Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Kai Gunana Adi Sitandai Dibata?

Kai Gunana Adi Sitandai Dibata?

Enggo siteh ise kin Dibata e. Enggo siteh arah Pustaka maka gelarNa Jahwe janah sipatNa si utama eme kekelengen. Enggo ka sibahas kai saja si nggo ilakokenNa bage pe si nandangi ilakokenNa man kerina manusia. Melala denga si perlu sipelajari kerna Dibata. Tapi, banci saja tersungkun-sungkun kam, ‘Kai gunana adi kupelajari kerna Dibata?’

Erjanji Jahwe adi sidarami Ia, “ijumpaiNa” kita. (1 Kronika 28:9) Adi siusahaken nandai Dibata banci kita jadi ‘temanNa.’ (Masmur 25:14) Luar biasa kel e! Kai saja gunana jadi teman Dibata?

Keriahen ukur situhu-tuhu. Jahwe “Dibata si ermeriah ukur.” (1 Timotius 1:11) Adi erteman kam ras Dibata janah usihndu sipat-sipatNa, banci kam tuhu-tuhu ermeriah ukur. Dungna lebih sehat perukurenndu ras dagingndu. (Masmur 33:12) Banci ka reh riahna akapndu perban nggo ilakokenndu kai si erbanca kam sehat, mehuli hubungenndu ras kalak si deban, janah nggo tadingkenndu kebiasan si salah. Pasti cocok akapndu kai si ikataken penulis Masmur, “Senang kel kuakap, adi rembak ras Dibata.”​—Masmur 73:28.

Iperdiateken Dibata kita sekalak-sekalak. Erjanji Jahwe, “Kuajarken kam dingen mataKu tetap mperdiateken kam.” (Masmur 32:8) Ertina, iperdiateken Jahwe umatNa sekalak-sekalak janah iberekenNa kai si tuhu-tuhu iperluken kalak e. (Masmur 139:1, 2) Adi nggo erteman kam ras Jahwe, banci igejapkenndu maka lalap Ia ras kam.

Masa depan si luar biasa. Labo gundari saja ngenca isampati Dibata Jahwe kam gelah meriah janah puas geluhndu. Tapi, iberekenNa ka masa depan si luar biasa. (Jesaya 48:17, 18) Nina Pustaka, “Adi itandai kalak maka Kam ngenca Dibata situhu-tuhu, janah itandaina Jesus Kristus si isuruhNdu, ialokenna me kegeluhen si rasa lalap.” (Johanes 17:3) Gundari mesera kel kegeluhenta. Tapi, arapen si ibereken Dibata banci jadi jangkar si “pasti ras paguh.”​—Heber 6:19.

Melala denga alasen ngkai maka perlu lebih sitandai Dibata janah erteman ras Ia. Guna ndatken terbuen keterangen, banci sungkunndu sekalak Saksi Jahwe ntah pe nenndu jw.org/btx bas Internet.