Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

1 Penampat guna Mpedauh Masalah

1 Penampat guna Mpedauh Masalah

Pedah-pedah bas Pustaka reh arah Dibata janah “Erguna i bas ngajari kalak kerna si ngena ate Dibata, mandang si lepak.” (2 Timotius 3:16) Tuhu nge katana e? Mari si nen uga kepentaren bas Dibata nari nampati kalak mpedauh piga-piga masalah i bas kegeluhenna.

NAGIH MINEM ALKOHOL

Bagi pengalamen Delphine, si ituriken bas artikel sebelumna, masalah-masalah si erban latih ukurna nge si erban ia minem ngasa mabuk. Memang labo ilarang Pustaka kita minem alkohol tapi nina, “Ola pertemani kalak pemabuk.” (Kuan-kuanen 23:20) Nagih minem alkohol banci erban masalah kesehaten si serius, ncedai pertemanen, janah nggo erjuta kalak si mate tiap tahun perban si e. Alu ndalanken pedah si mehuli arah Pustaka pasti melala kel masalah si bage si banci ipedauh.

Delphine nggo gejapkenna kerna si e. Nina, “Kueteh maka masalahku labo dung alu minem-minem. Kudalanken pedah si pentar arah Pilipi 4:6, 7, si ngataken, ‘Ola aru atendu kerna kai pe, tapi . . . pindolah rusur man baNa alu pusuh si dem pengataken bujur.’ Tiap berngi, sanga latih kel ukurku ras kuatir kel aku, ertoto aku man Jahwe. Kuturiken kerina si lit bas pusuhku, kebiarenku, kesusahenku, ras ateku mesui, janah kutotoken gelah sampatiNa aku ndatken kedamen ukur ras perukuren si benar. Sanga wari nggo terang ku usahaken ngelupaken perukurenku si serbut e. Kebiasanku bas ertoto nampati aku bas ngelakoken kai si banci kulakoken, labo si la ngasup kulakoken. Lanai aku nggit minem alkohol. Perban seh kel ergana kedamen si nggo kudat, la aku nggit kebenen si e.

 LAGU LANGKAH SI LA MEHULI

Lagu langkah si la mehuli banci erban kesusahen ras ceda ate. Tapi pedah-pedah Pustaka banci nampati kita mpedauh kebiasan si salah si erban masalah, misalna, nggit nggoda lawan jenis ras nonton pornografi. Nina sekalak anak perana eme Samuel, “Nukah kel nggoda kalak, maun-maun labo perban ngena ateku ia, tapi banci kueteh adi ngena atena aku—jadi enda me si erban meriah kuakap nggoda.” Iteh Samuel maka situhuna nggo rusur ia nggoda. Amin pe labo lit ukurna, tapi alu sengaja terus ilakokenna kebiasan nggoda e. Dungna kebiasan e erban terganggu pusuhna. Emaka nina, “berbahaya kepe kebiasan e, perban situhuna enda kebiasan si mentingken diri.”

Ibaca Samuel sada artikel si lit i situs jw.org. I je idatna penjelasen arah Kuan-kuanen 20:11, si ngataken, “Sekalak anak icidahkenna ise ia, arah perbahanenna, arah kai si ibahanna ieteh kap mehuli ntah lang biakna.” Uga ayat enda banci nampati ia? Ieteh Samuel maka kebiasanna e sada perbahanen si la mehuli. Gundari ikatakenna, “Anak muda si biasa nggoda situhuna mpeturah sipat si la mehuli bas dirina, si banci erban perjabunna pagi la ermeriah ukur. Mulai ku ukuri kerna uga nge pagi perasan ndeharaku adi idahna ku goda diberu si deban. Alu ngukuri si e, erban aku tek maka kebiasan e tuhu-tuhu erbahaya. Memang labo nukah mpengadi kebiasan e.” Dungna Samuel pe berubah. Alu mpengadi kebiasanna bas nggoda, ia pe banci mpedauh lagu langkah si la mehuli.

Antonio, lit i bas keadan si erbahaya kel perban lagu langkah si la mehuli, meriah akapna nonton pornografi. Amin pe ia nggo erjabu ras diberu si ngena atena, tapi rusur denga ia nonton pornografi. Ikatakenna maka tersampati kel ia arah 1 Petrus 5:8 si ngataken, “Tenanglah kam tapi metengetlah! Sabap Iblis imbangndu e gawah-gawah ku jah ku je bagi sada singa si erngaung ndarami si man jerngemenna.” Nina Antonio, “Mbue kel gambar-gambar pornografi i sekelilingta, janah gambar e nukah kel leket bas pikirenta. Ayat enda tuhu-tuhu nampati aku guna ngukuri ise situhuna sumber godan e. Arus ku ingetken bangku maka Setan nge sumber gambar-gambar e. Gundari nggo kueteh maka Jahwe ngenca si ngasup nampati aku gelah ‘tetap tenang ras metenget,’ alu bage banci ku taluken lawan si nerang perukurenku, pusuhku, ras perjabunku.” Antonio ndatken penampat si iperlukenna janah banci itadingkenna kebiasanna si la mehuli e. Dungna, enda pe nampati ia mpedauh masalah serius si debanna.

Jelas me, Pustaka banci mereken pedah si erguna man banta guna mpedauh masalah si serius. Tapi, uga adi lit masalah si mberat janah lalap la terdungi? Mari si nen uga Kata Dibata banci nampati kita bas ngatasi erbage masalah.

Pedah si lit bas Pustaka erguna bas nampati kita mpedauh erbage masalah