Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 1

“Ula Aru Atendu, Sebap Aku kap Dibatandu”

“Ula Aru Atendu, Sebap Aku kap Dibatandu”

“Ula mbiar, sebap Aku kap ras kam. Ula aru atendu, sebap Aku kap Dibatandu. Kulindungi kam, janah Kusampati kam.”​—JES. 41:10, Terjemahan Dunia Baru (NW).

LAGU 7 Jahwe, Gegeh Kami

SI IBAHAS *

1-2. (a) Kai pengaruh kata-kata bas Jesaya 41:10 man Yoshiko? (b) Man ise saja nge ibereken Jahwe kata-kata si mpegegehi bas Jesaya 41:10?

SEKALAK turang seninata si diberu si gelarna Yoshiko ibegina berita si la mehuli. Nina dokter, piga-piga bulan nari ngenca ia nggeluh. Uga tanggapenna? Ingetna ayat favoritna, Jesaya 41:10. (Baca.) Alu tenang, ikatakenna man dokterna maka labo ia mbiar perban icikep Jahwe nge tanna. * Kata-kata si mpegegehi bas ayat e erban Yoshiko tuhu-tuhu tek man Jahwe. Ayat e pe banci ka erban kita tetap tenang sanga mberat kel masalahta. Uga carana? Mari sibahas lebe ngkai maka ikataken Dibata bage man Jesaya.

2 Tangtangna, isuruh Jahwe itulis Jesaya kata-kata e guna mpegegehi kalak Jahudi si nandangi ibaba ku Babilon. Tapi, iban Jahwe kata-kata e tetap lit bas Pustaka. TujunNa mpegegehi kerina umatNa seh asa gundari, labo kalak Jahudi saja. (Jes. 40:8; Rom. 15:4) Gundari, kita nggeluh bas “masa si sulit si dem kiniseran,” emaka perlu kel kita kata-kata si mpegegehi bas buku Jesaya.​—2 Tim. 3:1.

3. (a) Kai saja janji Jahwe bas Jesaya 41:10? (b) Engkai maka perlu kita janji-janji e?

3 Bas artikel enda kari sibahas telu janji Jahwe  si mpegegehi kinitekenta si lit bas Jesaya 41:10, si jadi ayat tahunen 2019: (1) Jahwe kap ras kita, (2) Ia kap Dibatata, janah (3) isampatiNa kita. Perlu kel kita janji-janji e, * perban bagi Yoshiko, kita pe lit masalahta. Janah siadapi ka masalah perban keadan doni enda si reh kelekna. Lit ka turang seninata si ianiaya pemerentah. Emaka mari sibahas telu janji ndai sada per sada.

“AKU KAP RAS KAM”

4. (a) Kai janji Jahwe si pertama si man bahasenta? (Nen ka cataten i teruh.) (b) Kai si ikataken Jahwe si mbuktiken keleng ateNa kita? (c) Uga perasanndu mbaca kata-kata Dibata e?

4 Janji Jahwe si pertama eme, “Ula mbiar, sebap Aku kap ras kam.” * Enda terbukti perban iperdiateken Jahwe kel kita janah ikelengiNa kita. Perdiatekenlah uga kelengna ate Jahwe kita sanga ikatakenNa, “Meherga kel Kuakap kam; medolat, janah keleng ateKu kam.” (Jes. 43:4) La lit kai pe bas alam semesta enda si banci erban lanai keleng ate Jahwe kalak si ngelayani Ia. Tetap Jahwe setia man banta. (Jes. 54:10) La kita mbiar perban keleng ate Jahwe kita janah ndeher kita ras Ia. Pasti ilindungi Jahwe kita gundari, bagi nggo ilindungiNa temanNa mbarenda eme Abram (Abraham). Nina Jahwe man bana, “Ola kam mbiar Abram. Aku ngampang-ampangi kam.”​—Kej. 15:1.

Alu penampat Jahwe, banci siadapi masalah si bagi lau si mbages ras api (Nen paragrap 5-6) *

5-6. (a) Ja nari siteh nggit Jahwe nampati kita ngadapi masalahta? (b) Kai si banci sipelajari arah Yoshiko?

5 Nggit Jahwe nampati kita ngadapi masalahta. Erjanji Ia, “Adi ikeparindu lau si mbages, Aku ras kam; la kam gedap i bas kesusahen si mesangat. Adi ibentasindu api si gurlah, la meseng kam; la kam talu i bas percuban si mberat.” (Jes. 43:2) Kai ertina e?

6 Labo ijanjiken Jahwe gelah bene masalahta. Tapi labo ipediatNa kita  gedap bas masalahta si bagi “lau si mbages” ntah pe mesera kel siakap ngadapi masalahta si bagi “api si gurlah.” Erjanji Ia maka tetap Ia ras kita guna nampati kita ndalani masalahta. Kai si ilakoken Jahwe? IbanNa kita lanai mbiar gelah banci kita tetap setia amin pe arus mate. (Jes. 41:13) Yoshiko, si iceritaken ndai, igejapkenna kel e. Nina anakna, “Luar biasa kel akap kami banci Mamak tenang. Tek kel kami Jahwe me si erbanca ia tenang. Nandangi mate pe Mamak, cerita denga ia man perawat ras pasien si deban kerna Jahwe ras janjiNa.” Kai si banci sipelajari arah Yoshiko? Banci kita la mbiar janah paguh ngadapi masalahta adi tek kita man janji Dibata, “Aku ras kam.”

“AKU KAP DIBATANDU”

7-8. (a) Kai janji si peduaken si man bahasenta, janah kai ertina? (b) Engkai maka ikataken Jahwe, “Ula aru atendu,” man kalak Jahudi si nandangi ibaba ku Babilon? (c) Kai si ikataken Jesaya 46:3, 4 si mpetetap ukur umat Dibata?

7 Janji si peduaken si itulis Jesaya eme, “Ula aru atendu, sebap Aku kap Dibatandu.” Kai maksudna aru ate bas ayat enda? Bas bahasa aslina, kata ‘aru ate’ ertina “lalap ngenen ku pudi perban mbiar lit ntah lang bahaya” ntah pe “lalap mbiar bagi kalak si sangana bas bahaya.”

8 Engkai maka ikataken Jahwe, “Ula aru atendu,” man kalak Jahudi si nandangi ibaba ku Babilon? Perban itehNa pasti mbiar kari kalak e. Kai si erbanca kalak e mbiar? Itawan me pagi kalak e i Babilon 70 tahun dekahna, janah sanga nandangi seh 70 tahun e, iserang tentera Medi-Persia kota e. Igunaken Jahwe tentera e mbebasken umatNa. (Jes. 41:2-4) Sanga idah kalak Babilon ras bangsa-bangsa si deban musuh nggo reh deherna, siiah-iahen kalak e gelah pang, nina, “Tetapkenlah ukurndu.” Ibanna ka dibata-dibata palsu gelah ngelindungi kalak e. (Jes. 41:5-7) Tapi ipetetap Jahwe ukur kalak Jahudi nina, “Kam o Israel, suruh-suruhenKu, [la bagi bangsa si deban] . . . Ula aru atendu, sebap Aku kap Dibatandu.” (Jes. 41:8-10, NW) Nina Jahwe, “Aku kap Dibatandu.” Ipetetap Jahwe ukur umatNa arah kata-kataNa e. Labo ilupakenNa kalak e, tetap denga Ia jadi Dibatana, janah kalak e pe tetap denga jadi umatNa. Nina man kalak e, “Kutatang-tatang . . . janah Kukelini kam.” Pasti terpegegehi kalak Jahudi megi kata-kata e.​—Baca Jesaya 46:3, 4.

9-10. Engkai maka la perlu kita mbiar? Ceritaken contohna.

9 Gundari, nterem si aru atena perban reh dekahna reh parahna keadan doni enda. Kita pe ngenanami keadan si bage. Tapi la perlu kita mbiar. Nina Jahwe, “Aku kap Dibatandu.” Engkai maka kata-kata e banci erban kita lanai mbiar?

10 Contohna: Jim ras Ben sangana bas pesawat. Meter kel angin emaka goncang pesawat e. Ikataken pilot man kerina penumpang, “Perketat sabuk pengaman kena. Megegeh sekale goncangenna.” Mbiar kel Jim. Tapi nina pilot ka, “Aku pilot kena si  ngerana. Aman nge kerina, ula aru ate kena.” La teksa Jim, nina, “Ja nari tehna aman kerina?” Nenna ka Ben, sitik pe la ia mbiar. Sungkun Jim ia, “Maka tenang kel kam?” Cirem Ben janah nina, “Kutandai kel pilot e. Bapakku kap ia.” Nina ka, “Nta kuceritaken uga bapakku e. Adi nggo tandaindu ia janah tehndu uga beluhna ia maba pesawat, lanai kari kam mbiar.”

11. Kai si banci sipelajari arah contoh ndai?

11 Kai si banci sipelajari arah contoh ndai? Bagi Ben, la kita mbiar perban nggo sitandai kel Bapakta si i surga eme Jahwe. Pasti isampatiNa kita sanga mberat kel masalahta bas wari-wari pendungi enda. (Jes. 35:4) Perban tek kita man Jahwe, la kita mbiar sanga kerina kalak bas doni enda mbiar. (Jes. 30:15) Bagi Ben, siceritaken ka man kalak ngkai maka kita tek man Dibata. Dungna, kalak e pe banci tek maka pasti isampati Jahwe ia la soal kai pe masalahna.

“KULINDUNGI KAM, JANAH KUSAMPATI”

12. (a) Kai janji si peteluken si man bahasenta? (b) Kai si banci sipelajari arah kata-kata, ‘Jahwe Raja si dem alu kuasa’?

12 Janji Jahwe si peteluken eme: “Kulindungi kam, janah Kusampati kam.” Enggo ijelasken Jesaya uga Jahwe ngelindungi umatNa, nina, ‘Jahwe reh alu kuasaNa, lako jadi Raja si dem alu kuasa.’ (Jes. 40:10) Je nari siteh maka Jahwe e Raja si mbelin kuasaNa. IgunakenNa kuasaNa e bas mpegegehi ras ngelindungi umatNa mbarenda bage pe si gundari.​—Ul. 1:30, 31; Jes. 43:10.

La lit senjata kai pe si banci ngelawan tan Jahwe si megegeh si ngelindungi kita (Nen paragrap 12-16) *

13. (a) Ndigan khususna itepati Jahwe janjiNa guna ngelindungi kita? (b) Janji kai si banci erban kita paguh janah tek man Jahwe?

 13 Pasti itepati Jahwe janjiNa guna ‘ngelindungi’ kita khususna sanga ianiaya musuh kita. Gundari, bas piga-piga negeri, iusahaken musuhta kel mpengadi dahin erberita ntah pe ilarangna pendahin organisasi. Amin pe terjadi si bage, labo kita mbiarsa. Enggo ibereken Jahwe janji man banta si erbanca kita paguh janah tek man baNa. Erjanji Ia, “La lit senjata si banci nakiti kam.” (Jes. 54:17) Lit telu si banci sipelajari arah kata-kata e.

14. Engkai maka la kita sengget adi iserang musuh kita?

14 Si pertama, perban kita murid Jesus, pasti segat ate kalak kita. (Mat. 10:22) Ikataken Jesus maka bas wari-wari pendungi, murid-muridna pasti ianiaya. (Mat. 24:9; Joh. 15:20) Si peduaken, arah nubuat Jesaya ndai siteh maka labo segat saja ate musuhta kita, tapi ipakena ka melala senjata ngelawan kita. Misalna banna bual si tempa-tempa benar, ifitnahna kita, janah isiksana kita alu kejam. (Mat. 5:11) Ipediat Jahwe ipake musuhta senjata-senjata e ngelawan kita. (Ep. 6:12; Ket. 12:17) Tapi labo kita perlu mbiar. Engkai?

15-16. (a) Kai si peteluken si perlu siinget, janah ngkai maka e cocok ras Jesaya 25:4, 5? (b) Menurut Jesaya 41:11, 12, kai si terjadi pagi man kalak si ngelawan kita?

15 Si peteluken si perlu siinget eme, nina Jahwe, “La lit senjata” si ipake ngelawan kita “si banci nakiti” kita. Bagi tembok si ngelindungi kita arah badai sanga udan, Jahwe pe ngelindungi kita arah ‘kalak merawa si ngayak-ngayak’ kita. (Baca Jesaya 25:4, 5.)  La banci iambati musuhta kita ndatken kegeluhen si rasa lalap.​—Jes. 65:17.

16 Selain si e, banci kita reh tekna man Jahwe perban nggo jelas ikatakenNa kai si nandangi terjadi man “kalak si merawa” man banta. (Baca Jesaya 41:11, 12.) La soal uga hebatna tentangen arah musuh-musuhta, pasti la kalak e berhasil. Kerina musuh umat Dibata “kernep me janah masap pe.”

CARA REH TEKNA MAN JAHWE

Adi ratur sibaca kerna Jahwe bas Pustaka, banci reh tekna kita man baNa (Nen paragrap 17-18) *

17-18. (a) Engkai maka banci reh tekna kita man Dibata adi sibaca Pustaka? Ban contohna. (b) Kai gunana adi siukuri alu mbages ayat tahunen 2019?

17 Banci reh tekna kita man Jahwe adi lebih sitandai Ia. Carana alu mbaca Pustaka janah ngukurisa alu mbages. Bas Pustaka lit itulisken uga mbarenda Jahwe ngelindungi umatNa. Adi sibaca e pasti tek kita maka gundari pe ilindungiNa kita.

18 Perdiateken kata-kata Jesaya kerna uga Jahwe ngelindungi kita. Ipeserina Jahwe bagi permakan janah umat Dibata bagi anak biri-biri. Nina Jesaya, ‘Alu tanNa, ipepulungNa kerina anak biri-biri janah iangkipNa.’ (Jes. 40:11) Sanga sigejapken tan Jahwe si megegeh ngepkep kita, aman janah tenang siakap. Gelah banci tetap kita tenang sanga ngadapi masalah, ipilih budak si setia janah pentar me Jesaya 41:10 jadi ayat tahunen 2019, “Ula aru atendu, sebap Aku kap Dibatandu.” Ukurilah kata-kata e alu mbages. Pasti terpegegehi kel kam sanga ngadapi masalah si nandangi reh.

LAGU 38 Pasti Kam IpegegehiNa

^ par. 5 Bas ayat tahunen 2019, lit telu alasen ngkai maka banci kita tetap tenang sanga melala si la mehuli terjadi bas doni enda ntah pe bas geluhta. Alasen-alasen e ibahas kari bas artikel enda gelah ula aru kel ateta janah reh tekna kita man Jahwe. Ukurilah alu mbages ayat tahunen e janah adi banci hapallah. Banci kam terpegegehi ngadapi masalah si nandangi reh.

^ par. 1 Nen Menara Pengawal Juli 2016, hal. 18.

^ par. 3 PENJELASEN: Janji Jahwe e terteki janah pasti terjadi. Janji Jahwe erban lanai aru kel ateta kerna masalahta.

^ par. 4 Kata-kata “Ula mbiar” lit itulisken telu kali bas Jesaya 41:10, 13, ras 14. I bas ayat-ayat ndai pe lalap lit kata “Aku” (maksudna Jahwe). Engkai maka isuruh Jahwe mulih-ulih itulisken Jesaya kata “Aku”? Gelah siteh maka sada ngenca cara si erban lanai kita mbiar eme tek man Jahwe.

^ par. 52 KETERANGEN GAMBAR: Anggota keluarga si ngadapi masalah bas ingan erdahin, masalah kesehaten, tantangen sanga erberita, bage pe tantangen bas sekolah.

^ par. 54 KETERANGEN GAMBAR: Iserang polisi turang seninata si sangana perpulungen i rumah, tapi tetap kalak e tenang.

^ par. 56 KETERANGEN GAMBAR: Kebaktin Jabu si ratur erban kita paguh janah tetap setia.