Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 10

Engkai maka Lalap Aku Lenga Iperidiken?

Engkai maka Lalap Aku Lenga Iperidiken?

“Nusur me Pilipus ras pejabat e ku lau, jenari iperidiken Pilipus ia.”​—PERB. 8:38.

LAGU 52 Nggeluh guna Jahwe

SI IBAHAS *

1. Kai si ipilih Adam ras Hawa, janah kai akibatna?

MENURUTNDU, ise nge si arusna erban patoken kerna kai si benar ras si salah? Adam ras Hawa la tek man Jahwe ras patokenNa. Enda jelas teridah sanga ipan kalak e buah arah batang kayu si igelari batang kayu pemeteh kerna si mehuli ras si jahat. Ate kalak e erban patoken sendiri kerna si benar ras si salah. (Kej. 3:22) Ipilih kalak e lanai jadi teman Jahwe. Akibatna, lanai banci kalak e nggeluh rasa lalap. Kerina keturunenna pe erdosa janah dungna mate. (Rom. 5:12) Pilihen kalak e tuhu-tuhu erban susah.

Kenca tek pejabat Etiopia e man Jesus, mis atena iperidiken (Nen paragrap 2-3)

2-3. (a) Kai si ilakoken pejabat Etiopia sanga Pilipus erberita man bana? (b) Kai saja pasu-pasu si banci sidat adi kita iperidiken, janah penungkunen kai si man bahasenta?

2 Si ilakoken pejabat Etiopia sanga Pilipus erberita man bana beda kel ras perbahanen Adam ras Hawa. Iergai pejabat e kel kai si nggo ilakoken Jahwe ras Jesus emaka mis ia iperidiken. (Perb. 8:34-38) Sanga sibereken dirita man Dibata janah iperidiken kita bagi pejabat ndai, e buktina siergai kai si nggo ilakoken Jahwe ras Jesus man banta. Sibuktiken ka tek kita man Jahwe janah siakui maka Ia me si arusna erban patoken kerna kai si benar ras si salah.

3 Ukurilah pasu-pasu kai saja si banci sidat adi silayani Jahwe! Misalna, ibereken Jahwe pagi man banta kerina si nggo bene iban Adam ras Hawa, termasuk kesempaten nggeluh si rasa lalap. Perban tek kita man  Jesus Kristus, iampuni Jahwe kesalahenta janah banci bersih pusuh peratenta. (Mat. 20:28; Perb. 10:43) Kita pe jadi bagin keluarga Jahwe, eme umatNa si ikelengiNa, janah sidat pagi pasu-pasu si luar biasa. (Joh. 10:14-16; Rom. 8:20, 21) Tapi, lit denga kalak si lenga ngikuti contoh pejabat Etiopia ndai padahal nggo itandaina Jahwe janah nggo itehna pasu-pasu e. Kai si ngambati kalak e iperidiken? Janah uga carana ngatasi tantangen e?

PIGA-PIGA TANTANGEN SI NGAMBATI KALAK IPERIDIKEN

Tantangen si iadapi piga-piga kalak sope iperidiken

La Percaya Diri (Nen paragrap 4-5) *

4-5. Tantangen kai si iadapi anak muda si gelarna Avery ras Hannah?

4 La percaya diri. Orang tua Avery Saksi Jahwe. Bapakna melias kel janah sekalak pertua si mehuli. Tapi, mbiar denga Avery iperidiken. Engkai? Nina, “Mbiar aku la banci bagi bapakku ulina.” La akapna ia ngasup ndalanken tanggung jawap si banci saja ibereken man bana pagi. Nina ka, “Mbiar aku adi isuruh kari ertoto bas jelma si nterem, khotbah, ntah pe mandu perjumpan guna erberita.”

5 Hannah umurna 18 tahun. La kel ia percaya diri. Orang tuana ngelayani Jahwe. Tapi sangsi denga ia banci ntah lang ikutkenna patoken Jahwe. Engkai? Rendah kel iakapna bana. Mon-mon, perban kitik kel ukurna sengaja ilukaina dirina, dungna reh sedihna iakapna. Nina, “La pernah kukataken man ise pe kerna si e, man orang tuaku pe lang. Janah kuakap labo ate Jahwe aku jadi umatNa perban kai si nggo kulakoken.”

Pengaruh Teman (Nen paragrap 6) *

6. Kai si erbanca mbiar Vanessa iperidiken?

6 Pengaruh teman. Vanessa, si umurna 22 tahun ngataken, “Lit sada teman kompakku, nggo hampir sepuluh tahun kami erteman.” Tapi temanna e labo Saksi Jahwe janah la idukung temanna e ia iperidiken. Sedih Vanessa, nina, “Mesera ndatken teman, janah mbiar aku adi lanai kami erteman, lanai bo kari lit teman kompakku.”

Mbiar Gagal (Nen paragrap 7) *

7. Kai nge kebiaren sekalak anak muda si gelarna Makayla, janah ngkai?

7 Mbiar gagal. Umur Makayla lima tahun sanga abangna ipecat arah runggun. Sanga ia reh belinna, idahna uga suina iakap orang tuana perban perbahanen abangna e. Nina Makayla, “Adi nggo iperidiken kari aku, mbiar aku kuban kesalahen janah ipecat. Pasti reh suina iakap orang tuaku.”

Mbiar Itentang (Nen paragrap 8) *

8. Kai nge kebiaren sekalak anak muda si gelarna Miles?

 8 Mbiar itentang. Bapak Miles bage pe mamak tiri Miles ngelayani Jahwe, tapi mamakna lang. Nina, “Nggo 18 tahun aku tading ras Mamak. Mbiar aku ngataken man bana iperidiken ateku. Kuidah uga tanggapenna sange sanga Bapak jadi Saksi. Mbiar aku merawa kari ia bangku.”

CARA NGATASI TANTANGEN E

9. Kai nge hasilna adi ipelajarindu maka Jahwe e Dibata si tuhu-tuhu sabar ras perkeleng?

9 Engkai maka la ipilih Adam ras Hawa ngelayani Jahwe? Perban la tuhu-tuhu keleng ate kalak e Jahwe. Amin gia bage, ipediat Jahwe gedang umur kalak e gelah banci lit anak-anakna janah banci itentuken kalak e uga atena cara mpebelin anakna. Perban Adam ras Hawa la nggit iatur Jahwe, anak kalak e sintua munuh agina si la ersalah. Janah dungna reh lalana me kejahaten ras kalak si egois. Arah hasil keputusen Adam ras Hawa, teridah me maka motu kel kalak e. (Kej. 4:8; 6:11-13) Tapi lit cara Jahwe nelamatken kerina keturunen Adam ras Hawa si nggit ngelayani Ia. (Joh. 6:38-40, 57, 58) Jahwe e tuhu-tuhu sabar ras perkeleng. Adi reh buena ipelajarindu kerna si e, reh kelengna atendu Ia. La kam nggit ngikuti Adam ras Hawa janah iberekenndu dirindu man Jahwe.

Cara ngatasi tantangen e

(Nen paragrap 9-10) *

10. Engkai maka ngukuri Masmur 19:8 banci ngiahken kam ngelayani Jahwe?

10 Teruslah erlajar kerna Jahwe. Adi reh buena si ipelajarindu kerna Jahwe, reh tekna kam maka banci kam berhasil ngelayani Ia. Avery, si iceritaken ndai ngataken, “Percaya diri aku dungna kenca kubaca ras kuukuri alu mbages janji si lit bas Masmur 19:8.” (Baca.) Sanga idah Avery uga Jahwe nepati janji e, reh kelengna atena Ia. Kekelengen man Jahwe labo saja erban kita percaya diri, tapi banci ka erban kita terus ngelayani Ia  janah ngelakoken kai si ngena ateNa. Hannah, si iceritaken ndai ngataken, “Perban kubaca Pustaka janah kuban pelajaren pribadi, sadar aku maka adi kusakiti diriku, kusakiti ka Jahwe.” (1 Pet. 5:7) Ilakoken Hannah me kai si ipelajarina. (Jak. 1:22) Kai hasilna? Nina, “Sanga kugejapken kai gunana patuh man Jahwe, reh kelengna ateku Ia. Gundari tek aku maka terus nge itegu-tegu Jahwe aku sanga perlu aku penampatNa.” Dungna lanai ilukai Hanna dirina. Iberekenna dirina man Jahwe janah iperidiken.

(Nen paragrap 11) *

11. Kai si ilakoken Vanessa gelah datna teman si mehuli, janah kai pelajarenna?

11 Pentarlah kam milih teman. Vanessa, si ituriken ndai, dungna sadar maka iambati temanna ia ngelayani Jahwe. Emaka lanai Vanessa nggit erteman ras ia. Tapi labo e saja si ilakokenna. Erusaha ka ia gelah lit temanna si mbaru i bas runggun. Ikatakenna maka contoh Nuah ras keluargana erguna kel man bana. Nina, “Kalak si lit i sekeliling Nuah ras keluargana la ngkelengi Jahwe, tapi keluarga Nuah e tetap kompak.” Kenca Vanessa iperidiken, jadi perintis ia. Nina, “Perban merintis aku, dungna lit teman-temanku si mehuli, labo saja bas runggunku tapi bas runggun si deban pe.” Kam pe banci ndatken teman-teman si mehuli adi iusahakenndu kel ngelakoken tugas si ibereken Jahwe.​—Mat. 24:14.

(Nen paragrap 12-15) *

12. Kebiaren kai si la lit bas Adam ras Hawa, janah kai akibatna?

12 Seimbanglah kita i bas kebiarenta. Lit gunana adi bas inganna kita mbiar. Contohna, arus kita mbiar erban Jahwe la senang. (Msm. 111:10, Terjemahan Dunia Baru) Adi mbiar Adam ras Hawa erban Jahwe la senang, pasti la kalak e mberontak man Jahwe. Tapi mberontak kalak e. Kenca bage, terbuka me matana janah isadarina maka ia nggo erdosa. Dosa ras  kematen ngenca si iwariskenna man anak-anakna. Iteh kalak e maka nggo ilanggarna perentah Dibata, emaka mela ia tilanjang janah itutupina dagingna.​—Kej. 3:7, 21.

13-14. (a) Menurut 1 Petrus 3:21, ngkai maka la perlu kita mbiarsa mate? (b) Kai saja alasenta ngkelengi Jahwe?

13 Memang perlu kita mbiar erban Jahwe la senang, tapi la perlu kita mbiarsa mate. Enggo iban Jahwe cara gelah banci kita nggeluh si rasa lalap. Adi erdosa kita tapi tuhu-tuhu ertobat, iampuni Jahwe kita. IampuniNa kita perban tek kita man korban tebusen AnakNa. Salah sada cara si pentingna mbuktiken kinitekenta e eme sibereken dirita man Dibata janah iperidiken.​—Baca 1 Petrus 3:21.

14 Melala alasenta ngkelengi Jahwe. Sikelengi Ia labo saja perban melala iberekenNa si mehuli banta tiap wari, tapi perban iajariNa ka kita kebenaren kerna diriNa ras peratenNa. (Joh. 8:31, 32) IberekenNa runggun Kristen guna negu-negu ras ndukung kita. SampatiNa kita ngadapi masalahta. IberekenNa ka arapen guna nggeluh si rasa lalap bas keadan si sempurna i masa depan. (Msm. 68:20; Ket. 21:3, 4) Enggo melala si ilakoken Jahwe bukti kekelengenNa banta. Sanga siukuri si e kerina, reh kelengna ateta Ia. Janah adi keleng ateta Jahwe, banci seimbang kita i bas kebiarenta. Mbiar kita erban Jahwe sedih perban keleng kel ateta Ia.

15. Kai si erbanca Makayla lanai mbiar gagal?

15 Makayla, si iceritaken ndai, lanai ia mbiar gagal sanga iangkaina maka Jahwe nggit kel ngampuni. Nina, “Kuteh maka kerina kita la sempurna janah pasti erban salah. Tapi kuteh ka maka keleng ate Jahwe kita janah iampuniNa kita perban lit tebusen.” Perban keleng atena Jahwe, dungna nggit ia mereken dirina man Jahwe janah iperidiken.

(Nen paragrap 16) *

16. Kai si erbanca lanai Miles mbiar itentang?

16 Miles, si lenga iperidiken perban mbiar man mamakna, nungkun man pengawas wilayah mindo nasehat. Cerita Miles, nina, “Pengawas wilayah e pe sekalak ngenca orang tuana si Saksi. Iajarina aku kai si man katanken man Mamak gelah itehna maka aku sendiri nge si nggit iperidiken, labo perban isuruh-suruh Bapak.” La senang mamak Miles megi keputusenna. Tapi, keputusen Miles la berubah, janah dungna lawes ia arah rumah mamakna. Nina, “Kena kel ku pusuhku sanga kupelajari kerina si mehuli si  nggo ilakoken Jahwe man bangku. Sanga kuukuri alu mbages kerna korban tebusen Jesus, kuteh maka keleng kel ate Jahwe aku. E me si ngiahken aku mereken diriku man Jahwe janah iperidiken.”

ULA UBAH KEPUTUSENNDU

Adi iperidiken kita, sibuktiken maka siergai kai si nggo ilakoken Dibata man banta (Nen paragrap 17)

17. Kai si banci sibuktiken?

17 Sanga ipan Hawa buah batang kayu i Taman Eden, mberontak ia man Bapakna. Sanga ikut ka Adam, teridah maka la iergaina kerina si mehuli si nggo ilakoken Jahwe man bana. Kerina kita banci mbuktiken maka la kita bagi Adam ras Hawa. Ngata bujur kita kerna kerina si nggo ilakoken Jahwe man banta. Adi iperidiken kita, sibuktiken man Jahwe maka tek kita lit hakNa erban patoken kerna si benar ras si salah. Sibuktiken ka keleng ateta Bapakta janah tek kita man baNa.

18. Uga carana gelah berhasil kam ngelayani Jahwe?

18 Kenca iperidiken, arus terus silakoken kai si ngena ate Jahwe, labo kai si ngena ateta. E me si ilakoken jutan umat Dibata. Kam pe banci bage adi reh bagesna pengangkanndu kerna Kata Dibata eme Pustaka, adi ratur kam ergaul ras turang senina, janah adi semangat kam nceritaken kai si nggo ipelajarindu kerna Bapakta si perkeleng. (Heb. 10:24, 25) Sanga erban keputusen, begikenlah pedah Jahwe arah Pustaka ras organisasiNa. (Jes. 30:21) Pasti berhasil kerina si ilakokenndu.​—Kua. 16:3, 20.

19. Kai si arus terus iukurindu, janah ngkai?

19 Melala kel gunana itegu-tegu Jahwe. Adi terus iukurindu e, reh kelengna atendu Ia ras patokenNa. Dungna kai pe si itawarken Setan la banci erban kam ngadi ngelayani Jahwe. Bayangkenlah uga kegeluhenndu ribun tahun nari. Paksa si e, ngata bujur kel kam perban nggo iputuskenndu mbarenda iperidiken. E me keputusen si mehulina kel!

LAGU 28 Teman Jahwe

^ par. 5 Salah sada keputusen si pentingna i bas geluhndu eme iperidiken. Engkai maka penting kel keputusen e? Bas artikel enda lit kari jawapenna. Ibahas ka kari uga carana gelah kalak si atena iperidiken banci ngatasi tantangen si ngambati ia.

^ par. 56 KETERANGEN GAMBAR: La percaya diri: Sekalak anak muda mbiar mere komentar.

^ par. 58 KETERANGEN GAMBAR: Pengaruh teman: Sekalak anak muda Saksi si la mehuli temanna ergaul mela ia sanga idahna Saksi si deban.

^ par. 60 KETERANGEN GAMBAR: Mbiar gagal: Sanga ipecat abangna janah itadingkenna rumah, sekalak anak muda si diberu pe jadi mbiar gagal.

^ par. 62 KETERANGEN GAMBAR: Mbiar itentang: Mbiar sekalak anak muda ertoto i lebe-lebe mamakna si la Saksi.

^ par. 65 KETERANGEN GAMBAR: La percaya diri: Sekalak anak muda rajin pelajaren pribadi.

^ par. 67 KETERANGEN GAMBAR: Pengaruh teman: Sekalak anak muda Saksi iusahakenna gelah bangga ia jadi Saksi.

^ par. 69 KETERANGEN GAMBAR: Mbiar gagal: Iusahaken sekalak anak muda gelah ndeher ras Jahwe janah iperidiken.

^ par. 71 KETERANGEN GAMBAR: Mbiar itentang: Sekalak anak muda pang njelasken kinitekenna man mamakna si la Saksi.