Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Tuhu-Tuhu nge Jesus Mate man Bangku?

Tuhu-Tuhu nge Jesus Mate man Bangku?

I BAS Pustaka, banci sibaca kerna perasan umat Dibata si setia si ‘seri perasanna ras kita.’ (Jak. 5:17) Misalna, banci siangkai uga perasan Paulus arah kata-katana bas Roma 7:21-24, “Sanga kulakoken ateku kai si benar, kai si la mehuli lit i bas aku. . . . Andiko, uga narilah pe aku enda!” Adi sangana kita erjuang ngelawan kelemahenta sendiri, terapuli kel kita perban Paulus pe erjuang ka nge.

Ituriken Paulus ka uga perasanna. Nina, ‘Anak Dibata ngkelengi aku janah ngkorbanken dirina guna aku.’ (Gal. 2:20) Tek kel Paulus kerna si e. Bage nge penggejapenndu? Mungkin labo lalap bage.

Adi kitik denga ukurta perban kesalahenta si mbarenda, mon-mon la kita tek maka keleng ate Jahwe kita janah nggo ialemiNa kita. Selain si e, banci saja mesera ka siakap tek maka situhuna korban tebusen Jesus nggo iberekenna man banta. Ate Jesus tek kita maka korban tebusen iberekenna man banta sekalak-sekalak. Tuhu kin bage? Adi tuhu, uga carana gelah tek kita? Mari sibahas dua penungkunen e.

PERUKUREN JESUS KERNA KORBAN TEBUSEN SI IBEREKENNA

Ate Jesus gelah tek kita maka korban tebusenna e iberekenna man banta sekalak-sekalak. Ja nari banci siteh? Perdiateken kai si terjadi bas Lukas 23:39-43. Sekalak dilaki ipakuken i sebelah tiang siksan Jesus. Ngaku ia maka pernah ilakokenna kejahaten. Pasti seh kel parahna kejahaten si ilakokenna emaka iukum mate ia bas tiang siksan. Mbiar kel dilaki e, emaka ikatakenna man Jesus, “Inget min aku sanga kam masuk ku Kerajanndu.”

Kai si ilakoken Jesus? Bayangken uga suina akap Jesus sanga inenna atena dilaki e. Amin gia sangana ia suin, tetap ia cirem janah iapulina dilaki e. Nina, “Situhuna kukataken bandu wari enda: Kam ras aku i Pardis pagi.” Situhuna banci nge ikataken Jesus saja man dilaki e maka “Anak manusia reh . . . [guna] mereken kegeluhenna selaku tebusen jadi penukar man nterem jelma.” (Mat. 20:28) Tapi la ikataken Jesus bage. Alu manjar-anjar ikatakenna man dilaki e maka korban tebusen pe ibereken ka nge man bana. Lembut ia ngerana janah igunakenna kata “kam” ras “aku.” Ikatakenna ka maka dilaki e nggeluh pagi bas pardis i doni.

Jelas me, ate Jesus tek min dilaki e maka korban tebusen pe ibereken ka nge man bana. Padahal, penjahat e lenga sempat ngelayani Dibata. Emaka, bayangken uga perasan Jesus nandangi kalak Kristen si nggo iperidiken janah nggo ngelayani Dibata. Pasti ate Jesus gelah tek ia maka Jesus pe mate guna bana. Emaka, amin gia mbarenda pernah silakoken dosa, kai si banci silakoken gelah tuhu-tuhu kita tek maka korban tebusen Kristus erguna man banta sekalak-sekalak?

 ENGKAI MAKA TEK PAULUS?

Perban ibereken Jesus man Paulus tugas erberita, tek Paulus maka Jesus pe mate guna bana. Ijelasken Paulus, “Bujur kukataken man Kristus Jesus Tuanta, si nggo mereken kuasa man bangku, erkiteken ianggapna aku setia alu mereken tugas pelayanen enda man bangku, aminna pe mbarenda aku tukang hina, tukang niksa, janah sombong.” (1 Tim. 1:12-14) Tugas si ialoken Paulus arah Jesus erban tek Paulus maka mekuah ate Jesus ia, keleng atena ia, janah tek Jesus man bana. Man banta pe ibereken Jesus tugas guna mberitaken berita si meriah. (Mat. 28:19, 20) Banci nge tugas e erban kita tek maka Jesus mate man banta sekalak-sekalak?

Albert, si mbaru denga mulihken ku Jahwe kenca 34 tahun ipecat, ngataken, “Rusur kuinget dosaku. Tapi sanga erberita aku, kugejapken maka enda tugas si ibereken Jesus man bangku, bali bagi si iberekenna man Paulus. Reh riahna kuakap janah nggo positip perukurenku kerna geluhku ras masa depanku.”​—Msm. 51:5.

Sanga iajarkenndu kebenaren man kerina kalak, petetap ukurna maka mekuah janah keleng ate Jesus ia

Sope iteh Allan kebenaren, kasar kel ia janah jahat kel jelmana. Nina, “Kuukuri denga lalap akibat perbahanenku si la mehuli mbarenda man kalak si deban. Mon-mon, stres kel aku. Tapi, ngata bujur kel aku man Jahwe sebap iberekenNa denga kesempaten man kalak perdosa bagi aku guna ikut erberita. Sanga kuidah ialoken kalak berita si meriah, sadar aku maka seh kel ulina Jahwe e janah perkeleng. Kugejapken maka igunaken Jahwe aku nampati kalak si bagi aku mbarenda.”

Sanga kita erberita, silakoken janah siukuri kai si mehuli. Enda erban kita tek maka mekuah ate Jesus kita, keleng atena kita, janah tek ia man banta.

BELINEN KAP JAHWE ASANGKEN PUSUHTA

Ope lenga doni Setan enda ikernepken, banci saja salah lalap siakap banta perban dosanta mbarenda. Kai si banci nampati kita ngelawan perasan e?

Jean rusur salah akapna bana perban munapik ia sanga nguda denga. Nina, “Meriah ukurku perban kuteh maka ‘belinen kap Dibata asangken pusuhta.’” (1 Joh. 3:19, 20) Kita pe banci terapuli perban siteh iangkai Jahwe ras Jesus maka kita erdosa. Ingetlah, ibereken Jahwe ras Jesus korban tebusen perban keleng atena kita, janah iberekenna e labo man kalak si sempurna, tapi man kalak si erdosa si nggit robah.​—1 Tim. 1:15.

Emaka, perlu siukuri alu mbages kai si nggo ilakoken Jesus man manusia si la sempurna. Perlu ka siusahaken asa ngasupta ndalanken tugas erberita si ibereken Jesus. Alu bage, banci kita tek maka Jesus pe mate guna banta. Janah bali bagi Paulus, banci ka sikataken, ‘Jesus ngkelengi aku janah ngkorbanken dirina guna aku.’