Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 30

Carana Nampati Kalak si La Tek man Dibata

Carana Nampati Kalak si La Tek man Dibata

“Kai pe kulakoken guna erbage-bage jelma, gelah alu cara kai pe banci kuselamatken kalak e.”​—1 KOR. 9:22.

LAGU 82 Teridahlah Terangndu

SI IBAHAS *

1. Perubahen kai si terjadi bas melala negeri puluhen tahun terakhir enda?

RIBUN tahun dekahna, nterem kalak bas doni enda lit agamana. Tapi, puluhen tahun terakhir enda, nggo berubah keadanna. Gundari nggo reh buena kalak si la lit agamana. Janah, bas piga-piga negeri, teremen pendudukna si ngaku maka la lit agamana. *Mat. 24:12.

2. Engkai maka reh buena kalak si la lit agamana?

2 Engkai maka reh buena kalak si ngaku la lit agamana? * Banci saja lit si meriah-riah saja atena, deba masalahna saja ngenca iukurina. (Luk. 8:14) Lit ka si mbarenda eragama nge ia, tapi bas pudi wari lanai ia tek man Dibata. Lit ka si tek man Dibata, tapi agama e nggo ketadingen jaman iakapna, lanai erguna, janah la cocok ras ilmu pengetahuan ntah pe la masuk akal. Banci saja ibegina arah teman, guru, ntah pe bas berita si ngataken maka kegeluhen e lit perban evolusi. Tapi, jarang kel ibegi kalak e penjelasen kerna ngkai maka masuk akal tek man Dibata. Selain si e, lit ka si segat atena peminpin agama si merangap nandangi erta ras kekuasan. Janah bas piga-piga negeri, lit iban pemerentah peraturen si erban kalak lanai bebas nembah Dibata.

3. Kai tujun artikel enda?

3 Isuruh Jesus kita ‘erban kalak i bas kerina bangsa jadi murid-muridna.’ (Mat. 28:19) Kai si banci silakoken guna nampati kalak si la tek man Dibata gelah keleng atena Dibata janah jadi murid Kristus? Perlu siteh maka ialoken kalak ntah lang berita si meriah tergantung i ja ia ipebelin. Misalna,  kalak bas Eropa banci saja la seri tanggapenna ras kalak bas Asia. Engkai maka bage? Bas Eropa, nterem kalak nggo itehna kerna Pustaka janah pernah ibegina maka Dibata me si nciptaken kerina si nasa lit. Tapi bas Asia, teremen kalak si sitik ngenca itehna kerna Pustaka ntah pe lit ka si tuhu-tuhu la itehna. Janah bas piga-piga negeri i Asia, nterem kalak si la tek maka lit Pencipta. Tujun artikel enda gelah banci siajari kerina kalak gelah itandaina Jahwe, la soal janari asalna ntah pe kai si itekina.

TERUSLAH SAMPATI

4. Engkai maka banci tetap positip perukurenta?

4 Teruslah Positip Perukurenta. Tiap tahun, nterem kalak si la tek man Dibata dungna jadi Saksi Jahwe. Sope jadi Saksi, nggom mehuli lagu langkah kalak e janah ciga atena ngidah agama-agama si munapik. Tapi, lit ka si mbarenda tuhu-tuhu la mehuli lagu langkahna. Janah teremen si arus itadingkenna kebiasanna si la mehuli. Tek kita maka adi isampati Jahwe kita, banci kita jumpa ras kalak si “pusuh ras perbahanenna ngaloken kebenaren guna kegeluhen si rasa lalap.”​—Perb. 13:48; 1 Tim. 2:3, 4.

Sanga erberita, sesuaikenlah kata pengantarndu sanga jumpa ras kalak si la tek man Pustaka (Nen paragrap 5-6) *

5. Biasana, kai nge si erbanca nggit kalak megiken kita?

5 Mehulilah janah Erpengangka. Biasana, nggit kalak megiken kita labo perban kai si ipeseh kita, tapi perban carata mpesehsa. Meriah ukur kalak e adi mehuli kita, erpengangka, janah siperdiateken ia. La sipaksa gelah ibegikenna kita. Tapi, siusahaken gelah siangkai ngkai maka la kalak e tek man Dibata. Misalna, siteh maka lit si la senang ncakapken kerna agama ras kalak si lenga itandaina. Lit ka si aneh iakapna ntah pe la sopan adi sisungkuni ia kerna Dibata. Selain si e, lit si mela ia adi idah kalak ibacana Pustaka terlebih ka ras Saksi Jahwe. Kai pe alasen kalak e, perlu siusahaken ngangkai uga perasanna.​—2 Tim. 2:24.

6. Kai buktina maka isesuaiken Paulus cara ia erberita? Janah uga kita ngusihsa?

6 Sanga sigunaken kata “Pustaka,” “penciptan,” “Dibata,” ntah pe “agama,” banci saja lit si la senang. Kai si banci silakoken? Banci sisesuaiken carata ngerana man kalak e, bali bagi Rasul Paulus. Sanga ngerana ras kalak Jahudi, igunaken Paulus Pustaka. Tapi sanga ngerana ia i Areopagus man kalak Junani si meganjang sekolahna, la ikatakenna maka ikutipna kata-kata Pustaka. (Perb. 17:2, 3, 22-31) Uga carata ngusih Paulus? Adi jumpa kam ras kalak si la tek kerna Pustaka, mungkin ulin adi la langsung ikatakenndu maka kai si ipesehndu e bas Pustaka nari. Adi lit si la atena idah kalak ia mbaca Pustaka ras kam, banci ibukakenndu ayat-ayat alu cara si la teridahsa kel, misalna alu perangkat elektronik.

7. Menurut 1 Korinti 9:20-23, kai si arus silakoken guna ngusih Paulus?

7 Usahakenlah Ngangkaisa janah Nggitlah Megiken. Arus siusahaken ngangkai kai saja si mpengaruhi cara rukur kalak si ijumpai kita. (Kua. 20:5) Mari siperdiateken mulihi kai si ilakoken Paulus. Ipebelin ia bas lingkungen kalak Jahudi. Tapi, arus isesuaikenna dirina sanga erberita man kalak si la Jahudi, si la lit pemetehna kerna Jahwe ras Pustaka ntah pe si sitik ngenca pemetehna kerna si e. Banci saja kita pe perlu erban riset ntah pe sisungkun turang seninata bas runggun si nggo erpengalamen gelah banci lebih siangkai uga cara rukur ras perasan kalak si lit bas daerahta.​—Baca 1 Korinti 9:20-23.

8. Kai salah sada cara mbenaken percakapen kerna Pustaka?

8 Tujunta eme ndarami kalak “si nggit ngalo-ngalo” berita si ipeseh kita. (Mat. 10:11) Emaka, perlu sisungkun uga  pendapatna janah tutuslah ateta megikenca. Sekalak turang seninata i Inggris rusur isungkunina pendapat kalak kerna uga carana gelah perjabun banci ermeriah ukur, uga carana mpebelin anak, ntah pe kai si arus silakoken sanga lit si la adil man banta. Kenca ibegikenna kalak e, ikatakenna, “Menurutndu, erguna denga nge pedah enda si itulis menam 2.000 tahun si nggo lewat?” Kenca e, icidahkenna ayat si nggo isikapkenna bas HP-na, tapi la ikatakenna maka ayat e arah “Pustaka.”

SAMPATI KALAK NANDAI JAHWE

9. Uga carana nampati kalak si la meriah akapna ncakapken kerna Dibata?

9 Adi lit si la meriah akapna ncakapken kerna Dibata, banci sisampati ia nandai Dibata alu ncakapken kai si meriah iakapna. Contohna, nterem kalak si meriah akapna mperdiateken kai si lit bas alam. Emaka, banci sikataken, “Mungkin nggo tehndu maka kai si iban ilmuwan situhuna ngusih kai si lit bas alam. Misalna, kalak si erban mik situhuna ngusih rancangen cuping serangga, janah si erban kamera ngusih rancangen mata serangga. Menurutndu, banci nge rempet lit kerina si lit bas alam e, ntah lit si nciptakenca? Ntah, lit pendapatndu si deban?” Kenca sibegiken jawapenna, banci sikataken, “Sanga ipelajari ilmuwan cuping ras mata serangga, situhuna arah ise nge kalak e erlajar? Pas kuakap kai si itulis sekalak penulis mbarenda, nina, ‘Dibata kap si njadiken cupingta, banci kin Ia la erpemegi? Ia si njadiken matanta, banci kin Ia la erpengidah? . . . Ia nge jadi guru man kalak kerina.’ Melala ilmuwan si setuju kerna si e. Tek kalak e maka kerina si lit bas alam iciptaken Dibata.” (Msm. 94:9, 10) Kenca si e, banci siputarken sada video arah jw.org® bas bagin “Wawancara dan Pengalaman” bas seri artikel “Pendapat tentang Asal Mula Kehidupan.” (Nen bas PUBLIKASI > VIDEO.) Ntah pe banci iberekenndu buku Benarkah Kehidupan Diciptakan? ntah buku Asal Mula Kehidupan—Lima Pertanyaan yang Patut Direnungkan.

10. Uga carana mbenaken percakapen ras kalak si la nggit ncakapken kerna Dibata?

10 Enterem kalak gundari ngarapken masa depan si terulin. Tapi, nterem ka si mbiar ia doni enda ntah pe kerina manusia ikernepken pagi. Ikataken sekalak pertua keliling i Norwegia maka biasana kalak si la nggit ncakapken kerna Dibata meriah akapna ncakapken kerna keadan doni enda. Kenca iperkuankenna sekalak jelma,  biasana ikatakenna, “Menurutndu, uga nge pagi masa depanta? Banci nge pagi terulin iban ahli politik ntah pe ilmuwan? Ntah, lit nge kalak si deban si banci ngelakokenca?” Kenca ibegiken pertua keliling e pendapat kalak e, ibacakenna ntah pe ikutipna sada ayat si nuriken kerna masa depan si terulin. Lit si meriah akapna meteh janji arah Pustaka maka doni enda lalap pagi lit janah kalak si mehuli banci nggeluh rasa lalap i je.​—Msm. 37:29; Peng. 1:4.

11. Engkai maka arus sigunaken erbage cara i bas mbenaken percakapen? Uga carata ngusih Paulus bagi si ikataken Roma 1:14-16?

11 Arus sigunaken erbage cara i bas mbenaken percakapen ras kalak si ijumpai kita. Engkai maka bage? Perban la seri tiap jelma. Banci saja kai si meriah akap sekalak jelma la meriah iakap kalak si deban. Lit si meriah akapna mbahas kerna Dibata ntah pe Pustaka, tapi si debanna la atena mis ibahas kerna si e. La soal jelma si uga si ijumpai kita, perlu terus siusahaken ngerana man kerina jelma. (Baca Roma 1:14-16.) Perlu ka siinget maka Jahwe me si erbanca turah kebenaren bas pusuh kalak si ngena atena kai si benar.​—1 Kor. 3:6, 7.

MBAGIKEN KEBENAREN MAN KALAK SI LA TEK DIBATA E LIT

Melala perberita Kerajan si mperdiateken kalak si reh arah negeri-negeri si buen pendudukna labo Kristen. Ituriken kalak e pedah si erguna bas Pustaka nari (Nen paragrap 12-13)

12. Kai si banci silakoken guna nampati kalak bas Asia nari si la pernah terpikir maka lit Pencipta?

12 Bas sebelang doni, nterem perberita si jumpa ras kalak si la tek man Dibata si benar, termasuk kalak si reh arah negeri-negeri si mbatasi kegiaten agama. Bas piga-piga negeri i Asia, nterem kalak la pernah terpikir maka lit Pencipta. Sanga isungkuni nggit ntah lang kalak e erlajar Pustaka, lit si minter nggit perban penasaren ia. Tapi, lit si tangtangna sangsi ia perban mbaru kel iakapna ajaren bas Pustaka. Kai si banci silakoken guna nampati kalak e? Piga-piga perberita si nggo erpengalamen biasana ercakap-cakap ia lebe ras kalak si bage janah iperdiatekenna kalak e. Emaka kenca nggo pas waktuna, iceritaken perberita e uga ajaren bas Pustaka banci erban geluh kalak e reh ulina.

13. Kai nge si erbanca meriah akap kalak erlajar Pustaka? (Nen gambar bas sampul majalah enda.)

13 Enterem kalak meriah akapna meteh pedah-pedah si erguna bas Pustaka. (Peng. 7:12) Sekalak turang seninata si erberita man kalak si make bahasa Mandarin i New York ngataken, “Kuusahaken mperdiateken janah megiken kalak e. Adi lit si mbaru denga pindah arah negeri si deban, kusungkuni ia, ‘Uga nge kapndu tading jenda? Enggo nge lit dahinndu? Uga perbahanen kalak si jenda man bandu?’” Alu bage, mon-mon banci ijelaskenna sada ajaren Pustaka man kalak e. Adi cocok, ikatakenna ka, “Menurutndu, kai nge si banci silakoken gelah ula kita sempat rubat ras kalak si deban? Banci nge kubacaken sada pedah arah Pustaka? Nina, ‘Mbenaken perubaten seri ras mbuka lau si ibendung; Laweslah ope lenga terjadi perjengilen.’ Menurutndu, banci nge pedah enda nampati kita gelah ula sempat rubat ras kalak si deban?” (Kua. 17:14, Terjemahan Dunia Baru) Alu cara si bage, banci siteh nggit ntah lang ia sidahi mulihi.

14. Kai si ilakoken sekalak turang seninata i Asia Timur guna nampati kalak si ngataken la ia tek man Dibata?

14 Uga adi kalak si ijumpai kita mis ikatakenna la ia tek man Dibata? Sekalak turang seninata si nggo ndekah erberita man kalak si la tek man Dibata i Asia Timur, ngataken, “Biasana, adi ikataken kalak, ‘La kutek man Dibata,’ e ertina la ia tek man dibata-dibata si isembah nterem kalak si i je. Emaka, biasana kukataken setuju nge aku maka dibata-dibata e manusia nge si  erbanca janah labo tuhu-tuhu lit. Kenca e, kubacaken Jeremia 16:20, ‘Banci kin jelma erbahan dibatana? Lang! Bicara ibahanna pe, labo e dibata.’ Jenari kusungkun, ‘Janari nge banci siteh si apai Dibata si benar ras si apai dibata si iban manusia?’ Kenca kubegiken jawapenna, kubacaken Jesaya 41:23, ‘Turikenlah kai si nandangi jadi pagi gelah ieteh kami maka kam tuhu-tuhu dibata.’ Emaka, kuceritaken sada contoh si mbuktiken maka kai si ikataken Jahwe kerna masa depan pasti lalap terjadi.”

15. Kai si banci sipelajari arah pengalamen sekalak turang seninata i Asia Timur?

15 Ijelasken sekalak turang seninata ka i Asia Timur cara si ipakena sanga ndahi mulihi. Nina, “Tangtangna kujelasken kerna pedah si mehuli bas Pustaka, nubuat Pustaka si nggo terjadi, bage pe kerna uga raturna alam semesta enda. Jenari kujelasken maka kerina e bukti maka lit Pencipta si pentar. Adi nggo mulai ia tek Dibata e lit, kubahas me kerna Jahwe arah Pustaka.”

16. Menurut Heber 11:6, ngkai maka kalak si erlajar Pustaka arus tek man Dibata bage pe Pustaka? Janah uga carana gelah reh paguhna kiniteken kalak e?

16 Adi lit si erlajar Pustaka ras kita janah la ia tek man Dibata, arus terus sisampati ia gelah tuhu-tuhu ia tek maka Dibata e lit. (Baca Heber 11:6.) Perlu ka sisampati ia gelah tek maka Pustaka e terteki. Emaka arus mulih-ulih sibahas ajaren tertentu bas Pustaka. Tiap erlajar kenca kita, banci saja perlu sibahas bukti maka Pustaka e Kata Dibata. Enda banci silakoken adi sibahas piga-piga nubuat Pustaka si nggo terjadi, kai buktina Pustaka e cocok ras ilmu pengetahuan ras sejarah, bage pe sibahas kerna pedah Pustaka si erguna.

17. Kai gunana adi sikelengi kalak si deban?

17 I bas nampati kalak gelah jadi murid Kristus, perlu terus sikelengi ia la soal tek ia man Dibata ntah lang. (1 Kor. 13:1) Tujunta ngajari kalak e eme gelah itehna maka keleng ate Dibata ia janah ate Dibata gelah kalak e pe ngkelengi Ia. Bas tiap tahun, lit ribun kalak si mbarenda la tek man Dibata dungna banci iperidiken perban nggo keleng atena Dibata. Emaka, teruslah positip perukurenta. Teruslah kelengi janah perdiateken kerina jelma. Begikenlah kalak e. Usahakenlah gelah iangkaindu ia. Arah contoh si ibanndu, ajarilah ia gelah jadi murid Kristus.

LAGU 76 Nggejapken Keriahen Ukur

^ par. 5 Gundari, reh rusurna kita jumpa ras kalak si la tek man Dibata. Bas artikel enda, sibahas kari uga carana mbagiken kebenaren man kalak e. Sibahas ka uga carana nampati kalak e gelah tek man Pustaka janah tek man Dibata Jahwe.

^ par. 1 Menurut survei, negeri-negeri e eme: Albania, Australia, Austria, Azerbaijan, Belanda, Cina, Denmark, Hong Kong, Inggris Raya, Irlandia, Israel, Jepang, Jerman, Kanada, Korea Selatan, Norwegia, Prancis, Republik Ceko, Spanyol, Swedia, Swiss, ras Vietnam.

^ par. 2 PENJELASEN: Bas artikel enda, kalak si la lit agamana termasuk ka kalak si la tek man Dibata.

^ par. 54 KETERANGEN GAMBAR: Sekalak turang seninata erberita man temanna erdahin i rumah sakit, dungna inen temanna e jw.org.