Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Pustaka ras Masa Depanndu

Pustaka ras Masa Depanndu

BAYANGKEN kam sangana erdalan bas sada berngi si gelap. Amin pe matawari lanai ersinar tapi la kam mbiar perban lit babandu senter si terang. Sanga senterindu ku teruh banci idahndu alu jelas kai si lit i dalan. Sanga isenterindu ku lebe banci idahndu kai si lit ilebe-lebendu.

Alu cara si seri, Pustaka banci igambarken bagi senter ndai. Bagi si ituriken bas artikel si pemena, Kata Dibata banci nampati kita meteh kai si lit ilebe-lebenta—masalah si tiap wari siadapi bas doni si la pasti enda. Tapi lit ka penampat si deban arah Pustaka. Buku enda pe ngajarken kerna masa depan man banta, si erban kita banci meteh ras ngikutken dalan si mereken keriahen ukur ras kepuasen si tuhu-tuhu. (Masmur 119:105) Uga carana?

Mari si perdiateken dua cara si lit bas Pustaka si mereken arapen man banta kerna wari si pepagi: 1 Enda nampati kita ndatken tujun nggeluh, ras 2 enda ngajari kita uga carana jadi teman Dibata seh ras lalap.

1 TUJUN NGGELUH ENDA

Pustaka mereken petunjuk si erguna bas ngadapi masalah janah labo seri ras buku si deban. Pustaka ngajari kita maka lit tujun si terulin asangken terus ngukuri dirinta saja. Alu cara bage ngenca gelah kegeluhenta tuhu-tuhu lit ertina.

Sada contohna eme pedah Pustaka enda, “Malemen kap ate i bas mere asangken i bas ngalo.” (Perbahanen Rasul-Rasul 20:35) Ingetndu denga nge ndigan terakhir kam nampati kalak si merluken? Ntah pe sanga nggit kam mere waktundu megiken temanndu si nuriken isi pusuhna? La kin kapndu enda banci erban meriah ukur kalak si deban?

Sidatken keriahen ukur si tuhu-tuhu sanga kita mere alu la ngarapken imbalen. Nina sekalak pengarang, “Adi nggit kita mere, pasti sidat terbuen asangken si nggo si bere, adi kita mere alu  la ngarapken imbalen.” Perban situhuna, sanga kita nampati, terlebih kalak si la mungkin mbalas kiniulinta, kita nggo ndatken imbalen. Kita nggo kerja sama ras Dibata janah perbahanen si mehuli e ipeseri Dibata bagi pepinjamken man baNa. (Kuan-kuanen 19:17) IergaiNa kel kiniulinta man kalak si merluken penampat, ras erjanji Ia maka iupahiNa nge kita alu simpar bas kegeluhen si rasa lalap i pardis i doni—tuhu-tuhu arapen si luar biasa kerna wari si pepagi!​—Masmur 37:29; Lukas 14:12-14. *

Si pentingen asa si e, Pustaka ngajarken maka kita banci ndatken tujun nggeluh si tuhu-tuhu alu nembah Dibata si benar eme Jahwe. Kata-KataNa ngiahken kita gelah mereken kemulian, kehamaten ras patuh man baNa. (Pengerana 12:13; Ketangkasen 4:11) Alu bage, silakoken sada hal si luar biasa perban perbahanenta si mehuli erpengaruh man Dibata. Janah situhuna, iahkenNa kita, “Jadilah pentar . . . bahanlah meriah ateKu.” (Kuan-kuanen 27:11) Cuba ukuri—sanga si ban keputusen si pentar si erpalasken pedah Pustaka, meriah ukur Bapanta si i surga. Engkai? Perban keleng ateNa kita janah meriah ukurna adi si dat manpaat bas ngikutken kataNa. (Jesaya 48:17, 18) Payo kel, la lit tujun si terulin selain banci nembah Dibata si Erdolat bas alam semesta enda ras erban meriah ukurNa.

2 ERTEMAN RAS DIBATA

Pustaka pe ngajari kita gelah banci erteman ras Dibata. Nina Pustaka, “Rembakkenlah dirindu ku Dibata, maka Ia pe ngerembakken diriNa man bandu.” (Jakup 4:8) Banci jadi la kita teksa maka banci kita erteman ras Dibata si mada kuasa. Tapi lit jaminen Pustaka man banta adi, “idarami manusia e Ia, banci idat manusia e Ia,” perban “si tuhuna Dibata e labo ndauh i bas kita nari sekalak-sekalak.” (Perbahanen Rasul-Rasul 17:27) Pustaka ngajari kita maka jadi teman Dibata me si nentuken masa depanta. Engkai maka bage?

Cuba ukuri: La lit manusia si ngasup naluken musuhta eme kematen. (1 Korinti 15:26) Tapi, Dibata nggeluh lalap. Dibata la banci mate janah sura-suraNa pe gelah kerina temanNa nggeluh rasa lalap. Arah Pustaka banci si eteh kerna peraten Jahwe man kalak si ndarami Ia. Sura-suraNa eme gelah, “Senang iakapna seh rasa lalap.”​—Masmur 22:27.

Uga cara gelah banci kam erteman ras Dibata seh ras lalap? Teruslah pelajari kerna Ia arah Pustaka nari. (Johanes 17:3; 2 Timotius 3:16) Darami penampatna guna ngangkai isi Pustaka. Ijamin Pustaka maka adi nggit kita “ertoto man Dibata” mindo kepentaren, pasti iberekenNa. * (Jakup 1:5) Emaka, teruslah dalanken si ipelajarindu, pediat Kata Dibata si jadi “tendang man nahe [ndu]” ras “nerangi dalan si dalani [ndu]”—gundari nari seh rasa lalap.​—Masmur 119:105.

^ par. 8 Guna ndatken terbuen keterangen kerna janji Dibata bas kegeluhen si rasa lalap i Pardis, nen pasal 3 buku Kai Nina Pustaka si Badia? si iterbitken Saksi-Saksi Jahwe.

^ par. 13 Saksi–Saksi Jahwe nawarken pelajaren Pustaka alu la nggalar si banci nampati kam ngangkai alu tangkas erti ayat-ayat Pustaka. Guna meteh terbuen kerna pelajaren e, nen video Uga kin Situhuna Program Pelajaren Pustaka si Badia Kami? Banci masukkendu judulna e ku bas kolom pencarian.

Dibata nggeluh lalap janah sura-suraNa pe gelah kerina temanNa nggeluh rasa lalap