Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PEMBAHASEN UTAMA | Paksa Sekalak si Keleng Ateta Mate

Ngatasi Perasan Ceda Ate

Ngatasi Perasan Ceda Ate

Melala pedah guna ngatasi perasan ceda ate. Tapi labo kerina erguna. Misalna, lit si ngataken labo perlu ngandung ntah pe ncidahken perasanndu. Lit ka si nuruh kam ncidahken kerina isi pusuhndu. Tapi, Pustaka si Badia mereken nasehat si seimbang si sentudu ras penelitin modern.

I bas piga-piga kebudayan, lit si erpengakap maka dilaki la cocok ngandung. Tapi, perlu kin kita mela adi ngandung i lebe-lebe jelma si nterem? Ahli kesehaten mental ngataken maka wajar adi kita ngandung paksa erceda ate. Janah alu ngandung enda banci ngkurangi ceda atendu. Sebalikna, adi itahan-tahanndu perasanndu, enda banci la mehuli akibatna man bandu. La lit ikataken i bas Pustaka si Badia maka ngandung e salah ntah pe erban mela. Cuba perdiateken contoh Jesus. Amin gia lit kuasa Jesus mpekeke kalak mate, tapi tangis ia i lebe-lebe jelma si nterem paksa teman si ikelengina, Lasarus, mate!​—Johanes 11:33-35.

Maun-maun kalak si erceda ate banci saja merawa atena, khususna adi kematen e rempet rehna. Mbue alasen ngkai maka si enda terjadi. Misalna kata-kata kalak si nihamati erbahan kitik ukurna ras la erpalasken fakta. Contohna, sekalak dilaki si gelarna Mike i Afrika Selatan. Nina, ”Paksa bapangku mate umurku 14 tahun denga. I bas acara penguburen, lit sekalak pendeta Gereja Anglikan ngataken maka perlu Dibata kalak si mehuli, emaka meter ibuatNa bapandu. * Enda erbahanca merawa kal ateku perban perlu denga kal kami bapa. Gundari, amin gia nggo 63 tahun bapangku mate, ceda denga pusuhku.”

Adi bage, uga adi salah lalap akapndu bandu? Khususna paksa terjadi kematen si la isangka-sangka, banci saja kalak si itadingken terus ngukuri, ’Ntah labo min ndai ia mate adi bage kuban.’ Ntah pe banci saja kena la siangkan paksa terakhir jumpa. Enda banci nambahi perasan ersalah i bas pusuhndu.

Adi salah akapndu bandu ntah pe merawa atendu, ula tahanndu bas pusuhndu. Sebalikna, turiken man temanndu si nggit megiken ras erban kam tenang maka perasan si bage wajar igejapken kalak si paksana erceda ate. Nina Pustaka si Badia, ”Teman tetap encidahken atena keleng, kai gunana sekalak senina adi labo ikut i bas nggejapken kiniseran?”​—Kuan-kuanen 17:17.

Teman si mehulina kal man kalak si erceda ate eme si Nepa kita, Dibata Jahwe. Turiken kerina isi pusuhndu man baNa i bas pertoton, erkiteken ”Ia kap si mperdiateken kam”. (1 Petrus 5:7) Selain si e, Ia erjanji maka pusuh ras perukuren kalak si ngelakoken si e, banci nggejapken ”kemalemen ate si rehna i bas Dibata nari, si la terukuri manusia”. (Pilipi 4:6, 7) Janah, alokenlah penampat Dibata i bas Pustaka si Badia nari. Bahan daftar ayat-ayat Pustaka si Badia si banci mereken pengapul. (Nehen  kotak.) Mungkin, banci ihafalndu piga-piga ayat i bas kotak e. Ngukuri ayat-ayat enda alu mbages banci nampati kam, khususna paksa melungen iakapndu ntah pe paksa mesera akapndu tunduh.​—Jesaya 57:15.

Mbaru-mbaru enda, Jack si umurna 40 tahun, itadingken ndeharana i bas kematen erkiteken kanker. Nina Jack, lit waktu-waktuna melungen kal iakapna. Tapi ia ndatken penampat arah pertoton. Nina, ”Paksa ertoto aku man Dibata Jahwe, la pernah melungen kuakap. Rusur terpedak aku bas tengah berngi janah lanai banci tunduh. Emaka, kuoge janah kuukuri alu mbages ayat-ayat Pustaka si Badia. Aku pe ertoto janah kuturiken perasanku. Enda erbahanca salang pusuh ras perukurenku emaka banci aku tunduh mulihi.”

Sekalak singuda-nguda si gelarna Vanessa itadingken nandena i bas kematen erkiteken sakit. Ia pe ndatken penampat i bas pertoton. Nina, ”I bas masa-masa si seh kal sulitna, ngelebuh gelar Dibata ngenca aku banci kenca e tangis kal aku. Jahwe megiken pertotonku janah terus iberekenNa gegeh si kuperluken.”

Piga-piga penasehat mereken saran man kalak si erceda ate gelah nampati kalak si deban ntah pe ikut i bas pelayanen masarakat. Enda banci mereken keriahen ukur janah ngkurangi kesedihen kalak si erceda ate. (Perbahanen 20:35) Melala kalak Kristen si erceda ate nggejapken maka nampati kalak si deban erban ia pe terapuli.​—2 Korinti 1:3, 4.

^ par. 5 Si e labo ajaren Pustaka si Badia. Pustaka si Badia njelasken telu alasen ngkai maka manusia mate.​—Pengerana 9:11; Johanes 8:44; Roma 5:12.