Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PEMBAHASEN UTAMA

Paksa Sekalak si Keleng Ateta Mate

Paksa Sekalak si Keleng Ateta Mate

”Enda nge si mehulina kap Dibata, nakku . . . Ula . . . kam . . . ngandung.”

Kata-kata enda ikusikken man sekalak singuda-nguda si gelarna Bebe. Ia paksana i bas acara penguburen bapana, si mate erkiteken kecelakan motor.

Bebe ndeher kal ras bapana. Kata-kata ndai ibelasken kalak si rembak ras keluargana si tujunna ngapuli, tapi labo reh nahangna ukur Bebe malahen reh cedana. Nina Bebe bas ukurna, ”Labo enda si mehulina.” Ertahun-tahun kenca si e, paksa itulisken Bebe kejadin e i bas buku, ceda denga ukurna.

Bali bagi Bebe, iperluken mbue waktu guna ngatasi perasan ceda ate, terlebih ka paksa itadingken kalak si ndeher kal ras kita. I bas Pustaka si Badia, kematen igambarken bagi ”musuh si perpudina”. (1 Korinti 15:26) La banci kita nilah i bas kematen nari, janah ndigan pe banci terjadi. Kematen muat kalak si keleng ateta janah la lit si kebal nandangi kematen. Emaka wajar adi kebenen siakap kita janah la sieteh uga ngadapi kematen ras ceda ate.

Banci saja kam tersungkun-sungkun: ’Ndigan nge perasan ceda ate e banci bene? Uga carana banci ngatasi perasan ceda ate? Uga carana banci kuapuli kalak si erceda ate? Lit kin arapen man kalak si keleng ateta si nggo mate?’