Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 TOPIK UTAMA | MALEKAT—TUHU NGE LIT? ENGKAI MAKA PENTING SIETEH?

Banci nge Ipengaruhi Malekat-Malekat Kegeluhenndu?

Banci nge Ipengaruhi Malekat-Malekat Kegeluhenndu?

Bas wari Minggu karaben, Kenneth ras Filomena si tading i Curaçao lawes ndahi sada keluarga si erlajar Pustaka ras ia.

Nina Kenneth, ”Paksa seh kami, tutup pintun rumahna janah motorna pe la i je. Tapi tersuruh ukurku nelpon ndeharana.”

Iangkat diberu e teleponna janah ikatakenna maka perbulangenna paksana erdahin. Tapi, paksa ieteh diberu e maka Kenneth ras Filomena nggo i lebe-lebe rumahna, ibukana pintu janah isuruhna masuk.

Ieteh kalak e maka diberu e edenga ngandung. Paksa ibenaken Kenneth atena pelajaren Pustaka alu ertoto, ngandung ka mulihi diberu e. Emaka alu manjar-anjar isungkuni Kenneth ras Filomena diberu e kai masalahna.

Ituriken diberu e maka bunuh diri atena wari e, janah paksa itulisna surat man perbulangenna reh telpon arah Kenneth, si erban surut ukurna. Ituriken diberu e man kalak e maka stres kel akapna erkiteken perbebenna, emaka iapuli kalak e ia arah Pustaka si Badia. Pedah-pedah e tuhu-tuhu nelamatken kegeluhen.

”Bujur kel ning kami man Jahwe perban nggo iberekenNa kami nampati diberu si putus asa e, terlebih nggo teriahken kami nelpon diberu e, banci jadi e erkiteken malekat ntah kesahNa si badia,” nina Kenneth!” *

Tuhu nge Kenneth ras Filomena tek nandangi penampat Dibata si reh arah malekat ntah pe kesahNa si badia? Ntah rembang saja nge lit ukur Kenneth nelponca?

La sieteh uga situhuna. Tapi sieteh maka ipake Dibata malekat-malekat guna nampati kalak bas kerohanin. Contohna, bas Pustaka ituriken maka isuruh Dibata sada malekat ngiahken Pilipus sekalak perberita guna nampati sekalak Etiopia.​—Perbahanen Rasul-Rasul 8:26-31.

Mbue agama si ngajarken kiniteken nandangi gegeh si la teridah, lit si nggambarkenca gegeh e mehuli ras ndalanken peraten Dibata ntah pe banci ngkawali sekalak jelma. Nterem kalak tek maka malekat e lit janah banci nampati kita bas erbage cara. Tapi nterem ka nge si la tek maka malekat e lit.

Tuhu kin lit malekat e? Adi lit, ja nari rehna? Kai kebenaren kerna malekat-malekat e? Banci nge ipengaruhina kegeluhenndu? Mari sipereksa buktina.

^ par. 8 Bas teks asli Pustaka, gelar Dibata eme Jahwe.