Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 TOPIK UTAMA | ALOKENLAH PEMERE DIBATA SI MBELINNA

Pemere si Mehergana

Pemere si Mehergana

KAPAL kitik si lit bas tan Jordan e tempa la meherga. Tapi keleng kel atena. Nina Jordan, ”Russel, sekalak pertua, teman meriah keluargaku si merekenca bangku paksa aku kitik.” Kenca Russel mate, ieteh Jordan maka penting kepe Russel bas kegeluhen bulangna ras orang tuana perban rusur iapuli Russel kalak e paksa kiniseran. Nina Jordan, ”Gundari, reh bagesna kutandai Russel, emaka kapal si kitik e jadi hadiah si meherga si pernah kualoken.”

Pengalamen Jordan jadi gambaren maka banci saja hadiah e la meherga man piga-piga kalak. Tapi, aminna pe hadiah e murah, banci saja penting kel akap si ngalokenca. Ituriken Pustaka si Badia kerna hadiah si seh kel mehergana: ”Sabab bage pengkelengi Dibata doni enda, e maka iberekenNa anakNa sitonggal, gelah ola bene ise pe si tek man baNa, tapi gelah dat kegeluhen si tuhu-tuhu si la erkeri-kerin.”Johanes 3:16.

Lit sada hadiah si banci mere kegeluhen si rasa lalap man si ngalokenca! Lit nge hadiah si deban si bage? Aminna lit kalak si la ngakui maka meherga kel hadiah e, tapi kalak Kristen situhu-tuhu ”meherga kal” akapna. (Masmur 49:9; 1 Petrus 1:18, 19) Ibereken Dibata kegeluhen AnakNa jadi hadiah man manusia. Engkai?

Ijelasken rasul Paulus alasenna: ”Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia.” (Roma 5:12) Kenca dilaki si pemena eme Adam la patuh man Dibata, ia jadi erdosa janah maba kematen. Arah Adam, kematen ngelangketi kerina kesusurenna eme kerina manusia.

 ”Sabap upah dosa e me kematen; tapi pemere si ibereken Dibata man banta e me kegeluhen si rasa lalap i bas persadan ras Kristus Jesus.” (Roma 6:23) Gelah manusia bebas arah kematen, ikirim Jahwe anakNa si serta eme Jesus Kristus ku doni jadi tebusen. Pengorbanen e me si igelari ”tebusen”, janah ise pe si erkiniteken man Jesus banci ndatken kegeluhen si rasa lalap.Roma 3:24.

Erkiteken kerina pasu-pasu si terus ibereken Dibata man umatNa erkelangken Jesus Kristus, nina Paulus, ”Bujur ninta man Dibata kerna pemereNa si la terkataken nari uga ulina.” (2 Korinti 9:15) La terturiken uga luar biasana tebusen e. Tapi, bage buena pemere Dibata man manusia, engkai maka tebusen e si istimewana? Engkai tebusen la seri bagi pemere Dibata si debanna? * Kai si arusna silakoken kerna pemereNa e? Guna meteh jabapna si erpalasken Pustaka, ogelah dua artikel seterusna.

^ par. 8 Nggit Jesus ”ngendesken geluhna man gunanta”. (1 Johanes 3:16) Erkiteken tebusen jadi bagin bas peraten Dibata, emaka artikel enda mbahas kerna Dibata Si Mereken tebusen.