Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Usihlah Juak-Juak Jahwe si Setia

Usihlah Juak-Juak Jahwe si Setia

”Si ipindo Dibata i bas kita nari eme kap, ngelakoken kai si bujur, encidahken kekelengen si tetap, dingen nggeluh alu ukur meteruk rembak ras Dibatanta.”​MI. 6:8.

ENDE-ENDEN: 63, 43

1, 2. Uga Daud ncidahken maka ia tetap setia man Dibata? (Nehen gambar i datas.)

SAUL ras 3.000 tenterana sangana ndarami Daud i taneh mesawang i Juda guna munuh ia. Tapi i bas sada berngi, lawes Daud ras piga-piga prajuritna ku ingan erkemah Saul ras tenterana. Kalak enda kerina sangana tunduh, emaka erdalan Daud ras Abisai alu manjar-anjar ngelewati tentera-tentera e janah iidahna Saul. Ikusikken Abisai man Daud, ”Berelah maka kupantem ia seh telpus ku taneh alu lembingna e jine; sekali pantem saja, la perlu dua kali!” Tapi, jabapen Daud luar biasa. Nina man Abisai, ”La banci isakitindu ia! Ugapa pe iukum TUHAN ise gia si nakiti raja PilihenNa. Kenca si e, nina Daud ka, ”TUHANlah si ngambati aku ncubaken erbahan si jahat man kalak si enggo itangkuhken TUHAN jadi raja!”​—1 Sam. 26:8-12.

2 Ieteh Daud maka guna tetap setia man Jahwe, arus ihamatina Saul. Janah la pernah lit i bas ukurna guna ncilakai ia. Engkai? Erkiteken Dibata nggo milih Saul jadi raja Israel. Gundari pe, ate Jahwe gelah kerina umatNa setia man  baNa janah nghamati kalak si iberekenNa wewenang.​—Oge Miha 6:8.

3. Uga Abisai ncidahken kesetianna man Daud?

3 Abisai nghamati Daud erkiteken ietehna Dibata nggo milih Daud jadi raja. Kenca jadi raja, Daud ngelakoken dosa si serius. Erlua-lua ia ras ndehara Uria janah isuruhna Joap erbahanca Uria terbunuh bas perang. (2 Sam. 11:2-4, 14, 15; 1 Kro. 2:16) Joap eme senina Abisai, emaka banci saja ieteh Abisai kejahaten Daud, tapi tetap ihamatina Daud. Selain si e, Abisai sekalak peminpin pasuken militer emaka banci saja igunakenna wewenangna enda guna erban dirina jadi raja, tapi la pernah ilakokenna si e. Sebalikna, ilayanina Daud janah ilindungina i bas musuh-musuhna nari.​—2 Sam. 10:10; 20:6; 21:15-17.

4. (a) Uga Daud jadi usihen i bas kesetian man Dibata? (b) Kai si man bahasenta bas artikel enda?

4 Daud setia man Jahwe segedang geluhna. Paksa ia nguda denga, ibunuhna Goliat, simegombang man Jahwe bage pe man kalak Israel. (1 Sam. 17:23, 26, 48-51) Paksa Daud jadi raja, Natan, nabi Jahwe mpersingeti ia erkiteken dosa si ibahanna. Mis iakui Daud maka ia nggo erdosa janah ertobat. (2 Sam. 12:1-5, 13) Kenca si e, paksa Daud nggo metua, iberekenna melala ertana guna nampati pembangunen rumah pertoton Jahwe. (1 Kro. 29:1-5) Jelas me, amin gia pernah erbahan kesalahen si serius i bas geluhna, Daud tetap setia man Dibata. (Msm. 51:4, 10; 86:2) I bas artikel enda, banci sibahas kerna usihen Daud ras kalak si deban si nggeluh i bas jamanna. Banci ka sipelajari uga carana gelah kita lebih setia man Jahwe asangken man ise pe. Selain si e, sibahas ka sifat-sifat si deban si nampati kita gelah tetap setia man Jahwe.

SETIA NGE KAM MAN JAHWE?

5. Pelajaren kai si banci sidatken i bas kesalahen Abisai?

5 Paksa ibunuh Abisai atena Saul, situhuna erkiteken setia atena man Daud. Tapi, erkiteken ieteh Daud maka salah adi ncilakai raja ’pilihen Jahwe’, la ipediatna Abisai munuh raja. (1 Sam. 26:8-11) Enda mereken pelajaren si penting man banta: paksa arus sipilih man ise arus siutamaken kesetianta, perlu siukuri prinsip Pustaka si Badia.

6. Amin gia wajar adi setia ateta man keluarga bage pe temanta, tapi ngkai maka arus kita metenget?

6 Wajar adi setia ateta man kalak si keleng ateta, bagi temanta ntah pe anggota keluarganta. Tapi erkiteken kita la sempurna, perasanta banci nipu kita. (Jer. 17:9) Emaka adi sekalak si keleng ateta erbahan kesalahen janah nadingken kebenaren arus siinget maka ndauh pentingen setia man Jahwe asangken man kalak si deban.​—Oge Matius 22:37.

7. Uga sekalak turang seninanta tetap setia man Dibata amin gia situasina sulit?

7 Adi sekalak anggota keluarganta ipecat ntah pe ipedarat i bas runggun Saksi Jahwe nari, banci sicidahken maka kita tetap setia man Jahwe. Contohna, i bas sada wari, nande Anna si nggo ipecat, nelpon ia janah ikatakenna maka atena ndahi Anna. [1][2] Ikatakenna maka ndele kal atena erkiteken lanai nggit keluarga ngerana ras ia. Enda erbahanca megogo kal ate Anna, janah ia erjanji ibalasna kari lewat surat. Sope itulis Anna surat e, iukurina piga-piga prinsip Pustaka si Badia. (1 Kor. 5:11; 2 Joh. 9-11) Kenca si e, i bas surat, iturikenna alu cara si mehuli maka nandena nge situhuna si nadingken keluarga erkiteken ia erdosa janah la nggit ertobat. Ikataken Anna man nandena maka sada-sadana cara gelah banci  mulihi ermeriah ukur eme alu mulihken ku Dibata Jahwe.​—Jak. 4:8.

8. Sifat-sifat kai saja si banci nampati kita setia man Dibata?

8 Umat Dibata si setia i bas jaman Daud meteruk rukur, mehuli, janah perpang. Mari sibahas uga sifat-sifat enda banci nampati kita setia man Jahwe.

KITA ARUS METERUK RUKUR

9. Engkai maka idukung Abner rencana Saul guna munuh Daud?

9 Jonatan, anak Saul, ras peminpin tentera Israel, Abner, ngidah Daud maba takal Goliat man Raja Saul. Jonatan jadi teman Daud janah tetap setia man bana. (1 Sam. 17:57–18:3) Tapi Abner lang. Malahen, isampatina Saul si atena munuh Daud. (1 Sam. 26:1-5; Msm. 54:3) Ieteh Jonatan ras Abner maka ate Dibata Daud si jadi raja Israel. Tapi kenca Saul mate, Abner la ndukung Daud. Sebalikna, icubakenna erbahan Isboset, anak Saul, jadi raja. Kenca si e, mungkin Abner ersura-sura njadiken dirina raja, emaka erlua-lua ia ras salah sada ndehara Saul. (2 Sam. 2:8-10; 3:6-11) Engkai maka Jonatan setia man Daud, tapi Abner lang? Perban Jonatan setia man Jahwe janah meteruk rukur, tapi Abner lang.

10. Engkai maka Absalom la setia man Dibata?

10 Absalom, anak Raja Daud, la setia man Dibata erkiteken la ia meteruk rukur. Ia atena si jadi raja, emaka isikapkenna ”sada gereta ras kuda man bana, rikut ras lima puluh pengawal.” (2 Sam. 15:1) Ipengaruhina ka melala kalak Israel gelah setia man bana. Selain si e, icubakenna ka munuh bapana, amin gia ietehna maka Jahwe si nangkuhken Daud jadi raja Israel.​—2 Sam. 15:13, 14; 17:1-4.

11. Kai si banci sipelajari i bas Abner, Absalom, bage pe Baruh?

11 Adi sekalak jelma la meteruk rukur janah atena ndatken keduduken si terganjangen, enda si erbahanca mesera iakapna tetap setia man Dibata. Tentu saja, keleng ateta Jahwe, janah la kita nggit mentingken diri ntah pe jahat bagi Abner ras Absalom. Tapi arus kita metenget gelah ula sibahan sen ntah pe pendahin jadi hal si pentingna i bas geluhta. Enda banci ncedai hubungenta ras Jahwe. I bas piga-piga waktu, morah ate Baruh, sekretaris Jeremia,  nandangi kai si la lit i bas ia. Janah lanai meriah iakapna ngelayani Dibata. Kenca si e, nina Jahwe man Baruh, ”Kuruntuhken kap ateKu si enggo Kupanteki. Kuruah kap ateKu si enggo Kusuanken. Bage kap ateKu Kubahan man kerina negeri enda. Kemulian man dirindu saja kin si nidaramindu? Ola bage!” (Jer. 45:4, 5) Ibegiken Baruh kai si ikataken Jahwe. Janah kita pe arus sibegiken Ia, erkiteken kentisik nari ikernepkenNa me doni si jahat enda.

12. La kita banci setia man Dibata adi kita mentingken diri. Bereken contohna.

12 Daniel, turang seninanta i Meksiko, arus mutusken man ise ia arus setia. Erjabu atena ras singuda-nguda si la nembah Jahwe. Nina Daniel, ”Terus kami sisurat-suraten amin gia aku nggo merintis.” Tapi dungna isedarina maka ia mentingken bana. Lanai ia setia man Jahwe, janah ia perlu meteruk rukur. Emaka iturikenna man pertua si erpengalamen kerna diberu e. Nina Daniel, ”Isampati pertua e aku ngangkai maka adi setia ateku man Dibata, arus aku ngadi surat-suraten ras diberu e. Kenca melala ertoto alu iluh mambur, dungna kulakoken kai si ikatakenna. Kenca si e, reh riahna kuakap erberita.” Gundari, Daniel nggo erjabu ras sekalak diberu si nembah Jahwe janah ngelayani selaku pertua keliling.

KESETIAN MAN JAHWE NAMPATI KITA GELAH MEHULI

Adi ietehndu lit temanndu ngelakoken dosa si serius, ipebetehkenndu nge man bana janah ipastikenndu nge ia ndatken penampat i bas pertua nari? (Nehen paragraf 14)

13. Paksa Daud ngelakoken dosa, uga Natan tetap setia man Dibata bage pe man Daud?

13 Adi setia kita man Jahwe, kita pe banci setia man kalak si deban. Contohna nabi Natan. Kenca Daud erlua-lua ras Betseba janah ibunuhna Uria, Jahwe ngutus Natan guna mpersingeti Daud. Pang Natan janah patuh man Jahwe. Tapi ia pe bijaksana janah ngerana man Daud alu cara si mehuli. Isampatina atena Daud gelah ietehna maka ia nggo ngelakoken dosa si serius. Emaka iturikenna sada turi-turin kerna kalak bayak si nangko biri-biri sekalak si musil. Paksa ibegi Daud kerna si e, merawa kal ia nandangi kai si ilakoken kalak bayak e. Kenca e, nina Natan, ”Kam kap e”. Isedari Daud maka ia nggo erdosa man Jahwe.​—2 Sam. 12:1-7, 13.

14. Uga kita banci setia man Jahwe bage pe man kalak si deban?

14 Kita banci setia man Jahwe bage pa man turang seninanta alu ncidahken  kiniulin man bana. Contohna, mungkin siidah sekalak turang seninanta ngelakoken dosa si serius. Pasti setia ateta man bana terlebih ka adi ia teman meriah ntah pe anggota keluarganta. Tapi sieteh ka maka ndauh pentingen setia man Jahwe. Emaka bali bagi Natan, patuhilah Jahwe. Tapi cidahkenlah kiniulin man turang seninanta e. Pebetehken man bana maka arus mis iturikenna man pertua janah mindo penampat man bana. Adi la ia nggit, kitalah si arus mpebetehkenca man pertua. Adi silakoken enda, kita tetap setia man Jahwe. Sicidahken ka kiniulin man turang seninanta erkiteken pertua banci nampati ia gelah hubungenna ras Jahwe mehuli ka mulihken. Kalak enda mpersingeti ia alu cara si mehuli.​—Oge Imamat 5:1; Galati 6:1.

KITA ARUS PANG GELAH BANCI SETIA MAN JAHWE

15, 16. Engkai maka Usai arus pang gelah banci tetap setia man Dibata?

15 Usai salah sada teman Raja Daud si setia. Paksa ibahan bangsa Israel atena Absalom jadi raja, Usai arus pang gelah banci tetap setia man Daud bage pe man Dibata. Ietehna maka Absalom maba tenterana ku Jerusalem ras Daud nggo kiam jenari. (2 Sam. 15:13; 16:15) Kai si nilakoken Usai? Itadingkenna nge Daud janah ndukung Absalom? Lang. Amin Daud nggo metua janah nterem kalak atena munuh ia, Usai tetap setia man bana erkiteken Jahwe nggo nangkuhken Daud jadi raja. Emaka lawes Usai ku Deleng Saitun guna njumpai Daud.​—2 Sam. 15:30, 32.

16 Daud nuruh Usai mulihken ku Jerusalem gelah pekulah-kulahna bana jadi teman Absalom gelah banci ibahanna Absalom nggit megiken pedahna labo pedah Ahitopel. Usai pang janah nggit ngasamken kesahna gelah banci tetap patuh man Daud ras setia man Jahwe. Daud ertoto man Jahwe gelah nampati Usai, ibegiken Dibata pertotonna. Absalom megiken Usai labo Ahitopel.​—2 Sam. 15:31; 17:14.

17. Engkai maka arus kita pang gelah banci setia?

17 Kita arus pang gelah banci setia ras patuh man Jahwe amin gia ndatken tantangen, i bas anggota keluarganta, teman sada dahin, ntah pe pemerentah si erkuasa. Contohna, Taro, i Jepang. Kitik-kitikna nari iusahakenna erbahan orang tuana ermeriah ukur. Ia patuh ras setia man orang tuana, labo erkiteken kewajipen tapi erkiteken keleng atena ia. Tapi paksa ia erlajar ras Saksi Jahwe, ilarang orang tuana ia. Si enda erbahan megogo atena, janah mesera kal iakapna ngataken man orang tuana maka lawes atena ku perpulungen. Nina Taro, ”Merawa kal orang tuangku, janah piga-piga tahun dekahna la iberekenna aku ku rumah. Ertoto aku gelah pang mpertahanken keputusenku. Gundari, nggo mulai mehuli perbahanen orang tuangku man bangku janah banci kujumpai ia alu ratur.”​—Oge Kuan-kuanen 29:25.

18. Pelajaren kai si banci sidatken i bas artikel enda?

18 Bali bagi Daud, Jonatan, Natan, ras Usai, mbera kita pe nggejapken kepuasen erkiteken setia man Jahwe. La pernah ateta bagi Abner ras Absalom si la setia. Payo, kita la sempurna janah banci erbahan kesalahen. Tapi mari sibuktiken man Jahwe maka kesetianta man baNa sada hal sipentingna kal i bas geluhta.

^ [1] (paragraf 7) Piga-piga gelar i bas artikel enda nggo iganti.