Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

MEHERGA nge Geluhndu!

MEHERGA nge Geluhndu!

Faizal operasi jantung kenca kira-kira setahun ndeharana mate. Nina, “Sanga kubaca buku Jop bas Pustaka, kuteh dungna ngkai maka ate Jahwe lit buku e bas Pustaka. Banci kita terapuli adi sibaca cerita bas Pustaka si keadanna mirip ras keadanta. Kepeken lit denga nge gunana kita nggeluh.”

Tarsha nguda denga sanga mate mamakna. Nina, “Amin pe mbue masalahta tapi adi sitandai Dibata, lit denga nge tujunta nggeluh, lit arapenta, janah banci kita ermeriah ukur. Ngasup Jahwe nampati kita tiap wari.”

MAJALAH enda nuriken maka melala kalak si lanai ngasup ndalani geluhna perban mberat kel masalahna. Banci saja kam pe bage. Perban si e lanai akapndu lit ertina kam nggeluh janah lanai akapndu lit si ermediate man bandu. Tapi teklah, iperdiateken Dibata kam. Meherga kel kam akapNa.

Tek kel penulis Masmur 86 man Dibata. Nina, “Tupung aku i bas kesusahen, erlebuh aku man baNdu, sabap ialoiNdu kap aku.” (Masmur 86:7) Tapi banci saja kam tersungkun-sungkun, ‘Uga nge cara Dibata nampati aku?’

Memang labo mis imasapken Dibata masalahndu. Tapi arah Pustaka erjanji Ia iberekenNa kedamen ukur gelah ngasup kam ngadapi masalahndu. Nina Pilipi 4:6, 7, “Ula kena kuatir kerna kai pe, tapi i bas kerinana pesehlah pemindon kena man Dibata i bas toto janah pindolah alu ngataken bujur. Alu bage kedamen i bas Dibata nari si banci naluken perukuren kai pe, ngarak-ngarak pusuh ras perukuren kena.” Ukurindulah ayat-ayat enda gelah banci kam tek maka keleng kel ate Dibata kam.

Iperdiateken Dibata Kel Kam

“Labo sada pe perik [cipcip] e la iperdiateken Dibata. . . . Ergan nge kena asangken melala perik cipcip.”​Lukas 12:6, 7, cataten i teruh.

CUBA UKURI: Perik si la meherga iakap manusia, meherga kel iakap Dibata. Adi perik cipcip saja pe iperdiatekenNa, terlebih ka manusia. Kita me ciptan Dibata si mehergana kel. IciptakenNa kita mirip ras Ia, emaka ngasup kita ngusih sipat-sipatNa si luar biasa.​—Kejadin 1:26, 27.

“O [Jahwe], enggo iujiNdu aku, janah ietehNdu kerina kerna aku. . . . IetehNdu isi pusuhku. . . . Uji dingen datkenlah perukurenku.”​Masmur 139:1, 2, 23.

CUBA UKURI: Itandai Dibata kam. Iangkai Dibata kel uga perasanndu, itehNa kai si sangana iukurindu. Amin gia la lit kalak si banci ngangkai uga perasanndu, tapi Dibata iangkaiNa nge, janah isampatiNa ateNa kam. E buktina lit nge gunana kam nggeluh.

 Itegu-tegu janah Isampati Dibata Kam

“O [Jahwe], begiken min pertotonku, dengkehken min pingko-pingkongku. . . . Dengkehken min pingko-pingkongku, minter min aloi aku. . . . IdengkehkenNa me pingko-pingko bangsaNa si enggo itadingken.”​Masmur 102:2, 3, 18.

CUBA UKURI: Nai-nai nari nggo iperdiateken Dibata tiap manusia si mambur iluhna perban mberat kel masalahna. (Masmur 56:9) Emaka, iteh Jahwe nge tiap naktak iluhndu. Meherga kel kam i lebe-lebe Dibata, emaka ingetNa kerina si erban kam susah janah ingetNa ndigan saja kam ngandung.

‘Aku kap Dibatandu, emaka ula atendu aru. Kusampati kam, janah Aku mahanca kam megegeh. Aku kap Jahwe Dibatandu, janah Kukataken man bandu, “Ola kam mbiar, Aku nampati kam.”’​Jesaya 41:10, 13.

CUBA UKURI: Lalap nggit Dibata nampati kam. Adi ndabuh kam, iangkatNa mulihi.

Lit nge Arapen

“Keleng kel ate Dibata doni enda, emaka iberekenNa AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.”​Johanes 3:16.

CUBA UKURI: Mbelin kel kekelengen Dibata bandu, buktina iberekenNa Jesus guna nebus kam. Perban si e, banci lit arapenndu nggeluh ermeriah ukur seh rasa lalap. *

Banci saja la erngadi-ngadi masalah bas geluhndu janah la kapndu kam ngasup ndalanisa. Tapi cubakenlah mpelajari Pustaka alu tutus janah teklah man janji-janji Dibata.

^ par. 19 Guna ndatken terbuen keterangen kerna uga carana ndatken manpaat tebusen Jesus, nen video Mperingeti Kematen Jesus bas jw.org/btx. Nen bas bagin PUBLIKASI > VIDEO > PERPULUNGEN RAS PELAYANEN KAMI.