Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PENUNGKUNEN SI NGOGE . . .

Tuhu nge Natal e Wari Raya Kalak Kristen?

Tuhu nge Natal e Wari Raya Kalak Kristen?

Erjuta kalak i sebelang doni tek maka Natal e iban guna ngerayaken wari kelahiren Jesus Kristus. Tapi, pernah nge ietehndu kalak Kristen abad si pemena, si ndeher ras Jesus ngerayaken Natal? Janah tehndu nge kai nina Pustaka kerna ngerayaken wari kelahiren? Alu meteh jabapen arah penungkunen-penungkunen e, banci si eteh payo ntah lang Natal e perayan kalak Kristen.

Si pemena, la lit ituriken bas Pustaka kerna perayan kelahiren Jesus ntah pe si irayaken kalak si setia nembah Dibata. Dua kalak ngenca si ngerayaken wari kelahiren si ituriken bas Pustaka. Kalak e duana labo nembah Jahwe, Dibata si benar bas Pustaka. Janah bas perayan si iban kalak e terjadi ka perbahanen si jahat. (Kejadin 40:20; Markus 6:21) Sentudu ras si ituriken bas Encyclopædia Britannica, kalak Kristen bas abad si pemena nulak ”ngerayaken wari kelahiren, si rehna arah kalak si nembah berhala”.

Tanggal piga kin Jesus lahir?

La lit ituriken bas Pustaka kerna tanggal kelahiren Jesus. Nina Cyclopedia si iban McClintock ras Strong, ”La lit bukti maka wari kelahiren Kristus ituriken bas P[adan] si M[baru], ntah pe arah sumber si deban.” Payo, adi merhat kin Jesus gelah irayaken pengikutna wari kelahirenna, pasti iturikenna man kalak e tanggal piga ia lahir.

Si peduaken, la lit ituriken bas Pustaka kerna Jesus ntah ise pe arah pengikutna si ngerayaken wari Natal. Bagi si ituriken bas New Catholic Encyclopedia, perayan Natal tangtangna ituriken ”bas Chronograph si iban Philocalus, eme kerna penanggalen Roma, si isina ibuat arah tahun 336 M”. Jelas me si eteh maka wari Natal irayaken kenca Pustaka dung itulis janah erabad-abad kenca jaman Jesus. Enda me sebapna maka ikataken McClintock ras Strong, ”Wari Natal labo perayan si reh arah Dibata janah la lit i bas P[adan] si M[baru]”. *

Perayan kai nge si isuruh Jesus ilakoken pengikutna?

Selaku sekalak Guru si beluhna, ibereken Jesus petunjuk si jelas kerna kai si arus ilakoken pengikutna janah enda itulis bas Pustaka. Tapi la pernah lit isuruhna ngerayaken wari Natal. Bagi sekalak guru sekolah si la meriah ukurna ngenen muridna si ngelanggar petunjuk si iberekenna, Jesus pe la nggit adi pengikutna ’ngelanggar batas-batas si tersurat’ i bas Pustaka.​—1 Korinti 4:6.

Selain si e, lit sada perayan si penting si terus ilakoken kalak Kristen bas abad pemena eme, mperingeti wari Kematen Jesus. Ituriken Jesus man pengikutna ndigan ras uga cara ngerayakenca. Petunjuk si iberekenna kerna tanggal kematenna ituriken alu tangkas bas Pustaka.​—Lukas 22:19; 1 Korinti 11:25.

Nggo sieteh maka wari Natal e eme perayan wari kelahiren. Kalak Kristen bas abad si pemena la nggit ngikuti perayan si rehna bas kalak si nembah berhala. Selain si e, la lit ituriken bas Pustaka maka Jesus ntah pe pengikutna ngerayaken wari Natal. Perban meteh kerna si e, lit erjuta kalak Kristen i sebelang doni si la ngerayaken Natal.

^ par. 6 Guna ndatken terbuen keterangen kerna janari rehna perayan Natal e, nen topik ”Pembaca Bertanya . . . Apa Saja Fakta tentang Natal?” bas Menara Pengawal terbiten 1 Desember 2014, i bas www.jw.org/id.