Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Sanga Mate Kalak si Keleng Atendu

Sanga Mate Kalak si Keleng Atendu

“Getem kel kuakap sanga rempet turangku mate. Piga-piga bulan kenca si e pe, banci rempet kuinget ia, janah sakit kel kuakap pusuhku bagi isayat sembilu. Mon-mon merawa ateku. Engkai maka ia arus mate? Salah kuakap bangku perban jarang kami pulung sanga ia nggeluh denga.”​—Vanessa, Australia.

ADI lit keluarga ntah pe temanndu mate, pasti lanai terturikenndu uga perasanndu. Banci jadi getem kel akapndu, melungen, la kapndu kam ngasup ndalani geluhndu, merawa kel atendu, salah kapndu bandu, janah mbiar kam. Lanai lit ertina akapndu nggeluh.

Labo salah adi ndekah pe kam erceda ate. E buktina keleng kel atendu ia. Amin pe bage, banci nge ceda atendu e tertambari?

SI BANCI ILAKOKENNDU

Amin gia la mis bene ceda atendu e, piga-piga cara enda banci ngapuli kam:

ULA TAHAN CEDA ATENDU

La seri kerina cara kalak erceda ate, bage pe uga dekahna. Tapi adi singandungken, banci salang siakap. Nina Vanessa, si iceritaken ndai, “Adi ngandung ateku, kungandungken saja. Reh nahangna kuakap.” Nina Sofía, si agina rempet mate, “Sakit kel kuakap nginget kai si nggo terjadi, bali bagi mbersihken luka si lenga malem. Seh kel suina, tapi situhuna enda erban luka e meter malem.”

TURIKEN UGA PERASANNDU

Mon-mon lit waktuna sisada atendu lebe. Tapi reh beratna ceda ate e adi sisada kam ndalanisa.  Nina Jared si umurna sepulu pitu tahun, si lanai lit bapakna, “Kuturiken uga perasanku man kalak si deban. Banci saja mamang ate kalak si megiken aku, tapi salang kel kuakap kenca nggo cerita.” Nina Janice si iceritaken bas awal majalah enda, “Terapuli kel aku kenca nggo cerita man kalak. Kepeken lit si ngangkai uga perasanku. Lanai kuakap aku sisada.”

NGGITLAH ISAMPATI

Nina sekalak dokter, “Adi kalak si erceda ate nggit isampati teman ras keluargana, biasana banci ia lebih sabar janah banci ia meter semangat mulihi.” Katakenlah man temanndu kai saja si perlu isampatina. Situhuna nggit nge kalak e nampati kam tapi banci saja la tehna kai si arus ilakokenna.​—Kuan-kuanen 17:17.

BANLAH DIBATA JADI TEMANNDU

Nina Tina, “Sanga rempet perbulangenku mate perban kanker, lanai lit temanku curhat. Emaka kai pe kuturiken man Dibata. Tiap erpagi-pagi, kupindo man baNa gelah iberekenNa aku gegeh ndalani sada wari e. Tuhu-tuhu ijawap Dibata pertotonku lebih asa si kupindo.” Mate mamak Tarsha sanga umur Tarsha 22 tahun. Nina, “Terapuli kel aku perban kubaca Pustaka tiap wari. Lit lalap si erban aku semangat.”

BAYANGKEN ADI TERJADI PAGI KEKEKEN

Nina Tina ka, “Tangtangna la kuakap aku perlu arapen kekeken. Sebap gundari nge aku perlu perbulangenku, anak-anakku pe gundari nge ia perlu bapakna. Empat tahun kenca si e me maka tuhu-tuhu kel kuarapken kekeken e terjadi. Rusur kel kubayangken jumpa ka mulihi ras perbulangenku. Dame kuakap janah meriah kel ukurku.”

Memang cara-cara enda labo mis erban bene ceda atendu. Tapi pengalamen Vanessa banci mpegegehi kam. Nina, “Tangtangna la siakap kita ngasup, tapi reh dekahna reh ulina keadanna.”

Banci jadi tedeh nge ateta lalap keluarga ntah pe temanta si nggo mate, tapi tetap nge banci kita semangat. Alu penampat Dibata, banci tetap meriah siakap ndalani geluhta radu ras teman-temanta. Lanai ndekah ipekeke Dibata me kerina kalak si nggo mate. Merhat Dibata banci idakepndu mulihi kalak si keleng atendu. I je me pagi tedeh atendu tuhu-tuhu tertambari!