Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Ise Gelar Dibata?

Ise Gelar Dibata?

Sanga tandaindu atendu sekalak jelma, tangtangna kel isungkunndu, “Ise gelarndu?” Adi isungkunndu bage man Dibata, kai nina?

“Aku kap Jahwe. Enda me gelarKu.”​Jesaya 42:8, Terjemahan Dunia Baru (NW).

Enda denga nge begindu gelar e? Banci saja. Sebap melala penerjemah Pustaka jarang pakena gelar Dibata, lit ka si sekali pe la ipakena. Biasana igantina jadi “TUHAN.” Padahal, lebih 7.000 kali gelar Dibata itulis bas Pustaka bas bahasa aslina. Bas bahasa Heber gelar Dibata itulis empat huruf eme YHWH ntah pe JHVH. Janah mbarenda nari gelar e ibelasken jadi “Jahwe” bas bahasa Karo.

Gelar Dibata lit bas naskah asli bahasa Heber ras melala terjemahen

Dead Sea Psalms Scroll: Courtesy of the Israel Antiquities Authority

Terjemahen Tyndale 1530, BAHASA INGGRIS

Terjemahen Reina-Valera 1602, BAHASA SPANYOL

Union Version 1919, BAHASA CINA

ENGKAI MAKA GELAR DIBATA E PENTING

Penting kel gelar e akap Dibata. La lit ise pe si erban gelar Dibata, Ia sendiri si milihsa. Nina Jahwe, “Enda me gelarKu seh rasa lalap; bagenda me la banci lang Aku igelari i bas sundut ku sundut.” (Keluaren 3:15) Bas Pustaka, buen gelar e itulisken asangken penggelarenNa, misalna, Si Madakuasa, Bapak, Tuhan, ntah pe Dibata. Janah buen ka gelar e itulis asangken gelar kalak si deban, bagi Abraham, Musa, Daud, ntah pe Jesus. Tapi si pentingna, ate Jahwe itandai kalak min gelarNa e. Nina Pustaka, “Gelah ietehna maka Kam [Jahwe] si Meganjangna i datas kerina doni enda.”​—Masmur 83:19.

Penting kel gelar e akap Jesus. Bas “Doa Bapak Kami” ntah pe “Pertoton Tuhan,” iajari Jesus murid-muridna gelah ertoto, “Ipebadia min gelarNdu.” (Matius 6:9) Sanga Jesus ertoto pe, bagenda nina, “O Bapak, muliakenlah gelarNdu.” (Johanes 12:28) Si pentingna bas geluh Jesus eme mpebadiaken gelar Dibata, emaka banci ikatakenna bas totona, “Enggo kuban gelarNdu itandai kalak e janah terus kupetandaken.”​—Johanes 17:26.

 Penting kel gelar e akap kalak si nandai Dibata. Iteh umat Dibata si mbarenda maka arus ipakena gelar Jahwe gelah banci ilindungi ras iselamatken. “Gelar Jahwe e bali ras benteng si paguh. Ku je me perlawes kalak bujur gelah ia ilindungi.” (Kuan-kuanen 18:10, NW) “Ise pe si erlebuh man gelar Jahwe, iselamatken me.” (Roma 10:13) Banci teridah bas Pustaka maka gelar Dibata me si mbedaken kalak si ngelayani Ia ras si lang. ‘Tiap bangsa nembah man dibatana, tapi kita nembah man Jahwe Dibatata rasa lalap seh rasa lalap.’​—Miha 4:5; Perbahanen Rasul-Rasul 15:14.

SI BANCI SITEH ARAH GELAR E

Arah gelar e siteh uga hebatna Dibata. Enterem sarjana ngataken erti gelar Dibata eme “Ia si Erbanca Kerina Jadi.” Ikataken Dibata Jahwe erti gelarNa sanga ipetandakenNa diriNa man Musa, nina, “Aku Banci Jadi Kai Pe si AteKu Bage.” (Keluaren 3:14, NW) Arah gelar Dibata banci siteh maka Ia labo Pencipta saja. Gelar e pe ncidahken maka ngasup Ia erban diriNa bage pe ciptanNa jadi kai pe si iperluken gelah seh sura-suraNa. Penggelaren-penggelaren Dibata ncidahken keduduken, kuasa, ntah pe gegehNa. Tapi gelarNa e ngenca eme Jahwe si ncidahken kerina kerna Ia bage pe kengasupenNa.

Arah gelar e siteh maka iperdiateken Dibata kita. Arah erti gelar Dibata banci siteh maka terus iperdiateken Dibata ciptanNa, termasuk kita. Selain si e, ate Dibata sitandai min Ia emaka ipebetehkenNa gelarNa. Janah sope sisungkun pe, nggo katakenNa ise gelarNa. Jelas me, ate Dibata ula min siakap Ia hayalen saja ntah pe ndauh arah kita, tapi Dibata si tuhu-tuhu lit si banci jadi temanta.​—Masmur 73:28.

Adi sipake gelar Dibata banci kita ndeher ras Ia. Adi erteman atendu ras sekalak jelma, pasti ilebuhna atendu gelarndu. Uga perasanndu adi lalap ia la nggit make gelarndu? Pasti akapndu labo ia nggit erteman ras kam. Dibata pe bage kang. Enggo ikataken Jahwe gelarNa man manusia, janah iahkenNa kita gelah sipake gelar e. Adi silakoken e, sibuktiken maka nggit kita ndeher ras Ia. Janah Jahwe pe iperdiatekenNa “kalak si ngukuri [ntah pe, “ngergai,” cataten i teruh] gelarNa”!​—Maleaki 3:16, NW.

Si pertama kel si arus silakoken guna nandai Dibata eme meteh gelarNa. Tapi labo bias e saja. Perlu ka siteh uga sipat-sipatNa.

ISE GELAR DIBATA? Gelar Dibata eme Jahwe. Arah gelar e banci siteh maka Dibata ngasup erban sura-suraNa terjadi