Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Masa Depanndu, Pilihenndu!

Masa Depanndu, Pilihenndu!

TUHU NGE BANCI KAM SI MILIHSA MASA DEPANNDU? Piga-piga kalak tek maka Dibata nge si nentuken pergeluhna, labo banci ia si milihsa. Sanga la banci idat kalak e tujunna, pasrah ia janah nina, “Nggo kin bage takdirku!”

Piga-piga kecewa ia sanga idahna lalap lit kekejamen ras kerina si la adil bas doni enda. Enggo erusaha kalak e gelah kegeluhenna reh ulina, tapi lalap lit perang, kejahaten, bencana alam, ras pinakit si erban rencana kalak e gagal. Dungna putus asa me kalak e, janah lanai diatena uga pagi geluhna.

Memang payo keadan erpengaruh kel man rencanandu. (Pengerana 9:11) Tapi kerna masa depanndu banci nge kam si milihsa. Bas Pustaka pe ikataken maka kam si milih masa depanndu. Perdiateken kai si ikataken Pustaka.

Ipeseh Musa, si minpin bangsa Israel mbarenda, kai si ikataken Jahwe man kalak Israel sanga kalak e bas perdalanen ku Taneh Perjanjin, “Kupepilihken man bandu, siapai atendu: kegeluhen ntah kematen, pasu-pasu Dibata ntah sumpah Dibata; kulebuh langit ras doni jadi saksi kerna pilihenndu e. E maka pilihlah kegeluhen maka kam ras kesusurenndu nggeluh. Kelengilah [Jahwe] Dibatandu, ikutken lah Ia, ras setia lah man baNa.”​Ulangen 30:15, 19, 20.

“Kupepilihken man bandu, siapai atendu: kegeluhen ntah kematen, pasu-pasu Dibata ntah sumpah Dibata; . . . E maka pilihlah kegeluhen.”​Ulangen 30:19

Payo! Ibebasken Dibata kalak Israel arah perbudaken i Mesir nari janah ijanjiken Dibata man kalak e kegeluhen si bebas ras bahagia i Taneh Perjanjin. Tapi gelah janji e banci idat kalak e, arus lit si ilakokenna. Arus ‘ipilih kalak e kegeluhen.’ Uga carana? ‘Alu ngkelengi [Jahwe], ngikutken KataNa, ras setia man baNa.’

Gundari pe ibereken Dibata pilihen si seri man bandu janah pilihenndu nentuken masa depanndu. Idatndu me kegeluhen si rasa lalap bas Pardis i doni adi ipilihndu ngkelengi Dibata, ngikutken KataNa, ras setia man baNa. Kai maksudna?

PILIHLAH NGKELENGI DIBATA

Kekelengen eme sipat utama Dibata. Itulis rasul Johanes “Dibata kekelengen kap.” (1 Johanes 4:8) E me alasenna, sanga lit si nungkun man Jesus kai perentah si mbelinna, nina Jesus, “Arus ikelengindu Jahwe Dibatandu alu kerina kegeluhenndu, pusuhndu, ras perukurenndu.” (Matius 22:37) Hubungenta ras Jahwe arus lit dasarna eme kekelengen labo perban mbiar ntah pe gelah nggo patuh saja. Engkai maka arus sipilih ngkelengi Dibata?

Kekelengen Jahwe man manusia bali bagi kekelengen orang tua man anakna. Amin gia la sempurna, perban keleng ate orang tuana, iajarina, isemangatina, idukungna, ras inasehatina anakna gelah bahagia ras sukses anakna e. Kai si iarapken orang tua arah anakna? Ikelengi janah ibegiken anakna min atena ia. La kin masuk akal akapndu adi Bapakta si sempurna si i surga ngarap gelah sikelengi Ia perban kerina si nggo ilakokenNa banta?

 IKUTKENLAH KATANA

Perban la banci langsung sibegiken sora Dibata, banci sibegiken Ia alu mbaca ras ndalanken isi Pustaka.​—1 Johanes 5:3.

Guna mbuktiken uga pentingna patuh man Dibata, nina Jesus, “Manusia arus nggeluh labo arah roti saja, tapi arah tiap kata si ibelasken Jahwe.” (Matius 4:4) Payo, penting pangan man dagingta, tapi ndauh pentingen pemeteh kerna Dibata. Engkai? Ikataken Raja Salomo si bijaksana, “Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.” (Pengerana 7:12) Pemeteh ras kepentaren si ibereken Dibata banci ngelindungi kita gundari janah banci nampati kita erban keputusen si mehuli gelah banci sidat kegeluhen si rasa lalap i doni.

SETIALAH MAN BANA

Bas perumpaman Jesus bas artikel sebelumna, nina, “Gerbang si sempit ras dalan si mesera e nuju ku kegeluhen, janah piga-piga kalak ngenca si banci ndatkenca.” (Matius 7:13, 14) Kalak si ngelewati dalan si bage, pasti perlu ia kalak si meteh dalan janah arus iikutkenna si meteh dalan e gelah banci ia seh ku tujunna eme kegeluhen si rasa lalap. Emaka arus kita lalap ndeher ku Dibata. (Masmur 16:8) Uga carana?

Sibuk kel kita tiap wari. Emaka mon-mon lanai lit waktuta ngukuri kai si ipindo Dibata gelah silakoken. Emaka ipersingeti Pustaka kita, nina, “Perdiatekenlah cara kena nggeluh, gelah kena nggeluh selaku kalak pentar, labo selaku kalak si la pentar. Gunakenlah waktu kena alu mehuli, sebap wari-wari enda jahat.” (Epesus 5:15, 16) Banci kita tetap ndeher ras Dibata adi siban hubungenta ras Ia jadi si pentingna bas geluhta.​—Matius 6:33.

KAM SI MILIHSA

Memang la banci iubahndu masa lalundu, tapi banci ipilihndu masa depan si mehuli man bandu ras kalak si ikelengindu. Ikataken Pustaka maka keleng kel ate Bapakta si i surga, Jahwe, kita, emaka ikatakenNa kai si arus silakoken. Perdiateken kai si itulis nabi Miha,

“[Jahwe] enggo nuriken man banta kai si mehuli. Si ipindo Dibata i bas kita nari e me kap, ngelakoken kai si bujur, encidahken kekelengen si tetap, dingen nggeluh alu ukur meteruk rembak ras Dibatanta.”​Miha 6:8.

Nggit nge kam ngaloken undangen Jahwe guna erdalan ras Ia ras ndatken pasu-pasu seh rasa lalap? Kam si milihsa!