Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PEMBAHASEN UTAMA | Paksa Sekalak si Keleng Ateta Mate

Apuli Kalak si Erceda Ate

Apuli Kalak si Erceda Ate

Pernah nge kam bingung paksa temanndu sangana erceda ate? Maun-maun, la sieteh kai si man katanken ras kai si arus silakoken, emaka sinik saja kita. Tapi, lit hal-hal si erguna si banci silakoken.

Megati, si iperluken kal eme kerehenndu saja ras kata-kata si sederhana, misalna ”aku pe ikut erceda ate ya”. I bas melala kebudayan, ndakep kalak si erceda ate ntah pe njemak tanna eme sada cara si mehulina guna ncidahken maka kam ermediate. Paksa ngerana kalak si erceda ate, begiken ia alu tutus. Tapi, si mehulina kal eme ncidahken perbahanen si mehuli man kalak si erceda ate. Misalna, kam banci erdakan man bana, ngurus anakna, ntah pe nampati i bas acara penguburen adi iperluken. Perbahanen si bage ndauh lebih penting asangken kata-kata saja.

Selain si e, banci iturikenndu sifat-sifat si mehuli ntah pe pengalamen si meriah kerna kalak si nggo mate ndai. Enda banci erban meriah ukur kalak si erceda ate. Contohna, Pam si itadingken perbulangenna, Ian, enem tahun si nggo lewat. Nina, ”Maun-maun ituriken kalak bangku perbahanen mehuli si ilakoken Ian si lenga pernah kueteh. Enda erbanca meriah kal ukurku.”

Peneliti ncidahken maka nterem kalak si erceda ate tangtangna ndatken melala penampat. Tapi, dungna terlupaken erkiteken temanna nggo sibuk i bas ndahiken dahinna sekalak-sekalak. Emaka, usahakenlah alu ratur ngubungi ia guna meteh keadanna. * Enterem kalak si erceda ate tuhu-tuhu ngergai si e, erkiteken enda banci erbahan reh nahangna perasan ceda atena.

Perdiateken usihen Kaori, sekalak singuda-nguda i Jepang. Getem kal pusuhna erkiteken kematen nandena, janah 15 bulan kenca si e mate ka kakana. Tapi untungna, ialokenna penampat si la erngadi-ngadi i bas teman-temanna nari. Salah sada eme Ritsuko, ia ndauh tuan asangken Kaori janah jadi teman Kaori atena. Nina Kaori, ”Jujur la aku senang kerna si e. La aku nggit ise pe nggantiken ingan Nandengku, janah kuakap ise pe la banci nggantiken ia. Tapi, ngidah perbahanen Nandengku Ritsuko man bangku, ndeher kal kuakap aku ras ia. Tiap minggu, kami ras-ras lawes erberita janah ras-ras lawes ku perpulungen. Iajakna aku minem teh ras ia, ibabakenna pangan-pangan, janah rusur itulisna melala surat ras kartu-kartu man bangku. Perbahanen Nandengku Ritsuko mereken pengaruh si mehuli man bangku.”

Nggo 12 tahun nande kandung Kaori mate, janah gundari Kaori ras perbulangenna nggo jadi perberita sepenuh waktu. Nina Kaori, ”Nandengku Ritsuko terus mperdiateken aku. Paksa aku mulih ku rumah, rusur kudahi ia janah ercakap-cakap ras ia.”

Contoh si debanna si ndatken manfaat erkiteken dukungen si la erngadi-ngadi eme Poli, sekalak Saksi-Saksi Jahwe i Siprus. Perbulangen Poli, Sozos, sekalak pertua Kristen si jadi usihen, rusur iundangna anak melumang bage pe diberu si mbalu ku rumahna guna ras-ras man janah ergaul. (Jakup 1:27) Tapi sayangna, paksa umurna 53 tahun, Sozos mate erkiteken tumor otak. Nina Poli, ”Kebenen kal aku kenca kematen perbulangenku si setia, si nggo 33 tahun kami erjabu.”

Daramilah cara guna nampati kalak si erceda ate

Kenca kematen perbulangenna, Poli pindah ku Kanada ras Daniel, anakna si nguda, si umurna 15 tahun. I Kanada, kalak enda mulai ergaul ras runggun Saksi-Saksi Jahwe. Nina Poli, ”Teman-temanku i bas runggun si mbaru, la ietehna kai pe kerna masa lalu kami ras situasi sulit si niadapi kami. Tapi kalak e terus reh ndahi kami janah ngapuli alu kata-kata ras mereken penampat. Enda seh kal mehergana, erkiteken paksa si e anakku tuhu-tuhu merluken bapana! Kalak si lit tanggung  jabapna i runggun pe ermediate kal nandangi Daniel. Salah sada pertua rusur ngundang Daniel ku acara ramah tamah ras main bola.” Gundari, Poli ras Daniel nggo terapuli kal.

Jelas me, melala cara si banci sigunaken i bas nampati ras ngapuli kalak si erceda ate. Pustaka si Badia pe ngapuli kita alu mereken arapen si luar biasa i bas wari si pepagi.

^ par. 6 Piga-piga kalak erban tanda i bas kelenderna kerna tanggal kematen sekalak jelma gelah iingetna mereken pengapul man keluarga si erceda ate.