Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 24

Perobahilah Carandu Rukur!

Perobahilah Carandu Rukur!

“Iruntuhken kami cara rukur si salah bage pe kerina si erlawanen ras pemeteh kerna Dibata.”​—2 KOR. 10:5.

LAGU 124 Setialah

SI IBAHAS *

1. Kai persinget Paulus man kalak Kristen si nggo ipilih ku surga?

NINA Rasul Paulus, “Ula nai kena ipengaruhi doni enda.” (Rom. 12:2) Kata-kata e itulis Paulus man kalak Kristen bas abad pertama. Engkai maka ipersingeti Paulus kalak si nggo jadi umat Dibata janah nggo ipilih ku surga?​—Rom. 1:7.

2-3. Kai saja si ilakoken Setan gelah lanai keleng ateta Jahwe? Kai si banci nampati kita ngambekken kerina si la mehuli si nggo rurat bas perukurenta?

2 Ikataken Paulus bage, perban lit piga-piga kalak Kristen si nggo ipengaruhi cara rukur doni enda. (Ep. 4:17-19) Enda pe banci kang terjadi man banta. Doni enda ikuasai Setan, janah igunakenna melala cara gelah lanai keleng ateta Jahwe. Misalna, adi lit sura-surata jadi kalak penting ntah pe kalak si terkenal, banci igunakenna e gelah sitadingken Jahwe. Selain si e, banci saja igunakenna piga-piga kebiasanta, kai si ipelajari kita i sekolah, bage pe kalak si lit i sekelilingta gelah seri carata rukur ras ia.

3 Banci nge siambekken kai si la mehuli si nggo rurat bas perukurenta? (2 Kor. 10:4) Perdiateken kai nina Paulus, “Iruntuhken kami cara rukur si salah bage pe kerina  si erlawanen ras pemeteh kerna Dibata. Itaban kami tiap perukuren gelah tiap perukuren jadi patuh man Kristus.” (2 Kor. 10:5) Emaka, alu penampat Jahwe banci siperobahi perukurenta si salah. Bali bagi tambar si banci nambari pinakitta, Pustaka pe banci nambari kita arah pengaruh doni Setan enda.

‘PEROBAHILAH PERUKUREN KENA’

4. Perubahen kai saja si nggo siban kenca erlajar Pustaka?

4 Cuba ukurindu perubahen kai saja si nggo ibanndu kenca erlajar Pustaka janah ipilihndu ngelayani Jahwe. Gelah banci ngelayani Jahwe, nterem kita si arus nadingken perbahanen si salah. (1 Kor. 6:9-11) Ngata bujur kel kita man Jahwe perban isampatiNa kita gelah banci berubah.

5. Menurut Roma 12:2, lit dua si arus silakoken. Kai saja e?

5 Tapi, ula min siakap lanai perlu siban perubahen. Sope kita iperidiken, lanai silakoken dosa si serius. Aminna pe bage, perlu kita terus erjuang ngelawan kai pe si banci erban kita ngelakoken dosa e mulihi. Uga carana? Nina Paulus, “Ula nai kena ipengaruhi doni enda. Tapi robahlah alu ngobah perukuren kena.” (Rom. 12:2) Emaka lit dua si arus silakoken. Si pertama, ‘ula nai kita nggit ipengaruhi’ doni enda. Si peduaken, arus ‘siperobahi’ perukurenta.

6. Kai si banci sipelajari arah kata-kata Jesus bas Matius 12:43-45?

6 Perubahen si imaksudken Paulus i jenda labo perubahen si teridah arah darat saja, tapi arus bas nari. (Nen kotak “ Tuhu-Tuhu Robah ntah Tempa-Tempa Saja?”) Arus siperubahi perukurenta,  perasanta, bage pe sura-surata. Emaka arus sisungkuni banta, ‘Arah darat saja nge teridah perubahen si kuban guna ngusih Kristus, ntah tuhu-tuhu nge aku berubah i bas pusuh ras perukurenku?’ Bas Matius 12:43-45, ikataken Jesus kai si arus silakoken gelah banci kita tuhu-tuhu robah. (Baca.) Pelajarenna eme labo bias ngambekken perukuren si salah saja ngenca, tapi arus ka siganti alu perukuren si ngena ate Dibata.

“CARA KENA RUKUR ARUS TERUS IUBAH”

7. Uga carana mperobahi carata rukur?

7 Banci nge siubah carata rukur ntah pe sipat-sipatta? Nina Pustaka, “Cara kena rukur arus terus iubah, janah arus ipake kena sipat-sipat si mbaru si iban menurut peraten Dibata janah sue ras kebenaren bage pe kesetian situhu-tuhu.” (Ep. 4:23, 24) Emaka, situhuna banci nge siubah carata rukur, tapi la mesukah. Selain arus silawan sura-sura si salah ras sitadingken perbahanen si salah, arus ka siubah ‘carata rukur.’ Ertina arus siperobahi sura-surata, sipat-sipatta, bage pe tujunta ngelakoken sada perbahanen. Perubahen enda arus terus silakoken.

8-9. Kai si banci sipelajari arah pengalamen sekalak turang seninata kerna mperobahi carata rukur?

8 Mari sibahas sada contoh kerna sekalak turang seninata. Mbarenda kasar kel ia jelmana, nggit ia minem-minem, janah lalap rubati. Tapi robah ia janah dungna iperidiken. Meriah akap tetanggana ngidah ia. Tapi la ndekah kenca iperidiken, iuji me ia. Bas sada berngi, lit sekalak dilaki si sangana mabuk reh ku rumahna. Ipanas-panasina ia gelah rubat. Tangtangna banci denga itahan turang seninata e emosina. Tapi sanga ihina dilaki e gelar Jahwe, mis ia merawa janah itinjuna ia. Engkai maka banci bage? Kenca nggo erlajar Pustaka banci ikendalikenna emosina, tapi carana rukur lenga iperobahina. Maksudna lenga ia robah bas nari.

9 Tapi turang seninata e la nyerah. (Kua. 24:16) Isampati pertua ia erban perubahen. Dungna ia pe banci jadi sekalak pertua. Bas sada berngi, iadapina ujin si mbarenda pernah iadapina. Lit sekalak dilaki si mabuk itinjuna atena sekalak pertua bas darat Bale Kerajan. Kai si ilakoken turang seninata ndai? Tenang ia ngadapisa, sopan ia ngerana man kalak si mabuk ndai, ipetenangna ia janah isampatina ia gelah mulih ku rumah. Engkai maka banci bage perbahanenna? Perban nggo iperobahina carana rukur. Enggo jadi kalak si tenang ia janah meteruk rukur. Perbahanenna e erban Jahwe ipuji.

10. Kai si arus silakoken gelah banci siperobahi carata rukur?

10 Perubahen e labo banci rempet terjadi. Banci saja perlu terus ‘siusahaken e asa ngasupta’ ertahun-tahun dekahna. (2 Pet. 1:5) Labo perban nggo ndekah kita ngelayani Jahwe maka pasti naring kita berubah. Arus siusahaken kel mperobahi carata rukur. Uga carana? Mari sibahas piga-piga.

MPEROBAHI CARATA RUKUR

11. Engkai maka ertoto banci nampati kita ngubah carata rukur?

11 Si pertama, ertoto. Banci siusih penulis masmur si ngataken, “Tepa min  ukur si meciho i bas aku o Dibata, jenari pelimbarui min pusuhku jadi pusuh si erkemalangen.” (Msm. 51:12) Arus siakui maka perlu siperubahi carata rukur janah sipindolah penampat Jahwe. Engkai maka banci kita tek pasti isampati Jahwe kita erban perubahen? Banci kita erlajar arah janji Jahwe nandangi kalak Israel si mekeng bas jaman Esekiel. Nina, “Kubereken me man bana pusuh si mbaru ras perukuren si mbaru . . . jenari Kusambari alu pusuh si erkemalangen man bangKu, [maksudna, pusuh si mis nggit itegu-tegu Dibata].” (Esek. 11:19) Adi kalak Israel pe isampati Jahwe gelah banci berubah, kita pe pasti isampatiNa.

12-13. (a) Menurut Masmur 119:59, kai si arus siukuri alu mbages? (b) Penungkunen kai saja si perlu sisungkuni banta?

12 Si peduaken, ngukuri alu mbages. Sanga sibaca Pustaka tiap wari, sibanlah waktu ngukurisa alu mbages. Alu bage banci siteh perukuren ras perasan kai si perlu siubah. (Baca Masmur 119:59; Heb. 4:12; Jak. 1:25) Arus sidarami perukuren ras perasanta si nggo ipengaruhi doni enda. Arus siakui kai saja kelemahenta janah siusahaken mperobahisa.

13 Banci sisungkuni banta, ‘Lit denga nge cian ate bas pusuhku?’ (1 Pet. 2:1) ‘Sombong nge aku erkiteken daerah asalku, pendidiken, bage pe ertaku?’ (Kua. 16:5) ‘Rendah nge kuakap kalak si deban si seran asangken aku ntah pe si la sada suku ras aku?’ (Jak. 2:2-4) ‘Meriah nge kuakap kai si itawarken doni Setan enda?’ (1 Joh. 2:15-17) ‘Meriah nge kuakap hiburen si lit perbahanen seks si salah ras kekerasenna?’ (Msm. 97:10; 101:3; Amos 5:15) Arah penungkunen-penungkunen enda banci siteh kai saja si perlu siperobahi. Adi banci siperubahi perukuren ras perasan si salah si nggo rurat bas kita, meriah me siban ukur Bapakta si i surga.​—Msm. 19:15.

14. Engkai maka seh kel pentingna milih teman si mehuli?

14 Si peteluken, pilihlah teman si mehuli. Sadar ntah lang kita, menukah kel kita ipengaruhi temanta. (Kua. 13:20) Bas sekolah ntah pe bas inganta erdahin, teremen temanta si perukurenna la ngena ate Dibata. Tapi teman-teman si mehuli lit bas runggun. I je banci kita siiah-iahen i bas “ncidahken kekelengen ras perbahanen si mehuli.”​—Heb. 10:24, 25.

‘KINITEKENTA ARUS NTEGUH’

15-16. Kai si ilakoken Setan guna ngubah perukurenta?

15 Iteh Setan maka mehuli pengaruh Kata Dibata ku perukurenta. Emaka terus iusahakenna ngubah perukurenta. Igunakenna cara rukur doni enda guna ncedai perukurenta janah erban kita ragu.

16 Igunaken Setan penungkunen si seri ras penungkunenna man Hawa bas Taman Eden. Nina, “Tuhu kin ikataken Dibata . . . ?” (Kej. 3:1) I bas doni si ikuasai Setan enda, rusur sibegi penungkunen si banci erban kita ragu. Misalna, ‘Tuhu kin la ngena ate Dibata hubungen sesama jenis? Tuhu kin ilarang Dibata kita ngerayaken ulang tahun ras perayan-perayan si deban? Tuhu kin ilarang Dibata kita transfusi dareh? Adi  Dibata e perkeleng, tuhu kin ilarangNa kita ergaul ras teman ntah pe keluargata si nggo ipecat?’

17. Adi lit penungkunen si erban kita ragu kerna kai si nggo sipelajari, kai si arus silakoken? Janah menurut Kolose 2:6, 7, kai hasilna?

17 Arus kita tek nandangi kai si nggo sipelajari. Adi la sidarami jawapen penungkunen-penungkunen si penting kerna kai si nggo sipelajari, banci dungna kita ragu. Enda banci ncedai perukurenta bage pe kinitekenta. Adi bage, kai si perlu silakoken? Ikataken bas Pustaka maka arus siubah perukurenta, gelah banci sibuktiken ‘peraten Dibata e mehuli, sempurna, janah erban Ia senang.’ (Rom. 12:2) Adi ratur kita erlajar, banci sibuktiken man dirita maka benar kap kai si nggo sipelajari arah Pustaka. Alu bage, tuhu-tuhu kita tek maka benar kap patoken-patoken si iban Jahwe. Dungna, bali bagi batang kayu si mbages uratna, ‘kinitekenta pe banci mbages uratna janah nteguh.’​—Baca Kolose 2:6, 7.

18. Kai saja si banci silakoken guna ngelawan pengaruh doni Setan enda?

18 Kita ngenca si banci erban kinitekenta nteguh, labo kalak si deban. Emaka teruslah siperubahi carata rukur. Teruslah ertoto gelah isampati Jahwe kita alu kesahNa si badia. Teruslah pereksa janah ukuri alu mbages uga perukuren ras sura-suranta. Daramilah teman si mehuli si banci nampati kita mperobahi perukurenta. Alu bage, banci silawan pengaruh doni Setan enda, janah banci siruntuhken “cara rukur si salah bage pe kerina si erlawanen ras pemeteh kerna Dibata.”​—2 Kor. 10:5.

LAGU 50 Kubereken Geluhku man Jahwe

^ par. 5 Biasana carata rukur ipengaruhi piga-piga kebiasanta, kai si ipelajari kita i sekolah, bage pe kalak si lit i sekelilingta. Banci jadi lit perukuren si salah si nggo rurat bas kita. Bas artikel enda, sipelajari kari uga carana ngambekken perukuren si salah si lit bas kita.