Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 TOPIK UTAMA | EMPAT SI NGERSAK KUDA—KAI PENGARUHNA MAN BANDU?

Empat si Ngersak Kuda​—⁠Ise kin e?

Empat si Ngersak Kuda​—⁠Ise kin e?

Empat si ngersak kuda e tempa erban kita bingung ras mbiar, tapi labo bage situhuna. Ngkai? Erkiteken Pustaka si Badia bage pe kejadin si terjadi gundari nampati kita guna ngangkai kai erti tep-tep si ngersak kuda e. Janah, amin gia empat si ngersak kuda e mpebetehken kerna mara si terjadi i doni, enda banci jadi berita si meriah man bandu bage pe keluargandu. Uga carana? Si pemena, mari sidarami ise kin empat si ngersak kuda e.

SI NGERSAK KUDA MBENTAR

Pengenehenen e ibenai alu kata-kata enda, ”Kunehen, janah kuidah sada kuda mbentar. Si ngersak kuda e njemak panah janah ialokenna sada mahkota. Lawes ia ndarat bagi kalak si erperang ngerebut kemenangen.”​—Ketangkasen 6:2.

Ise si ngersak kuda mbentar e? Jabapenna banci ka sidatken i bas buku Ketangkasen e. I je ia igelari ”Kata Dibata”. (Ketangkasen 19:11-13) Penggelaren e, Kata Dibata, ibereken man Jesus Kristus, erkiteken ia juru bicara Dibata. (Johanes 1:1, 14) Selain si e, ia pe igelari ”si Setia dingen Bujur” janah ”Raja i babo kerina raja, dingen Tuan i babo kerina tuan”. (Ketangkasen 19:11, 16) Lit kuasana guna ertindak selaku raja, janah labo igunakenna kuasana e alu cara si la mehuli ntah pe jahat. Tapi, turah me piga-piga pe-nungkunen.

Ise si mereken kuasa man Jesus guna naluken musuh? (Ketangkasen 6:2) Nabi Daniel ndatken pengenehenen kerna Mesias si ipeseri bagi ”sekalak manusia”, janah ibereken man bana ”kuasa, kehamaten, ras kuasa kinirajan” arah ”Ia si nggeluh rasa lalap” eme Dibata Jahwe. * (Daniel 7:13, 14) Jelas me, Dibata si Mada Kuasa si mereken hak ras kuasa man Jesus guna merentah bage pe ngelakoken penghakimen. Kuda si mbentar cocok guna nuriken perang si ilakoken Anak Dibata, erkiteken Pustaka rusur nggunaken warna mbentar guna ngelambangken kebujuren.​—Ketangkasen 3:4; 7:9, 13, 14.

Ndigan si ngersak kuda e mbenaken perdalan-enna? Perdiateken si ngersak kuda si pemena, eme Jesus, ibenakenna perdalanenna kenca ialokenna mahkotana. (Ketangkasen 6:2) Ndigan Jesus itangkuhken jadi Raja i surga? Enda labo paksa ia ku surga kenca kematenna. Pustaka ngatakenca maka Jesus nimai denga kenca si e. (Heber 10:12, 13) Jesus nampati ajar-ajarna guna ngangkai asa ndigan ia nimai ras ndigan ia mulai merentah i surga. Ikatakenna maka bas bena-bena pemerentahenna, keadan doni pasti reh cedana. Terjadi perang, kelihen, ras pinakit si mekelek. (Matius 24:3, 7; Lukas 21:10, 11) Kenca terjadi Perang Doni I bas tahun 1914, doni enda nggo seh ku ”wari-wari pendungi” eme masa si dem kiniseran bagi nina Pustaka.​—2 Timotius 3:1-5.

Jadi uga maka keadan doni enda reh cedana, labo reh ulina kenca Jesus merentah bas tahun 1914? Perban paksa si e, Jesus merentah i surga labo i doni. Kenca si e, terjadi me perang i surga. Raja si mbaru itangkuhken e, eme Jesus, si igelari ka Mikael, nampetken Setan ras malekatna si jahat ku doni. (Ketangkasen 12:7-9, 12) Kenca kejadin e, merawa kel Setan erkiteken ietehna maka waktuna lanai ndekah. Kentisik nari lanai ipediat  Dibata ia erkuasa i doni enda. (Matius 6:10) Gundari, mari sibahas kerna telu si ngersak kuda si debanna si ncidahken maka kita nggo nggeluh bas ”wari-wari pendungi”. Si ngersak kuda si pemena ituriken alu jelas ise kin ia. Tapi, si ngersak kuda si debanna ngertiken keadan si iadapi umat manusia.

SI NGERSAK KUDA GARA

”Emaka ndarat ka sada kuda gara. Si ngersak ku-da e ngaloken pedang si mbelin ras ncedai perdamen i doni, gelah manusia sibunuhen.”​—Ketangkasen 6:4.

Si ngersak kuda enda ngertiken peperangen. Icedakenna kedamen si lit bas doni enda. Bas tahun 1914, terjadi me perang doni si pemena. Kenca si e, terjadi ka perang doni si peduaken si terparahen. Lit si mperkirakenca maka kalak si mate bas perang si terjadi kenca tahun 1914 lebih 100 juta kalak buena! Janah melala kel si cacat.

Uga belinna pengaruh perang bas jamanta gundari? Enda me si pemenana i bas sejarah, lit kengasupen manusia guna ngkernepken kerina penduduk doni. Janah organisasi si njaga perdamen pe, bagi Perserikatan Bangsa-Bangsa, la ngasup mpengadi si ngersak kuda gara e.

SI NGERSAK KUDA MBIRING

”Kunehen, janah kuidah sada kuda mbiring. Si ngersak kuda e njemak sada timbangen. Kubegi bagi sada sora i tengah-tengah mahluk si empat e nari nina, ’Segantang beras gaji sada wari, telu gantang jaba gaji sada wari. Tapi ola cedaken batang seton ras batang anggur e.’”​—Ketangkasen 6:5, 6.

Si ngersak kuda enda ngertiken kelihen. Ayat enda nuriken kerna serana ndatken pangan. I je-nda ituriken erga segantang beras seri ras gaji sada wari! (Matius 20:2) Janah erga telu gantang jaba seri ras gaji sada wari. Pasti mesera kel guna ncukupi keperlun keluarga. Emaka paksa si e kerina kalak arus hemat bas nggunaken keperlunna tiap wari, si iandingken ras minak seton ras anggur si jadi keperlun pokok bas kalak Timur Tengah si mbarenda.

Mulai 1914, nggo nge siidah bukti maka si ngersak kuda si mbiring e sangana kiam? Enggo! Kira-kira 70 juta kalak mate perban kelihen bas abad si pe-20-ken. Sekalak pakar mperkirakenca, ”bas 2012-2014, lit 805 juta kalak si kekurangen gizi, kira-kira sada i bas siwah kalak i doni”. Laporen si debanna ngatakenca, ”Tiap tahun, buen kalak si mate erkiteken kelihen asangken si kena AIDS, malaria ras tuberkulosis.” Amin pe melala cara si iban guna ngatasi kelihen, tapi la lit si banci ngambati si ngersak kuda si mbiring e.

SI NGERSAK KUDA MBULAN

”Kunehen, janah kuidah sada kuda si mbulan rupana. Si ngersak kuda e gelarna Kematen, janah arah pudina ngikut Doni Kematen [Kuburen]. Man bana ibereken kuasa nandangi seperempat doni enda, guna munuhisa alu pedang, kelihen, pinakit langket-langket janah alu rubia-rubia si merawa si lit i doni enda.”​—Ketangkasen 6:8.

Si ngersak kuda si peempatken e ngertiken kematen perban pinakit ntah pe si debanna. Kenca tahun 1914, flu Spanyol munuh erjuta kalak. Pinakit enda ngelangketi kira-kira 500 juta kalak, 1 i bas 3 jelma i doni!

Tapi flu Spanyol e bena-benana denga. Iperkiraken maka ratusen juta kalak mate perban cacar bas abad si pe-20-ken. Seh asa gundari, erjuta kalak mate erkiteken AIDS, tuberkulosis, ras malaria, amin pe nggo mbue ipelajari bas bidang kedokteran.

 Perang, kelihen, bage pe pinakit seri kedungenna, eme kematen. Kerina si mate ipepulung ku ingan si la mereken arapen, eme Kuburen.

WARI SI MEHULI NGGO NDEHER!

Kiniseran si lit gundari lanai bo ndekah. Ingetlah enda, i bas tahun 1914 Jesus ”ndarat bagi kalak si erperang”, isampetkenna Setan ku doni, tapi Jesus lenga ndungi kemenangenna. (Ketangkasen 6:2; 12:9, 12) Kentisik nari, i bas Harmagedon, imasapken Jesus me pengaruh Setan janah ikernepkenna kerina manusia si ngikutken Setan. (Ketangkasen 20:1-3) Jesus labo saja mpengadi telu si ngersak kuda e tapi ipekenana si nggo ceda. Uga carana? Perdiateken janji Pustaka enda.

Perang igantiken alu perdamen. ’Ipengadi Jahwe perang i belang-belang doni enda, panah iripukkenNa’. (Masmur 46:10) Janah man kalak si ndarami dame, ”inanamina kedamen ras kesenangen”.​—Masmur 37:11.

Kelihen igantiken alu pangan si simpar. ”Mbuahlah page i belang-belang negeri, uruk-uruk dem alu ulih juma”.​—Masmur 72:16.

Kentisik nari ipekena Jesus kerina si ceda iban telu si ngersak kuda e

Pinakit ras kematen igantiken alu kesehaten si serta ras kegeluhen si rasa lalap. ”Iapusi Dibata me kerina iluh anak-anakNa e. Lanai pagi lit kematen, ceda-ate, tangis ntah pe si mesui”.​—Ketangkasen 21:4.

Paksa Jesus i doni, icidahkenna uga pagi keadanna paksa ia merentah. Ipebetehkenna uga ndatken kedamen, nterem kalak iberena man, ipepalemna kalak si sakit, janah ipekekena kalak si mate.​—Matius 12:15; 14:19-21; 26:52; Johanes 11:43, 44.

Meriah ukur Saksi-Saksi Jahwe mpebetehken arah Pustakandu uga carana gelah banci kam ersikap ope seh kedungen doni enda. Nggit nge kam meteh terbuen kerna si e?

^ par. 7 Jahwe eme gelar Dibata i bas Pustaka.