Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Jahwe Nggelari Ia ”Temanku”

Jahwe Nggelari Ia ”Temanku”

”Kam O Israel, suruh-suruhenKu, kam kap bangsa pilihenKu, kesusuren Abraham temanKu.”​JES. 41:8.

ENDE-ENDEN: 91, 22

1, 2. (a) Janari banci sieteh maka manusia banci jadi teman Dibata? (b) Kai si man bahasenta i bas artikel enda?

MULAI kita tubuh ngasa kita mate, kita perlu kekelengen. Enda banci sidat i bas pertemanen si rembak, labo i bas hubungen si romantis saja. Tapi si perluna kal i bas kegeluhenta eme kekelengen Dibata Jahwe. Erkiteken Dibata la banci niidah janah mada kuasa, nterem kalak la tek adi manusia banci rembak ras Dibata. Tapi sieteh uga kebenarenna!

2 I bas Pustaka si Badia banci sieteh maka manusia banci jadi teman Dibata. Perlu sipelajari usihen si itadingken kalak enda. Engkai? Erkiteken erteman ras Dibata sada tujun si penting kal i bas kegeluhen. Mari siperdiateken usihen si itadingken Abraham. (Oge Jakup 2:23.) Kai si erbahanca ia banci jadi teman Dibata? Alasen utamana eme erkiteken ia erkiniteken man Dibata. Janah ia pe itandai selaku ”bapa nandangi kerina kalak si tek man Dibata.” (Rom. 4:11)  Asum sibahas kerna usihen si itadingkenna, cuba sungkuni dirinta, ’Uga carana aku banci ngusih kiniteken Abraham janah mpegegehi hubungenku ras Dibata Jahwe?’

UGA ABRAHAM BANCI JADI TEMAN JAHWE?

3, 4. (a) Cuba turiken kai ujian kiniteken si mbelinna kal man Abraham. (b) Engkai maka Abraham nggit ngkorbanken Isak?

3 Bayangken Abraham si umurna 125 tahun manjar-anjar erdalan ku deleng. [1] Ipudina lit anakna Isak, si umurna 25 tahun. Isak maba ranting janah Abraham maba piso ras barang-barang guna erbahan api. Perdalanen enda banci saja perdalanen si mberatna kal i bas kegeluhen Abraham. Labo perban ia nggo metua, megegeh denga nge ia. Tapi si erbahanca perdalanen enda mberat erkiteken Dibata Jahwe nuruh ia mpersembahken anakna!​—Kej. 22:1-8.

4 Banci saja enda ujian kiniteken si mbelinna kal man Abraham. Piga-piga kalak ngataken maka Dibata e kejam erkiteken nuruh Abraham ngkorbanken anakna. Janah si debanna ngataken maka Abraham nggit ngelakoken e, erkiteken la keleng atena anakna. Kalak enda ngataken si e perbahan la erkiniteken ntah pe la iangkaina kai kin kiniteken si tuhu-tuhu e. (1 Kor. 2:14-16) Tapi Abraham patuh man Dibata labo la eralasen. Ia patuh perban tuhu-tuhu ia erkiniteken. Ietehna maka la pernah ipindo Jahwe ia ngelakoken kai pe si banci ngerugiken ia. Ietehna maka adi ia patuh, Jahwe pasti masu-masu ia bage pe anakna. Engkai maka bage kal paguhna kiniteken Abraham? Erkiteken lit pemeteh ras pengalamenna.

5. Kemungkinen uga cara Abraham erlajar kerna Jahwe janah kai pengaruh pemeteh e man bana?

5 Pemeteh. Abraham mbelin i bas kuta Ur. Kalak si tading i je termasuk bapa Abraham nembah dibata-dibata palsu. (Jos. 24:2) Emaka uga carana Abraham banci nandai Jahwe? Menurut Pustaka si Badia, Abraham eme kesusuren Sem, anak Nuah. Janah Sem nggeluh seh ngasa umur Abraham 150 tahun. Erkiteken mbelin kal kiniteken Sem, mungkin iturikenna kerna Jahwe man kade-kadena. La sieteh pastina, tapi mungkin saja bage me Abraham erlajar kerna Jahwe. Kai si ipelajari Abraham erbanca ia ngkelengi Jahwe, janah pemeteh si idatkenna nampati ia erkiniteken.

6, 7. Kai saja si ilakoken Abraham si erbahanca ia ndatken pengalamen si mpegegehi kinitekenna man Jahwe?

6 Pengalamen. Kai saja si ilakoken Abraham si erbahanca ia ndatken pengalamen si mpegegehi kinitekenna man Jahwe? Nina piga-piga kalak, perukuren mpengaruhi perasan janah perasan mpengaruhi perbahanen. Erkiteken iukuri Abraham kai si ipelajarina kerna Dibata, tersuruh ukurna guna ngergai ”TUHAN [JAHWE] Dibata si Meganjangna, si Njadiken langit ras doni.” (Kej. 14:22) Pustaka si Badia nggelari pengergan si mbelin enda erkemalangen dingen erpengendes man Dibata. (Heb. 5:7) Emaka, gelah banci jadi teman Dibata, kita perlu erkemalangen ras erpengendes man baNa. (Msm. 25:14) Enda me si ngiahken Abraham patuh man Jahwe.

7 Dibata nuruh Abraham ras Sara si nggo metua nadingken rumahna i kuta  Ur janah lawes ku negeri asing. Enda ertina kalak enda arus tading i tenda-tenda i bas sisa geluhna. Amin gia ieteh Abraham pasti melala bahayana, tapi ia ertekad tetap patuh man Jahwe. Erkiteken kepatuhenna, Dibata masu-masu ras ngelindungi ia. Contohna, paksa Sara, ndehara Abraham si mejile ibuat i bas ia nari janah kegeluhen Abraham pe terancam, alu mukjizat piga-piga kali Jahwe ngelindungi kalak e. (Kej. 12:10-20; 20:2-7, 10-12, 17, 18) Pengalamen enda erbahan kiniteken Abraham reh paguhna.

8. Uga carana banci sidatken pemeteh ras pengalamen si banci mpegegehi hubungenta ras Jahwe?

8 Banci nge kita jadi teman Jahwe? Pasti banci! Bagi Abraham, kita perlu erlajar kerna Jahwe. Kita pe banci ndatken pemeteh ras pengalamen si iperluken. Janah buen si banci sidatken gundari asangken si idatken Abraham mbarenda. (Dan. 12:4; Rom. 11:33) Pustaka si Badia dem alu pemeteh kerna ”si Njadiken langit ras doni”. Kai si nggo sipelajari erbahan kita ngkelengi Jahwe janah nampati kita ngergai Ia, si erbahanca kita rela patuh man baNa. Adi patuh kita sigejapken sendiri pasu-pasu ras perlindungen Dibata Jahwe si erbahanca reh paguhna kinitekenta. Paksa silayani Jahwe asa ngasupta, banci sidatken kepuasen, kedamen, ras keriahen ukur. (Msm. 34:8; Kua. 10:22) Adi reh buena pemeteh ras pengalamenta, reh paguhna hubungenta ras Ia.

UGA ABRAHAM NJAGA HUBUNGENNA TETAP REMBAK RAS DIBATA?

9, 10. (a) Kai si iperluken guna mpegegehi pertemanen? (b) Kai buktina Abraham ngergai janah mpegegehi hubungenna ras Jahwe?

9 Hubungen si rembak ntah pe pertemanen bali bagi erta si meherga. (Oge Kuan-kuanen 17:17.) Labo bagi pot bunga si meherga si igunaken terjeng hiasen saja. Tapi bali bagi sinuan-nuan si arus isiram janah irawat gelah banci erbunga. Abraham ngergai janah njaga hubungenna si rembak ras Jahwe. Uga ia ngelakokenca?

10 Abraham terus mpebelin pengerganna bage pe kepatuhenna. Contohna, paksa ia ras keluargana bage pe juak-juakna berkat ku Kanaan, terus ipindona gelah Jahwe mbimbing ia i bas erbahan keputusen si mbelin bage pe si kitik. Setahun ope denga Isak tubuh paksa umur Abraham 99 tahun, Jahwe nuruh ia gelah kerina dilaki i bas jabuna isunatken. Ragu nge Abraham nandangi kai si iperentahken Jahwe janah idaramina nge alasen guna la patuh? Lang, tapi ia tek man Jahwe  janah ”i bas wari si e minter ipatuhi Abraham kai si ikataken Dibata.”​—Kej. 17:10-14, 23.

11. Engkai maka aru ate Abraham kerna pengukumen Dibata nandangi Sodom ras Gomora, janah uga Jahwe nampati ia?

11 Erkiteken Abraham terus patuh man Jahwe termasuk i bas hal-hal si kitikna kal pe, hubungenna ras Dibata reh paguhna. Igejapkenna maka ia banci ngerana man Jahwe kerna kai pe, termasuk mindo penampatNa paksa lit masalah si sulit. Contohna, aru ate Abraham paksa ikataken Jahwe maka nandangi ikernepkenNa kota Sodom ras Gomora. Engkai? Mbiar ia kalak si mehuli ikut kernep ras kalak si jahat. Banci saja latih akapna ngukuri Lut anak seninana, ras keluargana, si tading i Sodom. Tapi Abraham tek man Jahwe, ”Hakim kerina doni,” emaka alu meteruk ukur iturikenna man Jahwe kerna kearun atena. Alu sabar icidahken Jahwe maka Ia perkuah ate. IjelaskenNa maka sope lenga ilakokenNa penghakimen, idaramiNa lebe kalak si mehuli janah iselamatkenNa.​—Kej. 18:22-33.

12, 13. (a) Uga pemeteh ras pengalamen terbukti banci nampati Abraham? (b) Kai buktina Abraham tek man Jahwe?

12 Jelas me, kerina pemeteh ras pengalamen si idatken Abraham nampati ia njaga hubungenna ras Jahwe tetap paguh. Emaka, paksa ipindo Jahwe gelah Abraham ngkorbanken anakna, ietehna maka Jahwe pasti lalap sabar, perkuah, banci iteki, janah lalap ngelindungi ia. Tek Abraham maka labo mungkin Jahwe rempet jadi kejam ntah pe kasar! Engkai maka banci bage ninta?

13 Sope nadingken dua suruh-suruhenna, nina Abraham, ”Timai kena i jenda ras kelede e. Aku ras anakku lawes ku jah ersembah, kenca bage mulih ka kami kari.(Kej. 22:5) Kai maksud Abraham? Erbual nge ia paksa ngataken ia mulihken ka ras Isak, sabap ietehna maka nandangi ipersembahkenna anakna? Lang. Nina Pustaka, tek Abraham maka Jahwe ngasup mpekeke Isak i bas kematen nari. (Oge Heber 11:19.) Igejapkenna ka maka Jahwe si erbanca ia ras Sara banci mupus amin gia ia nggo metua. (Heb. 11:11, 12, 18) Emaka isedarina, la lit si la mungkin bas Jahwe. La ieteh Abraham kai si nandangi terjadi i bas wari e. Tapi tek ia maka Jahwe ngasup mpekeke anakna gelah kerina janji Dibata terjadi. Eme alasenna Abraham igelari, ”Bapa nandangi kerina kalak si tek man Dibata.”

14. Kai saja tantangen si niadapindu i bas ngelayani Jahwe, janah uga usihen Abraham banci nampati kam?

14 Gundari, la ipindo Jahwe kita  ngkorbanken anakta, tapi ipindoNa gelah sipatuhi perentahNa. Maun-maun la siangkai alasen kerna ngkai perentah-perentah e iban ntah pe mesera siakap matuhisa. Pernah nge bage pengakapndu? Piga-piga kalak mesera akapna erberita. Banci saja mela ntah pe mesera akapna ngerana man kalak si lenga itandaina. Si deban mbiar beda i bas ingan erdahin ntah pe i sekolah. (Kel. 23:2; 1 Tes. 2:2) Paksa kam ipindo ngelakoken sada hal si mesera, cuba ukuri usihen si itadingken Abraham kerna sifatna si perpang bage pe kinitekenna si luar biasa. Paksa siukuri alu mbages usihen si itadingken dilaki ras diberu si setia, enda ngiahken kita guna ngusih ia janah reh deherna ras Temanta, Jahwe.​—Heb. 12:1, 2.

PERTEMANEN SI MEREKEN PASU-PASU

15. Engkai maka kita tek Abraham la pernah erkadiola erkiteken patuh man Jahwe?

15 Pernah nge Abraham erkadiola erkiteken patuh man perentah Jahwe? Nina Pustaka si Badia, ”Abraham mate kenca ia enggo metua kal” janah puas kal akapna. (Kej. 25:8) Amin pe umurna 175 tahun, igejapken Abraham kepuasen paksa iukurina kerna kegeluhenna. Engkai? Erkiteken hubungenna si rembak ras Jahwe terus jadi hal si penting kal i bas geluhna. Tapi, paksa sioge kerna Abraham si nggo ”metua kal” janah puas kal iakapna, enda labo ertina ia la nggit nggeluh bas wari si pepagi.

16. Keriahen ukur kai saja si banci igejapken Abraham bas Pardis?

16 Nina Pustaka si Badia, ”Abraham nimai kuta si enggo irencanaken dingen ipanteki Dibata, e me kuta si nteguh palasna.” (Heb. 11:10) Tek Abraham maka i bas sada wari pagi banci idahna kuta e, Kinirajan Dibata, si merentah doni. Janah pasti idahna! Bayangken uga riahna ukur Abraham banci nggeluh i doni si jadi pardis janah terus mpegegehi hubungenna si rembak ras Dibata. Pasti meriah kal ukurna meteh maka usihen kiniteken si itadingkenna nampati umat Dibata sedekah ribun tahun! I bas Pardis pagi ietehna maka persembahenna i bas Deleng Moria nggambarken sada hal si ndauh terbelinen. (Heb. 11:19) Janah ietehna ka maka uga suina paksa iberekenna anakna Isak guna ikorbanken banci nampati kalak si setia ngangkai uga suina iakap Jahwe paksa iberekenNa AnakNa, Jesus Kristus, jadi tebusen manusia. (Joh. 3:16) Usihen si itadingken Abraham nampati kita kerina gelah lebih ngergai tebusen, bukti kekelengen simbelinna kal si pernah lit!

17. Kai tekadta, janah kai si man bahasenta bas artikel selanjutna?

17 Mbera kita kerina ertekad guna ngusih kiniteken Abraham. Bali bagi ia, kita pe merluken pemeteh ras pengalamen. Asum kita terus erlajar kerna Jahwe janah patuh man baNa banci sigejapken sendiri pasu-pasu ras perlindungenNa. (Oge Heber 6:10-12.) Mbera Jahwe jadi Temanta seh rasa lalap! I bas artikel selanjutna, banci sibahas telu nari contoh kalak si setia si jadi teman Dibata.

^ [1] (paragrap 3) Tangtangna gelar Abraham ras Sara eme Abram ras Sarai. Tapi i bas artikel enda sigunaken gelar si ibereken Jahwe man kalak enda eme Abraham ras Sara.