Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 TOPIK UTAMA | MALEKAT—TUHU NGE LIT? ENGKAI MAKA PENTING SIETEH?

Tuhu nge Lit Malekat si Jahat?

Tuhu nge Lit Malekat si Jahat?

Ue payo, malekat si jahat e tuhu-tuhu lit. Ja nari rehna? Nggo sieteh maka paksa itepa Dibata malekat-malekat, kalak e bebas erban pilihen. La ndekah kenca dung itepa Dibata dilaki ras diberu si pemena eme Adam ras Hawa, lit sekalak arah malekat si sempurna e ngelawan Dibata janah erban pembrontaken i doni. Berhasil ia erban Adam ras Hawa ngelawan Dibata. (Kejadin 3:1-7; Ketangkasen 12:9) La ituriken Pustaka si Badia alu tangkas ise gelar malekat e janah kai pendahinna i surga ope lenga ia ngelawan man Dibata. Tapi kenca ngelawan ia man Dibata, ituriken bas Pustaka maka jadi Setan me gelarna si ertina ”Penentang” ras Iblis si ertina ”Perguak”.​—Matius 4:8-11.

Tapi labo ngayak je ngenca pembrontaken e. Bas jaman Nuah la ituriken asa buena malekat-malekat si ”tadingkenna inganna” si lit i surga. Nusur ia ku doni ras iubahna dirina jadi manusia, ilakokenna perbahanen si la mehuli ras lagu langkah si melket, si la sentudu ras sura-sura Dibata.​—Judas 6; Kejadin 6:1-4; 1 Petrus 3:19, 20.

Kai si erban malekat e jadi jahat? Paksa ikernepken Dibata kalak jahat i doni enda alu banjir si mbelin, itadingken malekat e doni ras mulih ia ku alam roh. Tapi, la ipediat Dibata malekat e ”ringan i bas batas-batas kuasana si patut”. Emaka, itamaken Dibata kalak e ku keadan si iandingken bagi ”bas lubang si mbages si lanai kal langlang gelapna” si igelari Tartarus. (Judas 6; 2 Petrus 2:4) Iikutken malekat-malekat si jahat e me Setan si Iblis, ”pengulu setan”, si ”nalihken rupana gelah teridah ia bali ras malekat terang”.​—Matius 12:24; 2 Korinti 11:14.

Ituriken bas Pustaka maka Kinirajan Dibata eme pemerentahen si ni surga, nggo pajek bas tahun 1914. * Kenca si e, Setan ras malekat-malekat si jahat ipelawes i surga nari janah i doni nari ngenca ia banci ringan. Emaka melala kel kejahaten ras perbahanen si melket i doni enda, enda me buktina maka balas dendam ate malekat-malekat jahat e janah ipengaruhina atena kerina.​—Ketangkasen 12:9-12.

Amin gia bage, reh buena perbahanen si melket ras kejahaten si reh ngerina, enda mbuktiken maka lanai ndekah ikernepken me kalak e. Kentisik nari, malekat si penebu-nebu e lanai banci mpengaruhi ise pe. Kesempaten terakhir man malekat-malekat jahat e guna nguji manusia eme kenca dung pemerentahen si 1.000 tahun Kinirajan Dibata merentah bas pardis i doni. Kenca si e, ikernepken me kalak e seh rasa lalap.​—Matius 25:41; Ketangkasen 20:1-3, 7-10.

^ par. 6 Guna ndatken terbuen keterangen kerna Kinirajan Dibata, nen pasal 8 buku Kai Nina Pustaka si Badia? si iterbitken Saksi-Saksi Jahwe. Lit ka bas www.jw.org/btx.