Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 28

Teruslah Layani Jahwe Amin Gia Ilarang Pemerentah Kita

Teruslah Layani Jahwe Amin Gia Ilarang Pemerentah Kita

“La terngadiken kami ngerana kerna kai si nggo idah kami ras si ibegi kami.”​—PERB. 4:19, 20.

LAGU 122 Paguhlah Kita!

SI IBAHAS *

1-2. (a) Engkai maka lanai ateta mamang adi ilarang pemerentah kita? (b) Kai si man bahasenta bas artikel enda?

I BAS tahun 2018, lebih 223.000 perberita si tading bas negeri-negeri si ngelarang ntah pe si mbatasi pendahinta. Lanai ateta mamang. Bagi si nggo sibahas bas artikel si lewat, kalak Kristen situhu-tuhu pasti isiksa. (2 Tim. 3:12) La soal ja pe kita tading, banci rempet ilarang pemerentah kita ngelayani Jahwe, Dibatata si perkeleng.

2 Bicara ilarang pemerentah kita ngelayani Jahwe, banci saja tersungkun-sungkun kita, ‘Lanai nge keleng ate Dibata kami maka pediatNa kami ianiaya? Lanai nge kami banci ngelayani Jahwe perban nggo ilarang? Arus nge aku pindah ku negeri si deban si bebas ngelayani Jahwe?’ Bas artikel enda, sibahas kari penungkunen-penungkunen e. Sibahas ka kari uga carana gelah banci kita terus ngelayani Jahwe amin gia ilarang, janah sibahas ka kai si la banci silakoken.

LANAI NGE KELENG ATE DIBATA KITA ADI KITA IANIAYA?

3. Menurut 2 Korinti 11:23-27, kai saja si iadapi Paulus? Janah kai pelajarenna banta?

3 Adi ilarang pemerentah kita, banci saja siakap lanai keleng ate Dibata kita. Tapi ingetlah, sanga kita ianiaya, labo ertina la senang Jahwe ngenen kita. Contohna Rasul  Paulus, keleng kel ate Dibata ia. Ibereken man bana tugas guna nulis 14 surat si lit bas Kitap-Kitap Junani Kristen janah ia pe terpilih jadi rasul man bangsa-bangsa. Aminna pe bage, rusur kang ia ianiaya. (Baca 2 Korinti 11:23-27.) Arah pengalamen Paulus, siteh maka mon-mon ipediat Jahwe umatNa si setia ianiaya.

4. Engkai maka segat ate kalak kita?

4 Ikataken Jesus ngkai maka kita ianiaya. Nina segat ate kalak kita perban la kita bagin doni enda. (Joh. 15:18, 19) Adi kita ianiaya, labo ertina la ngena ate Jahwe kita. Tapi e bukti maka nggo silakoken kai si benar!

LANAI NGE BANCI SILAYANI JAHWE ADI KITA ILARANG?

5. Ngasup nge manusia mpengadi kita ngelayani Jahwe? Ban contohna.

5 La lit manusia si banci mpengadi kita ngelayani Jahwe, Dibata Si Madakuasa. Enggo melala si erusaha ngelakokenca tapi gagal. Contohna sanga Perang Doni II, isiksa pemerentah kel umat Dibata bas melala negeri. Pendahin Saksi-Saksi Jahwe ilarang Nazi i Jerman bage pe pemerentah Australia, Kanada, ras negeri-negeri si debanna. Tapi kai si terjadi? Tahun 1939 sanga perang imulai, lit 72.475 perberita i sebelang doni. Tapi bas tahun 1945 sanga perang nggo ngadi, lit 156.299 perberita, lebih dua kali lipat tambahna. Enda bukti maka ipasu-pasu Jahwe umatNa!

6. Kai hasilna adi kita ianiaya? Ban contohna.

6 Adi ianiaya kita, labo kita reh biarna ngelayani Jahwe tapi reh semangatna ka kita. Misalna, lit sada keluarga si kitik denga anakna si tading bas negeri si pendahinta ilarang i je. La kalak e mbiar, malahen jadi perintis biasa ia duana. Gelah banci merintis, ngadi ndeharana arah pendahin si galang gajina. Nina perbulangenna, perban lit pelarangen, nterem kalak dungna tersungkun-sungkun kerna Saksi Jahwe. Dungna, nterem kalak si nggit erlajar Pustaka. Selain si e, ikataken sekalak pertua bas negeri e maka nterem turang seninata si mbarenda lanai pernah reh ku perpulungen, dungna mulihken ia reh janah ikut erberita.

7. (a) Kai si banci sipelajari arah Imamat 26:36, 37? (b) Kai nge si ilakokenndu pagi adi kita ilarang?

 7 Tujun musuh-musuhta ngelarang kita eme gelah mbiar kita ngelayani Jahwe. Selain si e, banci jadi isebarken kalak e tuduhen palsu kerna kita, daramina ja rumahta, ibabana kita ku pengadilen, ntah pe ipenjarakenna kita. Ate kalak e gelah mbiar kita perban nggo berhasil ia menjaraken piga-piga turang seninata. Tapi adi mbiar kita man kalak e, banci dungna lanai kita semangat ngelayani Jahwe ntah pe banci ka sitadingken Ia. Adi terus kita mbiar, seri kita ras kalak si ikataken bas Imamat 26:36, 37. (Baca.) Pasti la ateta seri ras kalak si bage. Emaka, teklah kita man Jahwe janah ula kita gentar. (Msm. 27:1) Ertotolah kita mindo penampatNa. Perban idukung Dibata kita, tek kita maka pemerentah si hebatna kel pe la ngasup ngambati kita terus ngelayani Dibata.​—Heb. 13:6.

ARUS NGE PINDAH KU NEGERI SI DEBAN?

8-9. (a) Keputusen kai si arus iban kalak Kristen man dirina ntah pe man keluargana? (b) Uga carana gelah banci siban keputusen si mehuli?

8 Adi bas inganta tading ilarang pemerentah kita ngelayani Jahwe, banci saja tersungkun-sungkun kita perlu ntah lang pindah ku negeri si bebas ngelayani Jahwe. Arus kita si erban keputusen e, ula kalak si deban. Sope erban keputusen, banci sipelajari lebe kai si ilakoken kalak Kristen bas abad pertama sanga kalak e ianiaya. Misalna, kenca Stepanus ibenteri alu batu ngayak mate, pindah me murid-murid i Jerusalem ku Judea ras Samaria janah seh ka ku Punike, Kiprus, bage pe Antiokia. (Mat. 10:23; Perb. 8:1; 11:19) Banci ka kita erlajar arah Paulus. Sanga lit penganiayan, la ia pindah arah daerah si dahin erberita ilarang i je. Tetap ia erberita janah ipegegehina turang senina bas daerah-daerah si ngadapi penganiayan e.​—Perb. 14:19-23.

9 Kai si banci sipelajari je nari? Kepala keluarga arus erban keputusen kerna perlu ntah lang pindah ku negeri si deban. Sope erban keputusen, arus itotokenna lebe janah manjar-anjar iukurina situasi keluargana bage pe kai untung ras rugina adi pindah kalak e. Kerina kita arus “maba babanna sendiri.” (Gal. 6:5) Ula ka sihakimi kalak si deban kerna keputusenna.

UGA KITA BANCI NGELAYANI JAHWE AMIN GIA ILARANG?

10. Petunjuk kai si ibereken kantor cabang ras pertua-pertua pagi?

10 Uga carana gelah banci kita terus ngelayani Jahwe amin gia ilarang? Ibereken kantor cabang pagi petunjuk-petunjuk man pertua kerna uga carana ndatken publikasi, uga carana pulung, bage pe uga carana erberita. Bicara la pe pagi banci ihubungi kantor cabang pertua, pasti isampati pertua kam bage pe kerina si lit bas runggun gelah terus ngelayani Jahwe. Pasti iberekenna pagi petunjuk si sentudu ras Pustaka bage pe publikasinta.​—Mat. 28:19, 20; Perb. 5:29; Heb. 10:24, 25.

11. (a) Engkai banci kam tek maka lalap pagi lit kai si iperlukenndu gelah banci tetap paguh kinitekenndu? (b) Kai si banci ilakokenndu gelah tetap pagi lit Pustaka ras publikasindu?

11 Erjanji Jahwe maka pasti isikapkenNa kerina si iperluken umatNa gelah banci  tetap paguh kiniteken kalak e. (Jes. 65:13, 14; Luk. 12:42-44) Emaka ula kam sangsi maka pasti isikapken organisasi kai si iperlukenndu gelah banci kam tetap setia. Tapi arus ka lit si iusahakenndu. Sanga ilarang pagi kita, daramilah ingan si cocok guna mbuniken Pustaka bage pe publikasinta, la soal bahan e tercetak ntah pe elektronik. Ula tadingken bahan-bahan e bas ingan si menukah idah kalak. Siusahakenlah asa ngasupta gelah banci tetap paguh kinitekenta.

Perban isampati Jahwe kita, la kita mbiar reh ku perpulungen (Nen paragrap 12) *

12. Uga cara pertua ngaturken perpulungen gelah ula kalak curiga?

12 Uga kerna perpulungen? Iaturken pertua pagi uga carana pulung tapi la erban kalak curiga. Banci saja iaturkenna kari gelah kita pulung bas kelompok-kelompok kitik. Ntah pe banci ka rusur igantina waktu ras ingan perpulungen. Gelah banci tetap aman, ula megangsa kita ngerana sanga reh ntah pe mulih perpulungen. Banci saja peruista pe perlu sisesuaiken gelah ula kalak curiga.

Amin pe ilarang pemerentah kita, terus kita erberita (Nen paragrap 13) *

13. Kai si banci sipelajari arah turang seninata bas daerah bekas Uni Soviet?

13 La seri situasi bas tiap negeri. Lit si bebas denga erberita, tapi lit ka si arus erbuni-buni. Tapi, perban keleng ateta Jahwe janah meriah siakap mberitaken Kerajan Dibata, pasti sidarami cara gelah banci erberita. (Luk. 8:1; Perb. 4:29) Kerna dahin erberita Saksi-Saksi Jahwe bas daerah bekas Uni Soviet, ikataken ahli sejarah Emily B. Baran, “Sanga ilarang pemerentah Saksi-Saksi Jahwe erberita, terus kalak e erberita man tetanggana, temanna erdahin, bage pe teman-temanna. Akibatna ipenjaraken kalak e, tapi i je pe erberita ka ia.” Amin gia turang seninata ilarang bas daerah bekas Uni Soviet, tetap kalak e erberita. Emaka, adi bas negarandu pe dahin erberita ilarang, mbera usihndu turang seninata e!

SI LA BANCI SILAKOKEN

Arus siteh ndigan waktuna sinik (Nen paragrap 14) *

14. Persinget kai si lit bas Masmur 39:2?

14 Ula bocorken rahasia. Sanga kita ilarang pagi, arus siteh ndigan waktuna “sinik.” (Peng. 3:7) Lit informasi si la banci sikataken, misalna gelar turang seninata, inganta pulung, carata erberita, bage pe uga carana gelah banci sidat publikasi. Informasi enda la banci sikataken man kalak si erdahin bas pemerentah. Janah la ka banci sikataken man teman-temanta, bage pe keluarganta si tading bas negaranta ntah pe negara si deban, la soal ia Saksi ntah lang. Adi sibocorken informasi e, banci bahaya turang seninata.​—Baca Masmur 39:2.

15. Kai si ate Setan terjadi bas umat Dibata? Janah uga carana gelah ula kita kena jebakenna?

 15 Ula pediat masalah si sepele erban kita lanai ersada. Iteh Setan adi lit perpecahen bas sada rumah, pasti rumah e la banci ertahan. (Mrk. 3:24, 25) Terus iusahaken Setan gelah lit perpecahen bas umat Dibata. Ate Setan gelah la kita siangkan janah dungna lupa kita maka situhuna ia nge imbangta.

16. Kai si banci siusih arah Turang Seninata Gertrud Poetzinger?

16 Kalak Kristen si nggo melala kel pe pengalamenna arus hati-hati. Perdiateken dua turang seninata si diberu si ipilih ku surga si gelarna Gertrud Poetzinger ras Elfriede Löhr. Ipenjaraken kalak e ras turang seninata si diberu si debanna bas kamp konsentrasi Nazi. Sanga khotbah Elfriede mpegegehi senina-seninana, cian ate Gertrud ia. Tapi dungna mela Gertrud janah ertoto ia man Jahwe mindo penampat. Bas pudi wari ikatakenna, “Arus kita nggit ngakui kelebihen kalak si deban, misalna beluhen ia asangken kita ntah pe buen tanggung jawapna.” Kai si erbanca maka nggo bene cian atena? Rusur iukuri Gertrud sipat-sipat mehuli Elfriede. Dungna banci ka ia kompak duana. Ibebasken kalak e arah kamp konsentrasi janah terus setia ngelayani Jahwe ngasa idungina kegeluhenna i doni. Adi siusahaken kel ndungi masalahta ras turang seninata, banci kita terus ersada.​—Kol. 3:13, 14.

17. Engkai maka arus terus siikutken petunjuk arah organisasi Jahwe?

17 Teruslah ikutken petunjuk. Adi terus siikutken petunjuk arah pertua, banci kita la kena masalah. (1 Pet. 5:5) Contohna, bas sada negeri si ngelarang pendahinta, ikataken pertua maka la banci sibereken oge-ogenta man kalak sanga silakoken kesaksin si la resmi. Tapi, lit sekalak perintis si la ikutkenna petunjuk e. Kai akibatna? La ndekah kenca perintis e ras piga-piga turang seninata dung erberita, ijumpai polisi kalak e. Kepeken lit petugas arah pemerentah si mperdiateken kalak e janah ipepulungna oge-ogen si nggo ibagiken ndai. Kai si banci sipelajari je nari? Arus terus siikutken petunjuk arah organisasi aminna pe kurang siakap pasna. Pasti meriah ukur Jahwe adi nggit kita kerja sama ras turang seninata si nggo ipilihNa guna minpin kita.​—Heb. 13:7, 17.

18. Engkai maka ula siban peraturen si la perlu?

18 Ula ban peraturen si la perlu. Adi  iban pertua peraturen-peraturen si la perlu, banci mesera akap turang senina ngikutkenca. Ikataken Turang Seninata Juraj Kaminský kai si terjadi sanga pelarangen i daerah bekas Cekoslowakia, “Kenca melala pertua itangkap, piga-piga turang senina si la itangkap si ertanggung jawap bas runggun bage pe wilayah mulai erban peraturen-peraturen si la perlu. Ikatakenna man perberita kai si arus ilakoken kalak e ras si la banci ilakokenna.” La pernah isuruh Jahwe kita erban peraturen man turang seninata. Kalak si erban peraturen si la perlu labo nampati turang seninana, tapi erkuasa atena nandangi kiniteken kalak e.​—2 Kor. 1:24.

TERUSLAH LAYANI JAHWE KAI PE SI TERJADI

19. Menurut 2 Kronika 32:7, 8, ngkai maka banci kita tetap pang la soal kai pe si ilakoken Setan?

19 La pernah latih akap musuhta, Setan si Iblis, nganiaya umat Jahwe si setia. (1 Pet. 5:8; Ket. 2:10) Iusahaken Setan ras pengikutna gelah la kita bebas ngelayani Jahwe. Tapi la kita perlu mbiar janah teruslah silayani Jahwe! (Ul. 7:21) Jahwe kap ras kita, janah pasti isampatiNa kita sanga kita ilarang.​—Baca 2 Kronika 32:7, 8.

20. Kai tekadndu?

20 Mbera seri tekadta ras turang seninata bas abad pertama. Ikatakenna man pemerentah bas jamanna, “Cuba ukuri kena, apai nge iakap Dibata ulin, patuh man kena ntah man Dibata? Tapi kami, la terngadiken kami ngerana kerna kai si nggo idah kami ras si ibegi kami.”​—Perb. 4:19, 20.

LAGU 73 Bahanlah Kami La Mbiar

^ par. 5 Kai si arus silakoken adi ilarang pemerentah kita ngelayani Jahwe? Bas artikel enda sibahas kari kai si arus silakoken ras kai si la banci silakoken sanga kita ilarang, gelah banci terus silayani Dibata.

^ par. 59 KETERANGEN GAMBAR: Kerina gambar bas artikel enda eme kerna Saksi-Saksi si lit bas negeri si ngelarang pendahinta. Turang seninata pulung bas kelompok kitik bas sada gudang.

^ par. 62 KETERANGEN GAMBAR: Sekalak turang seninata (sebelah kiri) sangana ngerana-ngerana ras sekalak diberu gelah banci iceritakenna kerna Jahwe.

^ par. 64 KETERANGEN GAMBAR: Sekalak turang seninata tetap ia sinik sanga isungkuni polisi kerna runggun.