erban kam meteh sipat penulisna.

16 Kenca si e, banci ka idaramindu ndigan buku e itulis. Banci nenndu kerna si e bas “Daftar Buku-Buku Alkitab” si lit bas pudi Kitab Suci Terjemahan Dunia Baru. Selain si e, banci ka inenndu tabel kerna nabi-nabi ras raja-raja si lit bas Lampiran A6. Perban si sangana ipelajarindu bas Pustaka eme buku kerna nubuat, pelajarilah uga nge kegeluhen kalak paksa buku e itulis. Misalna, perbahanen si la mehuli kai nge si ilakoken kalak e maka isuruh me nabi e mpersingetisa? Ise nge si nggeluh sejaman ras nabi e? Gelah lebih iangkaindu si e, banci saja perlu ibacandu buku si deban bas Pustaka. Contohna, gelah banci lebih iangkaindu kai saja si terjadi bas jaman Nabi Amos, banci ibacandu ayat-ayat bas 2 Raja-Raja ras 2 Kronika, si lit bas referensi silang * Amos 1:1. Selain si e, banci ka ipelajarindu kai si itulis Hosea, si banci saja pernah nggeluh sejaman ras Amos. Adi ilakokenndu e, lebih iangkaindu me uga nge keadanna sanga Nabi Amos nggeluh.​—2 Raj. 14:25-28; 2 Kro. 26:1-15; Hos. 1:1-11; Amos 1:1.

 PERDIATEKENLAH KETERANGEN SI BIASA SAJA SIAKAP

17-18. Arah contoh si lit bas paragrap enda ntah pe contoh si deban si ipelajarindu, jelaskenlah ngkai maka keterangen si biasa saja siakap kepeken banci erban reh riahna mpelajari Pustaka.

17 Sanga sibaca Pustaka, mehuli adi merhat kita meteh terbuen. Misalna, ibacandu buku Sakaria pasal 12 si isina nubuat kerna kematen Mesias. (Sak. 12:10) Sanga ibacandu ayat 12, itehndu maka erceda ate kel “keluarga kesusuren Natan” sanga mate Mesias. Ula asal gelah nggo bacandu saja e, tapi ngadilah kentisik janah ukurilah: ‘Kai nge hubungen kesusuren Natan ras Mesias? Ija nge banci kudat terbuen keterangen?’ Banci ipereksandu terbuen bagi sekalak “detektif.” Nenlah Sakaria 12:12 bas Kitab Suci Terjemahan Dunia Baru. I je lit referensi silang si ngarahken kam ku 2 Samuel 5:13, 14. Arah ayat e itehndu maka Natan eme salah sada anak Raja Daud. Referensi silang si peduaken eme Lukas 3:23, 31. Arah ayat e siteh maka Jesus eme keturunen Natan, perban Natan salah sada nini bulang Maria. (Nen Sora Ermomo Agustus 2017 hal. 32, par. 4.) Dungna, menarik kel kapndu! Enggom itehndu lit nubuat si ngataken maka Jesus e lahir arah keturunen Daud. (Mat. 22:42) Tapi lit lebih 20 anak Daud si dilaki. Aminna pe bage, khusus ikataken Nabi Sakaria maka kesusuren Natan erceda ate perban mate Jesus. Enda tuhu-tuhu luar biasa!

18 Perdiateken contoh si deban. Bas pasal sada buku Lukas, sibaca maka reh malekat Gabriel ndahi Maria janah ipesehna berita si luar biasa kerna sekalak anak dilaki si nandangi ilahirkenna. Nina, “Jadi kalak si penting pagi ia janah igelari Anak Dibata Si Meganjangna.  Ibere Dibata Jahwe ka pagi man bana tahta Daud bapana, jadi Raja pagi ia nandangi kesusuren Jakup seh rasa lalap.” (Luk. 1:32, 33) Biasana si iperdiateken kita eme kai si tangtangna ikataken Gabriel. Ikatakenna maka Jesus igelari pagi “Anak Dibata Si Meganjangna.” Tapi inubuatken Gabriel ka maka Jesus “jadi Raja” pagi. Emaka banci saja tersungkun-sungkun kita kai nge si iukuri Maria sanga ipeseh Gabriel berita e. Iakapna nge maka Jesus me si nggantiken Raja Herodes, ntah pe nggantiken salah sada penerusna, guna jadi penguasa bas Israel? Adi Jesus jadi raja, Maria dungna jadi nande raja, janah keluargana banci tading bas istana. Tapi bas Pustaka la lit ikataken maka isungkuni Maria kerna si e man Gabriel, janah la pernah sibaca maka ipindo Maria keduduken si istimewa bas Kerajan Dibata, bagi si ilakoken dua murid Jesus. (Mat. 20:20-23) Keterangen e erban kita reh tekna maka Maria e tuhu-tuhu diberu si meteruk ukur kel!

19-20. Menurut Jakup 1:22-25 ras 4:8, kai saja nge tujunta erlajar?

19 Ingetlah, tujunta si utama mpelajari Kata Dibata bage pe buku-bukuta eme gelah reh rembakna kita ras Jahwe. Siteh ka ateta jelma si uga kin kita situhuna janah kai si perlu siperubahi gelah meriah ukur Dibata. (Baca Jakup 1:22-25; 4:8.) Emaka sope erlajar, sipindolah kesah si badia Jahwe. Pindolah gelah isampatiNa kita ndatken melala manpaat arah keterangen si nandangi sipelajari janah gelah siteh alu jelas kai si perlu siperubahi.

20 Mbera kita kerina bali bagi umat Dibata si setia si ikataken pemasmur enda, “Keriahenna eme matuhi Undang-Undang [Jahwe] dingen ngukurisa suari ras berngi. . . . Sangap ia i bas kerina pendahinna.”​—Msm. 1:2, 3.

LAGU 88 Ajari Aku Dalan-DalanNdu

^ par. 5 Referensi silang lit bas Kitab Suci Terjemahan Dunia Baru i tengah-tengah tiap halamenna. I je lit daptar ayat-ayat Pustaka si lit hubungenna ras ayat bas halamen e.

^ par. 16 Seh kel buena si ibereken Jahwe banta guna sitonton, sibaca, ras sipelajari. Artikel enda nampati kita nentuken kai si man pelajarenta. Ibahas ka kari kai saja si banci silakoken gelah melala sidat manpaat sanga erlajar pribadi.

^ par. 62 KETERANGEN GAMBAR: Iajari orang tua anak-anakna uga cara mpersiapken Pelajaren Sora Ermomo.

^ par. 64 KETERANGEN GAMBAR: Sekalak turang seninata sangana riset kerna salah sada penulis Pustaka eme Amos. Gambar-gambar si lit bas belakangna ncidahken kai saja si ibayangkenna sanga iukurina ayat-ayat Pustaka si ibacana.