Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 ARTIKEL PELAJAREN 15

Usihlah Jesus Gelah Tetap Dame Pusuhta

Usihlah Jesus Gelah Tetap Dame Pusuhta

‘Kedamen i bas Dibata nari si banci naluken perukuren kai pe ngarak-ngarak pusuh kena.’​—PIL. 4:7.

LAGU 113 Sigejapken Dame

SI IBAHAS *

1-2. Engkai maka latih kel ukur Jesus?

I BAS wari terakhir Jesus i doni, latih kel ukurna. Lanai ndekah, isiksa janah ibunuh kalak si jahat me ia. Tapi labo e saja si man ukurenna. Keleng kel atena Bapakna janah meriah atena ibanna ukur Bapakna e. Iteh Jesus maka adi tetap ia setia amin pe ngadapi masalah si mberat, banci ibuktikenna maka kerina bual kerna Jahwe e salah janah Jahwe ngenca si patut imuliaken. Selain si e, keleng ate Jesus manusia. Itehna banci kita nggeluh rasa lalap adi tetap ia setia man Jahwe seh ngasa mate.

2 Tetap dame pusuh Jesus amin gia latih kel iakapna. Nina man rasul-rasulna, “Kubereken man kena kedamenku.” (Joh. 14:27) Lit bas ia “kedamen i bas Dibata nari,” eme perasan tenang si igejapken kalak si ndeher ras Jahwe. Kedamen e me si erban tenang pusuh ras perukuren Jesus.​—Pil. 4:6, 7.

3. Kai si man bahasenta bas artikel enda?

3 Labo lit arah kita si ngadapi masalah bagi si iadapi Jesus. Tapi kerina si ngikutken Jesus pasti ngadapi tentangen. (Mat. 16:24, 25; Joh. 15:20) Janah bagi Jesus, mon-mon latih kel ukurta. Kai si banci silakoken gelah ula kita kuatirsa janah tetap dame pusuhta? Mari sibahas telu hal si ilakoken Jesus sanga ngelayani i doni janah uga carata ngusih ia sanga lit masalahta.

 JESUS RUSUR ERTOTO

Banci tetap dame pusuhta adi kita ertoto (Nen paragrap 4-7)

4. Kai saja buktina Jesus rusur ertoto bas wari terakhirna i doni? Janah bas 1 Tesalonika 5:17, pedah kai si bas pudi wari ibereken man kalak Kristen?

4 Baca 1 Tesalonika 5:17. Rusur Jesus ertoto bas wari terakhirna i doni. Sanga ipetandakenna man murid-muridna cara mperingeti kematenna, itotokenna roti ras anggur. (1 Kor. 11:23-25) Sope lawes kalak e arah inganna ngerayaken Paskah, ertoto Jesus ras murid-muridna. (Joh. 17:1-26) Sanga seh kalak e i Deleng Saitun bas berngi e, ertoto Jesus piga-piga kali. (Mat. 26:36-39, 42, 44) Janah sope Jesus mate pe, ertoto ka ia. (Luk. 23:46) Iceritaken Jesus man Jahwe kerina si terjadi bas wari terakhirna i doni arah toto.

5. Engkai maka mbiar rasul-rasul?

5 Salah sada si erbanca Jesus tetap setia eme perban rusur ia ertoto janah pindona penampat Bapakna. Tapi rasul-rasulna la terus ertoto bas berngi e. Akibatna, mbiar kalak e sanga lit tentangen. (Mat. 26:40, 41, 43, 45, 56) Sanga kita pe ngadapi tentangen, banci kita tetap setia adi siusih Jesus janah ‘terus ertoto.’ Kai saja si banci sitotoken?

6. Engkai maka adi erkiniteken kita banci tetap dame pusuhta?

6 Banci sitotoken gelah ‘ipegegehi Jahwe kinitekenta.’ (Luk. 17:5; Joh. 14:1) Arus kita erkiniteken perban icubai Setan me kerina pengikut Jesus. (Luk. 22:31) Engkai maka adi erkiniteken kita banci tetap dame  pusuhta aminna pe la erngadi-ngadi masalahta? Adi nggo siusahaken kel ndungi masalahta, banci kita lanai kuatir perban tek kita maka pasti sampati Jahwe kita bas waktu si tepat. Tek kita maka iteh Jahwe cara si mehulina bas ndungi masalahta, emaka dame me pusuh ras perukurenta.​—1 Pet. 5:6, 7.

7. Kai si ipelajarindu arah pengalamen Robert?

7 Adi ertoto kita, banci tetap dame pusuhta la soal kai pe masalahta. Perdiateken pengalamen Robert, sekalak pertua si setia si umurna 80-en. Nina, “Pedah si lit bas Pilipi 4:6, 7 nampati aku ngadapi melala masalah bas geluhku. Pernah mesera kel pergeluhku. Pernah ka aku ngadi ngelayani jadi pertua.” Kai si erban pusuh Robert tetap dame? Nina, “Sanga mulai aku kuatir, mis aku ertoto. Tek aku adi reh rusurna janah reh tutusna ateku ertoto, reh tenangna me kuakap.”

JESUS SEMANGAT ERBERITA

Banci tetap dame pusuhta adi kita erberita (Nen paragrap 8-10)

8. Menurut Johanes 8:29, kai nge alasen si deban maka banci tetap dame pusuh Jesus?

8 Baca Johanes 8:29. Banci tetap dame pusuh Jesus aminna pe ia isiksa, perban itehna maka meriah ibanna ukur Bapakna. Tetap ia patuh sanga mesera akapna ngelakokenca. Keleng atena Bapakna janah ngelayani Jahwe me si pentingna bas geluhna. Misalna, ope lenga reh ku doni, Jesus  kap sierdahin Dibata janah beluh kel ia erdahin. (Kua. 8:30, Terjemahan Dunia Baru) Janah sanga i doni, semangat kel ia ngajarken kerna Bapakna man kalak si deban. (Mat. 6:9; Joh. 5:17) Enda erbanca meriah kel ukur Jesus.​—Joh. 4:34-36.

9. Engkai maka banci dame pusuhta adi sibuk kita erberita?

9 Siusih Jesus adi patuh kita man Jahwe janah ‘terus sibuk i bas ndahiken dahin Tuhan.’ (1 Kor. 15:58) Adi ‘sibuk kita mberitaken’ berita si meriah, banci tetap positip perukurenta aminna pe lit masalahta. (Perb. 18:5) Misalna sanga kita erberita, rusur siidah beraten masalah kalak asangken masalahta. Tapi adi keleng ate kalak e man Jahwe janah idalankenna pedahNa, reh ulina me geluh kalak e janah reh riahna ukurna. Sanga siidah si bage, reh tekna kita maka iperdiateken Jahwe kita. Enda me si erbanca tetap dame pusuhta. Lit sekalak turang seninata si terus erjuang perban la merga akapna bana janah stres ia. Nina, “Adi sibuk aku erberita, ngasup aku ngkuasai perasanku janah reh riahna me ukurku. Sanga erberita, ndeher kel kuakap aku ras Jahwe.”

10. Kai si ipelajarindu arah pengalamen Brenda?

10 Perdiateken ka pengalamen sekalak turang seninata si gelarna Brenda. Mekelek pinakitna bage pe anakna si diberu. Brenda terpaksa make kursi roda janah la kesahna erkai pe. Adi ngasup, erberita ia arah rumah ku rumah, tapi rusuren ia erberita alu surat. Nina, “Kuteh nge maka labo banci aku malem gundari, emaka tutus kel ateku erberita. Malahen sanga erberita, lanai kuukuri kel masalahku. Si kuukuri eme uga aku banci nampati kalak si nggo kudahi sanga erberita bage pe kalak si nggo kukirim surat bas daerah runggun kami. Janah sanga erberita aku, lalap kuukuri arapen bas masa depan.”

JESUS NGGIT ISAMPATI TEMANNA

Banci tetap dame pusuhta adi erteman kita ras kalak si mehuli (Nen paragrap 11-15)

11-13. (a) Kai nge buktina rasul-rasul ras kalak si deban tuhu-tuhu jadi teman man Jesus? (b) Kai nge pengaruh teman-teman Jesus man bana?

11 Sanga Jesus erberita, rasul-rasulna si setia tuhu-tuhu jadi temanna. Kalak e bali bagi teman si ikataken bas Pustaka, “Lit ka teman meriah deheren asangken ersenina.” (Kua. 18:24) Meherga kel iakap Jesus teman si bage. Sanga ngelayani i doni, la lit seninana si erkiniteken man bana. (Joh. 7:3-5) Pernah ka iakap keluargana Jesus e nggo adon. (Mrk. 3:21) Tapi rasul-rasulna si setia la bage. Bas berngi sope Jesus mate, ikatakenna man kalak e, “Kena me si lalap ras aku paksa kuadapi percuban.”​—Luk. 22:28.

12 Piga-piga kali kecewa Jesus iban rasul-rasul, tapi ilupakenna salah kalak e, si ingetna eme kiniteken kalak e man bana. (Mat. 26:40; Mrk. 10:13, 14; Joh. 6:66-69) Bas berngi sope Jesus iukum mate, ikatakenna man rasul-rasulna si setia, “Kugelari kena teman-temanku, perban nggo kupebetehken man kena kerina si nggo kubegi arah Bapakku nari.” (Joh. 15:15) Pasti terpegegehi kel Jesus iban teman-temanna e. Meriah kel akap Jesus  perban isampati kalak e ia bas pelayanenna.​—Luk. 10:17, 21.

13 Selain rasul-rasulna, lit ka teman Jesus si deban. Isampati kalak e Jesus bas dahin erberita bage pe alu cara si debanna. Lit si ngundang Jesus man ku rumahna. (Luk. 10:38-42; Joh. 12:1, 2) Lit ka si ikut erberita ras Jesus janah nggit mereken erta-ertana. (Luk. 8:3) Lit teman Jesus si mehuli, perban ia pe jadi teman si mehuli man kalak e. Mehuli perbahanen Jesus man kalak e janah la iarapkenna kai si la ngasup ilakoken kalak e. Amin gia Jesus sempurna, tapi iergaina penampat teman-temanna si la sempurna. Pasti isampati kalak e Jesus gelah tetap dame pusuhna.

14-15. Uga carana gelah lit temanta si mehuli, janah uga cara kalak e nampati kita?

14 Teman si mehuli nampati kita tetap setia man Jahwe. Cara ndatken teman si mehuli eme alu jadi teman si mehuli. (Mat. 7:12) Iahken Pustaka kita gelah sigunaken waktu ras gegehta guna nampati kalak si deban, khususna nampati kalak “si merluken.” (Ep. 4:28) Lit nge kalak bas runggunndu si banci isampatindu? Misalna, adi lit turang seninata si lanai ngasup ndarat rumahna nari perban nggo metua ntah pe sakit, banci sampatindu ia guna belanja. Banci ka sikapkenndu pangan man turang seninata si mesera pergeluhna. Janah adi itehndu cara nggunaken jw.org®  bage pe JW Library®, banci ajarindu turang seninata nggunakenca. Adi sibuk kita nampati kalak si deban, reh riahna me ukurta.​—Perb. 20:35.

15 Sanga lit masalahta, pasti isampati temanta kita gelah tetap dame pusuhta. Sanga iceritaken Jop masalahna, nggit Elihu megikenca. Bage ka pe, sanga situriken masalahta, sabar temanta megiken kita. (Jop 32:4) Ula siarapken temanta si erban keputusen man banta, tapi mehuli adi sibegiken nasehat kalak e arah Pustaka. (Kua. 15:22) Janah bagi Raja Daud si nggit ngaloken penampat temanna alu meteruk ukur, kita pe ula min gengsi ngaloken penampat arah temanta. (2 Sam. 17:27-29) Teman si bage tuhu-tuhu hadiah arah Jahwe.​—Jak. 1:17.

CARA GELAH TETAP DAME PUSUHTA

16. Menurut Pilipi 4:6, 7, erkelangken ise nge maka banci sidat kedamen? Jelasken.

16 Baca Pilipi 4:6, 7Engkai maka bas ayat e ikataken banci sidat kedamen bas Jahwe nari “erkelangken Kristus Jesus”? Perban adi siangkai kai saja tugas Jesus janah tek kita man bana, banci tetap dame pusuh ras perukurenta. Misalna, arah korban tebusen Jesus, kerina dosata banci iampuni. (1 Joh. 2:12) Sanga siukuri kerna si e, malem kel pusuhta! Selaku Raja Kerajan Dibata, imasapken Jesus pagi kerina kesusahenta si iban Setan ras doni si jahat enda. (Jes. 65:17; 1 Joh. 3:8; Ket. 21:3, 4) Luar biasa kel arapen e! Janah amin gia ibereken Jesus tugas si mesera banta, tapi tetap ia ras kita janah isampatina kita bas wari-wari pendungi enda. (Mat. 28:19, 20) E erban kita reh pangna! Jelas me, kemalemen ate, arapen, ras sipat si perpang arus lit bas kita gelah banci dame pusuhta.

17. (a) Uga carana gelah tetap dame pusuhta? (b) Bagi janji si lit bas Johanes 16:33, kai nge si banci silakoken?

17 Uga carana gelah tetap dame pusuhta amin gia melala masalahta? Siusihlah Jesus. Si pertama, ertotolah. Teruslah ertoto la soal kai pe si terjadi. Si peduaken, patuhlah man Jahwe janah semangatlah erberita aminna pe mesera. Janah si peteluken, daramilah teman si banci nampati kita sanga lit masalahta. Alu bage, kedamen i bas Dibata nari ngarak-ngarak pusuh ras perukurenta. Janah bagi Jesus, pasti banci sitaluken masalahta.​—Baca Johanes 16:33.

LAGU 41 Begiken min Pertotonku

^ par. 5 Kerina kita ngadapi masalah si erban lanai dame pusuhta. Bas artikel enda sibahas telu hal si ilakoken Jesus si banci siusih gelah tetap dame pusuhta aminna pe melala masalahta.