Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Sanga Mekelek Pinakitndu

Sanga Mekelek Pinakitndu

“Sanga kuteh lit kanker bas paru-paru bage pe ususku, ugapa pe mate naring aku ateku. Mulih kenca rumah sakit nari, ningku bas pusuhku, ‘La pernah kusangka bage jadina. Tapi uga nari ban. Si penting gundari, uga caraku ndalanisa.’” —Linda, 71 tahun.

“Lit pinakitku si ngganggu saraf ayoku si sebelah kiri. Seh kel suina. Mon-mon stres kel aku ban suina. Megati kuakap la lit si ngangkai uga suina kuakap, janah bunuh diri saja ateku.”​—Elise, 49 tahun.

PASTI mberat kel siakap adi sakit kita ntah pe keluarga bage pe temanta. Terlebih ka adi parah pinakit e janah kedungenna mate. Labo pinakitndu saja si man adapenndu tapi perasanndu pe. Banci jadi mbiar ras kuatir kam perban arus jumpa ras dokter, bingung kam sanga ndarami pertambar si cocok bage pe biayana, ntah pe lit efek samping si igejapkenndu arah pertambar si ipilihndu. Si enda ndai kerina banci erban latih kel iakap kalak si sangana sakit.

Kai saja si banci nampati kam? Enterem kalak si tersampati perban ertoto mindo penampat Dibata  janah ibacana ka ayat Pustaka si banci ngapuli. Banci ka datndu penampat arah keluarga ntah pe teman-temanndu.

SI BANCI ILAKOKENNDU

Nina Robert si umurna 58 tahun, “Adi tek kita man Dibata, isampatiNa kita gelah banci megenggeng ngadapi pinakitta. Ertotolah man Jahwe. Pindolah kesah si badia. Turiken isi pusuhta man baNa. Pindolah gegeh gelah banci kita tetap semangat iidah keluargata, janah tetap tenang sanga ngadapi pinakit.”

Nina Robert ka, “Seh kel pentingna dukungen arah keluargata. Lit si nelpon aku tiap wari guna nungkun uga beritaku. Teman-temanku si bas daerah si deban pe isemangatina aku. Dungna, mulihken ka aku semangat ndalani geluhku.”

Adi idahindu atendu temanndu si sakit, perdiateken kai si ikataken Linda, “Situhuna kalak sakit la atena ia iban bagi kalak sakit. La atena lalap icakapken kerna pinakitna. Emaka, si deban sajalah sicakapken.”

Amin pe mekelek kel pinakitta, banci kita tetap semangat adi sipindo gegeh man Dibata, sibaca Pustaka, janah nggit kita isampati keluarga bage pe teman si ngkelengi kita.