Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Perukuren si Benar bas Ngenen Kesalahen

Perukuren si Benar bas Ngenen Kesalahen

Meriah kel ukur Don ras Margaret * sanga reh anakna ras keluargana ku rumahna. Kalak e nggo ersikap gelah radu ras man, emaka isikapken Margaret makaroni ras keju, perban eme pangan si ntabehna akap kempuna e duana.

Sanga kerina nggo kundul, ibaba Margaret pangan si nggo itanggerkenna e ras tamana i datas meja. Kenca ibukana tutup panci e, sengget kel ia. Si lit bas panci e saus keju si melas ngenca. Lupa Margaret namaken bahan utamana, eme makaroni! *

La soal umur ras pengalamenta, kerina kita banci erban kesalahen. Banci jadi perban pengerananta ntah pe perbahanenta la bas waktu si tepat, ras banci jadi perban kita menukah lupa. Engkai maka terjadi kesalahen? Uga caranta ngadapi kesalahen? Banci nge siuraki kesalahen? Alu perukuren si benar bas ngenen kesalahen kita banci ndatken jabapen kerna penungkunen e.

PERUKURENTA RAS PERUKUREN DIBATA KERNA KESALAHEN

Sanga kita erban si mehuli, pasti meriah ukurta adi iergai ras ipuji kalak perbahanenta e. Sanga kita erban kesalahen, si la isengaja ntah pe si la sieteh kalak, nggit nge kita ertanggung jabap man kesalahenta e? Iperluken sipat si meteruk rukur bas ngelakokenca.

Adi dirinta saja kenca si ukuri, banci jadi la si kataken kerina kesalahenta, sisalahken kalak si deban, ntah pe la kita nggit ngaku. Perbahanen si bagenda banci erban mbue masalah. Masalahna la banci dung, janah kalak pe lanai tek man kita. Amin pe banci sibuniken kesalahenta, arus siinget maka ”sekalak-sekalak kita arus pagi mereken pertanggung jawabenna man Dibata”.​—Roma 14:12.

Dibata ngenen kesalahen alu cara si masuk akal. Bas buku Masmur, Dibata igambarken bagi sekalak si ”perkuah dingen perkeleng”, ras ”kentisik ngenca [Jahwe] nembeh, Ia labo rasa lalap merawa”. Ietehna nge kita manusia si la sempurna ras ietehna nge kelemahenta ”ingetNa me maka abu kap kita”.​—Masmur 103:8, 9, 14.

Bagi sekalak bapa si perkeleng, iarapken Dibata kita selaku anak-anakna, ngusih Ia i bas ngenen kesalahen. (Masmur 130:3) Kata-kataNa risiken pedah si perkeleng si banci nampati kita ngatasi masalah si nggo siban ntah pe si iban kalak.

CARA NGATASI KESALAHEN

Biasana, adi lit si erban salah, melala kel waktu ras tenaga si ipake kalak guna nalahken kalak si deban, guna mbenarken kai si nggo ikataken ras si ilakokenna. Tapi, adi lit kata-katandu si erban ceda ukur kalak, pangen kam mis  mindo maaf, pekenna kesalahenndu, ras tetap jaga pertemanenndu. Lit nge kesalahen si ibanndu si ngganggu pusuhndu ntah pe pusuh kalak si deban? Asangken nembeh atendu bandu ntah pe kalak si deban, nggo nge ilakokenndu si mehulina guna mpekenasa? Adi terus si salahken kalak, enda banci erban latih siakap, ras erban reh buena masalah. Emaka pangen kita erlajar ndungi masalah e alu mehuli ras ngelupakenca.

Sanga lit si erban kesalahen, menukah kel kita kecewa. Tapi pasti jilen adi si ikutken pedah si ibereken Jesus Kristus enda, ”Bahanlah man kalak si deban bagi ngena atendu ibahanna man bandu.” (Matius 7:12) Sanga kam erban kesalahen pasti meriah ukurndu adi mehuli perbahanen kalak man bandu ras nggit ia ngalemi kesalahenndu. Emaka cidahkenlah kiniulin si seri man kalak si deban.​—Epesus 4:32.

PEDAH-PEDAH SI BANCI NAMPATI KITA MPEDAUH KESALAHEN

Nina sada kamus, kesalahen lit perban ”salah sangka, kurang pemeteh, ntah pe perban la mediate”. Arus si akui maka i bas sada paksa kita kerina pasti erban salah sada kesalahen bagi si ituriken i kamus e. Amin pe bage, banci si pedauh kesalahen alu mpelajari piga-piga pedah si lit i bas Pustaka.

Salah sada pedah e icatat i bas Kuan-kuanen 18:13, nina i je, ”Dengkehken lebe ope denga njabap, adi la bage ibahanndu, bodoh dingen ihinandu kalak.” Payo, adi tutus ateta megiken kai kin situhuna terjadi ras ngukuri kai si cocok man lakonken, enda banci nampati kita gelah ula asal ngerana ntah pe ngikutken ukurta saja. Pemeteh si idat perban megiken alu tutus, tuhu-tuhu penting kel gelah ula salah sangka ras mpedauh kesalahen.

Pedah si deban bas Pustaka eme, ”Asa ngasupndu usahakenndulah gelah meriah kam ras kerina kalak.” (Roma 12:18) Lakokenlah si mehulina gelah banci erdame ras kompak ras si deban. Sanga erdahin ras kalak si deban, mediate ras mehamatlah kam, puji ras berekenlah semangat man kalak e. Alu bage, adi lit si erban salah reh nukahna ngampuni ras ngelupaken kesalahen e, janah kesalahen si serius pe banci idungi ras ipehuli alu cara si mehuli.

Banlah kesalahen e jadi sada pelajaren si mereken pengaruh si mehuli man bandu. Asangken ndarami alasen kerna kai si ikatakenndu ras si ilakokenndu, banlah enda jadi kesempaten guna mpehuli sipat-sipatndu. Perlu nge kam jadi kalak si lebih sabar, mehuli, ntah pe ngasup ngkuasai diri? Uga kerna sipat si lembut, dame, ras perkeleng, perlu denga nge iusahakenndu sipat-sipat e? (Galati 5:22, 23) Silang-langna nggo ipelajarindu kai si la banci ilakokenndu bas waktu si reh. Cubakenlah gelah ula seriussa, enda labo ertina kita kalak si la ertanggung jabap. Perlu ka nge lit selera humorta gelah ula nukah kita emosi.

MANPAAT ARAH PERUKUREN SI BENAR

Adi lit bas kita perukuren si benar bas ngenen kesalahen, enda banci nampati kita ngatasi masalah alu cara si mehuli. Kita pe banci erdame ras dirinta bage pe kalak si deban. Adi erlajar kita arah kesalahenta, enda banci erban kita reh pentarna ras reh riahna kap kalak ras kita. Enda pe banci erban lanai kitik ukurndu ntah pe lanai isalahkenndu dirindu. Alu meteh maka kalak si deban pe erjuang bas ngatasi kesalahenna, enda erban kita banci rembak ras ia. Si terpentingen asa si e eme, banci si dat manpaat perban si usih Dibata si perkeleng ras si nggit ngalemi.​—Kolose 3:13.

Payo nge kesalahen Margaret si ituriken ndai jadi kenangen buruk man keluarga e? Lang. Enda jadi pengalamen si lucu man kalak e, kususna man Margaret, janah meriah ukur kalak e man pangan ndai amin gia la pake makaroni! Piga-piga tahun kenca si e, ituriken dua kempuna e kerna pengalamenna si la terlupaken e man anak-anakna ras i inget kalak e lalap kenangen ras nini bulangna e. Dungna, enda jadi sada kesalahen saja ngenca!

^ par. 2 Gelar nggo iganti.

^ par. 3 Makaroni ras keju biasana ihidangken alu cara makaroni e itama saus keju idatasna.