Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 29

‘Laweslah, Banlah Kalak Jadi Murid’

‘Laweslah, Banlah Kalak Jadi Murid’

“Laweslah, banlah kalak i bas kerina bangsa jadi murid-muridku.”​—MAT. 28:19.

LAGU 60 Kegeluhen Rasa Lalap man Bana

SI IBAHAS *

1-2. (a) Bagi si ikataken Jesus bas Matius 28:18-20, kai tugas utama runggun Kristen? (b) Kai si man bahasenta bas artikel enda?

KENCA Jesus ipekeke, isuruhna murid-muridna gelah pulung bas sada deleng i Galilea. Pasti tertima-tima kel kalak e kerna kai si nandangi ikataken Jesus. (Mat. 28:16) Banci jadi i je me ‘icidahken Jesus dirina man lebih 500 kalak pengikutna bas sada ingan.’ (1 Kor. 15:6) Engkai maka isuruh Jesus murid-muridna gelah lawes njumpai ia i je? Ibereken Jesus atena tugas si penting man kalak e, “Laweslah, banlah kalak i bas kerina bangsa jadi murid-muridku.”​—Baca Matius 28:18-20.

2 Murid-murid si megiken kata-kata Jesus ndai dungna jadi bagin runggun Kristen bas abad pertama. Tugas utama runggun e eme gelah reh buena murid-murid Kristus. * Gundari nggo lebih seratus ribu runggun Kristen i sebelang doni, janah tugas utamana la berubah. Bas artikel enda, sibahas kari empat penungkunen: Engkai maka seh kel pentingna erban murid? Kai saja si perlu silakoken guna erban murid? Banci nge kita kerina ikut nampati bas dahin e? Janah, ngkai maka perlu kita sabar i bas erban murid?

 ENGKAI MAKA SEH KEL PENTINGNA ERBAN MURID?

3. Menurut Johanes 14:6 ras 17:3, ngkai maka seh kel pentingna erban murid?

3 Engkai maka seh kel pentingna erban murid? Perban murid Kristus ngenca si banci jadi teman Dibata. Selain si e, kalak si ngikutken Kristus banci reh ulina kegeluhenna gundari janah banci ka ia nggeluh rasa lalap bas wari si pepagi. (Baca Johanes 14:6; 17:3.) Enggo ibereken Jesus tanggung jawap si mbelin banta, tapi la banci silakoken dahin e alu gegehta saja. Ikataken Rasul Paulus maka ia ras turang seninana “teman erdahin Dibata.” (1 Kor. 3:9) Jelas me, amin gia la kita sempurna, banci kita erdahin ras Jahwe bage pe Jesus. Tuhu-tuhu luar biasa kel e!

4. Pelajaren kai si banci sidat arah pengalamen Ivan ras Matilde?

4 Adi sisampati kalak jadi murid Kristus, pasti meriah kel ukurta. Perdiateken pengalamen Ivan ras ndeharana eme Matilde i Kolombia. Erberita kalak e man sekalak dilaki si nguda denga si gelarna Davier. Nina Davier, “Robah nge teku, tapi la ku ngasup.” Davier sekalak petinju, narkoban, tukang mabuk, janah sada rumah ia ras rondongna eme Erika. Nina Ivan, “Dahi kami ia bas kutana si seh kel dauhna. Arus kami naik sepeda erjam-jam dekahna janah erkubang kel dalanna. Kenca erlajar Pustaka, nggo reh ulina sipat-sipat bage pe perbahanen Davier. Perban si e, ikut ka Erika erlajar Pustaka.” Dungna, lanai ipake Davier narkoba, lanai ia mabuk bage pe ertinju, janah erjabu ia ras Erika. Nina Matilde, “Sanga Davier ras Erika iperidiken bas tahun 2016, inget kami kai si pernah ikataken Davier, ‘Robah nge teku, tapi la ku ngasup.’ Meriah kel ukur kami janah naktak iluh kami.” Pasti la tanggung siakap riahna adi sisampati kalak jadi murid Kristus.

KAI SAJA SI PERLU SILAKOKEN GUNA ERBAN MURID?

5. Kai si pertama si arus silakoken guna erban murid?

5 Si pertama si arus silakoken guna erban murid eme ‘ndarami’ kalak si nggit erlajar kerna Jahwe. (Mat. 10:11) Adi erberita kita man kerina kalak kerna Jahwe, sibuktiken maka kita Saksi-Saksi Jahwe. Janah, adi sipatuhi perentah Kristus guna erberita, enda buktina kita kalak Kristen situhu-tuhu.

6. Uga carana gelah nggit kalak megiken kita?

6 Piga-piga kalak meriah akapna erlajar Pustaka, tapi nterem kalak si tangtangna bagi tempa la ermediate. Emaka arus siusahaken gelah tertarik kalak e. Sibanlah persiapen si mehuli gelah banci kita berhasil. Banci pilihndu topik si apai si menarik iakap kalak. Kenca si e, ukurindulah uga cara mpesehsa.

7. Kai si banci ikatakenndu guna mbenai percakapen? Janah ngkai maka penting sibegiken janah siergai pendapat kalak?

7 Contohna, banci katakenndu bagenda, “Enterem kalak bas doni enda mberat kel masalahna. Adi menurutndu, lit nge pemerentahen si banci ndungi kerina masalah e?” Kenca si e, banci bahasndu Daniel 2:44. Ntah, banci ka katakenndu bagenda, “Adi menurutndu, uga nge cara si mejilena bas ngajari anak?” Kenca si e bahas Ulangen 6:6, 7. Topik kai pe si ipilihndu, ukurilah kalak si megiken kam. Cuba ukuri kai manfaatna man kalak e adi ipelajarina kai nina Pustaka. Sanga ngerana ras kalak e, begikenlah janah  ergai pendapatna. Alu bage banci iangkaindu ia, janah ia pe nggit megiken kam.

8. Engkai maka arus terus siusahaken ndahi mulihi?

8 Sope nggit kalak erlajar Pustaka, banci saja arus piga-piga kali ia sidahi. Engkai maka bage? Perban banci saja la ia rumah ntah pe sibuk ia sanga kita reh ndahi ia. Selain si e, banci saja perlu piga-piga kali ia sidahi gelah nggit ia erlajar Pustaka ras kita. Ingetlah, sinuan-sinuan banci turah perban ratur isiram. Bage ka pe, banci reh kelengna ate sekalak jelma nandangi Jahwe ras Kristus adi ratur sibahas Kata Dibata ras ia.

BANCI NGE KITA KERINA IKUT NAMPATI ERBAN MURID?

Saksi-Saksi Jahwe i sebelang doni ikut ndarami kalak si nggit meteh kebenaren (Nen paragrap 9-10) *

9-10. Engkai maka kerina umat Jahwe ikut ndarami kalak si nggit jadi murid Kristus?

9 Kerina umat Jahwe ikut nampati i bas ndarami kalak si nggit jadi murid Kristus. Enda bali bagi ndarami sekalak anak si bene. Kai maksudna? Banci siukuri pengalamen enda. Lit sekalak anak dilaki bene si umurna telu tahun. Lit kira-kira 500 kalak si ikut ndarami ia. Kira-kira 20 jam kenca si e, dat me anak e bas juma. Kalak si berhasil ndatken anak e la nggit ipuji. Nina, “Labo aku ngenca si kerja keras, ratusen kalak nge si ikut ndaramisa.”

10 Enterem kalak si bali bagi anak si bene e. La lit arapen kalak e, emaka perlu sisampati. (Ep. 2:12) Lebih waluh juta Saksi Jahwe si ikut nampati i bas ndarami kalak si bage. Banci jadi lenga lit idatndu kalak si nggit erlajar Pustaka. Tapi perberita si deban si erberita bas daerah si seri ras kam, banci saja nggo idatna kalak si nggit erlajar kebenaren. Adi lit turang seninata si jumpa ras kalak si dungna jadi murid Kristus, kerina kita si ikut  nampati bas dahin e pasti ermeriah ukur.

11. Bicara lenga pe lit kalak si erlajar Pustaka ras kam, kai si banci ilakokenndu guna nampati erban murid?

11 Bicara lenga pe lit kalak si erlajar Pustaka ras kam, banci denga nge kam ikut nampati erban murid. Misalna, adi lit kalak si enda denga ia reh ku Bale Kerajan, mekacarlah kam janah alo-alolah ia. Adi bage banndu, buktikenndu me maka kita kalak Kristen situhu-tuhu. (Joh. 13:34, 35) Selain si e, banci sibere komentar sanga perpulungen. Amin gia gendek komentarta, tapi mehuli janah sopan kita mpesehsa, enda banci jadi usihen man kalak e. Banci ka iajakndu kalak si mbaru denga jadi perberita gelah ras-ras kena erberita. Sampati ia gelah beluh make Pustaka sanga ngajari kalak. Alu bage, isampatindu ia ngusih Kristus.​—Luk. 10:25-28.

12. Kalak si beluh saja nge ngenca si banci ngajari kalak gelah jadi murid? Jelasken.

12 Ula min siakap maka kalak si beluh ngenca si banci ngajari kalak jadi murid Jesus. Engkai maka bage? Mari siperdiateken pengalamen Faustina, si tading i Bolivia. Tangtangna kel ia jumpa ras Saksi Jahwe la ia beluh mbaca, tapi erlajar ia janah nggo beluh ia sitik-sitik. Gundari nggo iperidiken ia, janah meriah akapna ngajari kalak si deban. Lit lima kalak si erlajar Pustaka ras ia tiap minggu. Amin gia beluhen murid-muridna e mbaca asangken ia, nggo isampatina enem kalak ngayak iperidiken.​—Luk. 10:21.

13. Amin gia seh kel kita sibukna, kai saja nge gunana adi ikut kita erban murid?

13 Enterem kel Saksi Jahwe si seh kel sibukna perban melala tanggung jawapna. Amin pe bage, ibanna waktuna guna ngajari kalak kerna Pustaka, janah meriah kel ukurna ngelakokenca. Contohna Melanie si tading i Alaska. Sisada ia mpebelin anakna si diberu si umurna waluh tahun. Sibuk kel ia erdahin, janah arus ka iurusna bapakna si kena kanker. Ia ngenca Saksi bas kutana si seh kel dauhna. Lalap ia ertoto sope erberita gelah banci ia semangat aminna pe mbergeh kel i je. Merhat kel ia jumpa ras kalak si nggit erlajar Pustaka. Dungna jumpa ia ras Sara. Meriah kel akap Sara meteh maka lit kepe gelar Dibata. La ndekah kenca si e, nggit Sara erlajar Pustaka. Nina Melanie, “Tiap Jumat karaben, nggo ngalah kel kuakap. Tapi tetap aku lawes ras anakku gelah erlajar ras Sara. Gejapken kami kel gunana. Meriah kel akap kami sanga darami kami jawapen penungkunen Sara,  janah seh kel riahna akap kami ngidah ia jadi teman Jahwe.” Pang Sara ngadapi tentangen, itadingkenna gerejana, janah dungna iperidiken ia.

ENGKAI MAKA PERLU KITA SABAR I BAS ERBAN MURID?

14. (a) Engkai maka kalak si erban murid seri ras nelayan? (b) Kenca bacandu kata-kata Paulus bas 2 Timotius 4:1, 2, kai si atendu ilakokenndu?

14 Amin pe lenga lit datndu kalak si nggit jadi murid, teruslah darami. Ikataken Jesus maka kalak si erban murid seri ras nelayan. Arus ia sabar perban banci saja labo mis datna ikan. Biasana erdahin kalak e bas tengah berngi ntah pe pagi-pagi si lampas, janah mon-mon arus ia lawes ku ingan si ndauh. (Luk. 5:5) Perberita si meriah pe bage kang. Arus ia sabar ndarami murid i japa pe janah katawari pe. Engkai maka bage? Gelah banci ijumpaina terbuen jelma. Biasana, kalak si tutus atena erberita banci dungna ia jumpa ras kalak si nggit erlajar. Emaka, banci nge isesuaikenndu waktundu erberita ntah pe lawes kam ku ingan i ja kam banci jumpa ras terbuen jelma?​—Baca 2 Timotius 4:1, 2.

Sabarlah kam nampati kalak si erlajar Pustaka gelah banci itandaina Jahwe, keleng atena Ia, janah patuh man baNa (Nen paragrap 15-16) *

15. Engkai maka arus kita sabar sanga ngajari kalak kerna Pustaka?

15 Engkai maka arus kita sabar sanga ngajari kalak kerna Pustaka? Perban perlu siajari ia gelah iangkaina janah tek ia ajaren Pustaka. Sisampati ka ia gelah itandaina janah keleng atena Pengarang Pustaka eme Jahwe. Perlu siajari ia kai saja perentah Jesus man murid-muridna, janah siajari ka ia  uga cara ndalankenca bas kegeluhenna. Sanga mesera kapna ndalanken pedah Pustaka, arus kita sabar nampatisa. Lit kalak si piga-piga bulan saja pe nggo banci iperobahina perukuren ras kebiasanna, tapi lit ka si perlu waktu terdekahen.

16. Kai pelajaren si idatndu arah pengalamen Raúl?

16 Arah pengalamen sekalak utusen injil i Peru, banci siteh kai gunana adi kita sabar. Nina, “Lit kalak si erlajar Pustaka ras aku, gelarna Raúl. Nggo dung bahas kami dua buku. Tapi mesera denga iakapna ndalanken kai si ipelajarina. Lalap lit masalah bas jabuna, rusur denga ia cakap kotor, janah la iergai anak-anakna ia perban sipatna si la mehuli. Amin pe bage, terus ia reh ku perpulungen, emaka terus ka kudahi ia guna nampati ia ras keluargana. Lebih telu tahun kenca si e, dungna iperidiken ia.”

17. Kai si man bahasenta bas artikel seterusna?

17 Isuruh Jesus kita gelah ‘lawes erban kalak i bas kerina bangsa jadi murid-muridna.’ Sanga kita erberita, rusur kita jumpa ras kalak si beda kel kinitekenna ras kita. Piga-piga la ia ikut ku agama si apai pe janah lit ka si la tek maka Dibata e lit. Bas artikel seterusna, sibahas kari uga carana erberita man kalak si bage.

LAGU 68 Ngambur Benih

^ par. 5 Tugas utama kerina runggun Kristen eme nampati kalak gelah jadi murid Kristus. Bas artikel enda sibahas kari kai saja carana gelah banci silakoken tugas e.

^ par. 2 PENJELASEN: Murid Kristus labo ngenca mpelajari kai si iajarken Jesus. Tapi idalankenna kai si ipelajarina e. Iusahaken kalak e ngikutken Jesus ntah pe ngusih ia asa ngasupna.​—1 Pet. 2:21.

^ par. 52 KETERANGEN GAMBAR: Sekalak dilaki si lawes atena liburen ibuatna sada risalah bas bandara. Kenca si e, sanga nggo seh ia bas inganna liburen, idahna ka i je lit Saksi si sangana njaga gerai. Kenca ia nggo mulih, lit ka Saksi si erberita ku rumahna.

^ par. 54 KETERANGEN GAMBAR: Nggit dilaki e erlajar Pustaka janah dungna iperidiken ia.