Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Tuhu nge Pedah Pustaka Erguna Gundari?

Tuhu nge Pedah Pustaka Erguna Gundari?

LIT SINGATAKEN LANAI. Sekalak dokter ngataken maka nggunaken petunjuk arah Pustaka, seri bagi nggunaken buku si icetak bas tahun 1920-en guna ngajar bas kelas ilmu kimia. Kalak si la tek man Pustaka ngataken maka enda seri bagi nggunaken petunjuk komputer si dekah ku komputer keluaren si terbaru. Melala kalak si erpengakap Pustaka nggo ketadingen jaman.

Engkai maka kalak si gundari perlu denga petunjuk arah buku si nggo metua e, amin doni enda nggo seh kel majuna? Adi si nen bas internet, melala kalak si terus mbagiken informasi ras petunjuk si terbaru. Bage pe, rusur ka itayangken bas TV, acara-acara si mbahas pemeteh arah ahli jiwa, penasehat i bas ndalani kegeluhen, ras penulis-penulis. Toko-toko buku pe dem alu buku si mbahas kerna carana ndalani kegeluhen.

Bas jamanta, tiap menit lit informasi si terbaru, adi bage kai nge alasenta mpelajari buku si dung itulis 2.000 tahun si lewat e? Payo nge bagi si ikataken kalak ndai, maka enda seri nge ras nggunaken petunjuk arah buku si kuno guna ngajarken ilmu kimia bage pe komputer? Situhuna perukuren si bage labo tuhu. Ilmu pengetahuan ras teknologi memang reh majuna, tapi banci nge e mereken kai si tuhu-tuhu iperluken manusia? Kerina manusia merhat kel meteh kai tujun kegeluhen enda. Ras uga carana gelah ermeriah ukur ras ndatken keamanen, arih si ersada bas keluarga, bage pe teman si mehuli.

Amin pe Pustaka nggo ndekah umurna, kerina si iperluken manusia lit ituriken i je janah labo e saja. Selain si e, buku enda rehna arah Dibata si erban kita. Buku enda pe banci mereken petunjuk si erguna bas kegeluhenta bage pe bas ngadapi masalah si terjadi. (2 Timotius 3:16, 17) Selain si e, pedah si lit i je tahan rasa lalap—petunjukna la pernah ketadingen jaman! Bagi si ikataken Pustaka, “Kata Dibata e nggeluh.”​—Heber 4:12.

Banci nge kita tek nandangi kai si ikataken Pustaka? Nggo nge ketadingen jaman buku e, ntah erguna denga nge bas kegeluhenta? Sora Ermomo enda eme edisi si istimewa perban banci nampati kam ndatken jabapen arah penungkunen e.