Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Penting kel gelah mis icakapken alu terus terang

Paksa Kalak Sinikelengi Kena Penakit si Mekelek

Paksa Kalak Sinikelengi Kena Penakit si Mekelek

SENGGET kel Doreen paksa itehna perbulangenna, Wesley, si umurna 54 tahun, kena penakit tumor otak si mekelek. * Nina dokter umurna piga-piga bulan nari ngenca. Nina Doreen, ”La aku tek nandangi kai si kubegi. Erminggu-minggu dekahna aku lolah sisada. Uga maka enda terjadi man kami. La aku siap ngadapisa.”

Perasan si igejapken Doreen sada hal si wajar. Penakit si mekelek banci ngkenai kerina jelma. Patut ipujiken, melala si nggit ngerawat keluargana si mekelek penakitna. Tapi, enda jadi sada tentangen si mberat. Uga anggota keluarga banci ermediate janah mereken pengapul man keluarga si mekelek penakitna? Uga carana gelah si ngerawat ras si ngurus kalak si sakit e banci tetap sabar? Adi kalak si sakit e nggo sieteh lanai gedang umurna, kai si banci silakoken? Si pemena, mari sibahas ngkai maka ngadapi penakit si mekelek jadi sada tentangen gundari.

MASALAH SI GUNDARI

Enggo melala kemajun i bas ilmu kedokteran guna mpegedang umur. Mbarenda, nterem kalak si gendek umurna amin pe tading bas daerah si nggo maju. Melala si mate perban ugah si mekelek ntah pe perban kecelakan. Ku rumah sakit pe mesera, nterem kalak si pangen akapna irawat bage pe mate i rumah keluargana.

Gundari, perban pemeteh si reh majuna bas kedokteran, penakit si mekelek banci itambari alu meter janah banci mpegedang umur kalak si sakit. Melala kalak si kena penakit si mekelek janah nggo mbue si mate. Amin pe umurna banci ipegedang tapi penakitna lenga tentu banci ipepalem. Lit ka penakit mekelek si erban pasien la  ngasup ngurus dirina. Emaka, ngurus kalak si sakit tuhu-tuhu jadi sada tentangen.

Janah gundari, melala si nggo leben mate maka ibaba ku rumah sakit. Melala si la meteh maka kalak si sakit e nandangi mate, deba nari la ietehna kepeken si sakit e nggo mate. Perban si e, melala kalak si mbiar ngurus keluargana si sakit. Kai si banci nampati?

BAN RENCANA

Bagi si icidahken arah pengalamen Doreen, nterem kalak ceda kel ukurna paksa tehna maka kalak si ikelengina kena penakit si mekelek. Kai si banci nampati kita guna ngadapi kearunate, perasan mbiar ras ceda ate? Nina sekalak si setia man Dibata, ”Dage ajari kami ngertiken uga gendekna umur geluh kami, gelah kami jadi kalak pentar.” (Masmur 90:12) Payo, alu ertoto man Dibata Jahwe guna ’ngertiken uga gendekna umur geluhta’ banci ipakendu waktu si lit alu bijaksana ras kalak si ikelengindu.

Iperluken rencana si mehuli. Adi kalak si ikelengindu banci denga ngerana ras nggit nuriken ukurna, mehuli guna nungkuni ia kerna ise si erban keputusen adi terjadi si la iarapken. Icakapken Frank kerna ise si erban keputusen adi mesera akapna erkesah, i opname, ntah pe ise si erban keputusen kerna tambarna. Alu ncakapken kerna si e, kerina anggota keluarga banci siangkan ras la rubati kerna keputusen si iban guna pertambarna. Adi mis icakapken, anggota keluarga banci erban persikapen guna ngadapi penakit e. ”Adi melala kam dat pertenget seh me bagi si isurandu, adi la lit pertenget labo seh sura-sura.”Kuan-kuanen 15:22.

UGA CARA MEREKEN PENAMPAT

Si pentingna kel eme mereken pengapul. Kalak si tehna maka ia nandangi mate arus igejapkenna maka ia ikelengi janah labo ia sisada. Uga carana? Ogeken ntah pe endeken man ia oge-ogen ras ende-enden si banci ngapuli ras erban meriah ukurna. Melala kalak si terapuli pusuhna paksa keluargana njemak tanna ras ngerana alu manjar-anjar man bana.

Sampati ia guna nandai kalak si reh. Ikataken bas sada laporen, ”Aminna pe kerina indrana nggo ceda tapi banci denga ia erpemegi. Banci saja pemegina jelas denga amin pe pasien e teridah tunduh, emaka ula belasken kai si la atendu ibegina.”

 Adi banci ertotolah ras ia. Ituriken Pustaka si Badia sada kejadin, paksa Rasul Paulus ras teman-temanna ngadapi perbeben janah kegeluhenna pe terancam. Ku ja kalak e ndarami penampat? Ipindo Paulus man temanna, ”Kam pe isampatindu ka kami alu pertoton.” (2 Korinti 1:8-11) Mpeseh isi pusuhndu kerna perbeben ras penakit si mekelek i bas toto, tuhu-tuhu sada penampat si meherga.

KEADAN SI TUHUNA

Adi sieteh kalak si keleng kel ateta nandangi mate, pasti latih kel ukurta. La ateta mamang, perban kematen e la kin teraloken. Kita itepa labo gelah ngenanami ras ngidah kematen. (Roma 5:12) Ikataken Pustaka maka kematen e ”musuh”. (1 Korinti 15:26) Emaka labo pernah siukuri kerna kematen kalak sinikelengi.

Amin pe bage, alu ngukuri kai si banci terjadi, enda banci nampati anggota keluarga guna ngadapi kebiarenna ras erban persikapen si iperluken. Piga-piga hal si banci saja terjadi lit bas kotak si erjudul ”Minggu-Minggu Ope Kematen”. Tapi labo kerina pasien ngenanami kejadin e, janah labo arus ilakoken cara si seri bas keadan si bage. Tapi melala pasien si ngenanami kejadin si bage.

Kenca kematen sekalak si nikelengi, mehuli kel adi sihubungi teman meriah si nggit nampati. Selain si e, keluarga bage pe teman si ikut erceda ate perlu ietehna maka kalak si nggo mate e lanai bo mesui akapna. Dibata si perkeleng, Si Nepa kita mpebetehken maka ”kalak si enggo mate kai pe lanai itehna”.Pengerana 9:5.

PENGAPUL SI TUHU-TUHU

Erlajar kami ngergai penampat kalak

Ernalem man Dibata seh kel pentingna paksa lit si sakit bas keluarganta, terlebih ka paksa lit si mate bas keluarganta. Banci ipake Dibata kalak si deban bas nampati kam. Nina Doreen, ”Erlajar kami ngergai penampat kalak. Janah situhuna, melala kel penampat si ngapuli kami. Aku ras perbulangenku tuhu-tuhu nggejapken penampat arah Jahwe, si ngataken, ’Aku ras kam kap, janah Kusampati nge kam.’ Enda la terlupaken aku.”

Payo, pengapul si tuhu-tuhu rehna arah Dibata Jahwe. AngkaNa kiniseran ras perbebenta. Nggit Ia mereken penampat janah mpegegehi kita, alu bage ngasup kita ngadapisa. Erjanji Ia nasapken kematen ras mpekeke miliaren kalak si nggo mate si lit bas ingetenNa, meriah kel ukurta meteh si e. (Johanes 5:28, 29; Ketangkasen 21:3, 4) Janah kerina kalak banci ngataken, ”O kematen, i ja kemenangenndu? O kematen, i ja bisandu?”1 Korinti 15:55.

^ par. 2 Piga-piga gelar nggo iganti.