Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 TOPIK UTAMA | IJA BANCI DATNDU PENGAPUL

Kerina Kita Perlu Pengapul

Kerina Kita Perlu Pengapul

Ingetndu nge kam ndabuh sanga kitik denga? Banci saja terdareh nahendu ntah pe tihunndu. Banci nge ingetndu uga nandendu nampati kam? Mungkin ibersihkenna lukandu, kenca si e itambarina. Ngandung kam, tapi kata-katana si mpepalem pusuh janah idakepna ka kam, erbanca kurang akapndu suina. Paksa si e, menukah siakap ndatken penampat ntah pe pengapul.

Tapi, reh tuana kita reh lalana perbebenta janah reh serana siakap ndatken pengapul. Gundari melala perbebenta la banci itambari alu obat luka saja ntah pe dakepen nande. Pertimbangken piga-piga contoh.

  • Pernah nge gulut kal ukurndu erkiteken lanai lit pendahinndu? Julian, paksa ipedarat i bas pendahinna nari, stres kal ia. Nina, ’Uga aku banci ncukupi keperlun keluargangku? Ertahun-tahun dekahna tutus kal ateku erdahin, engkai maka gundari iakap perusahaan e aku lanai terpake?’

  • Banci saja latih kal iakapndu erkiteken sontar perjabunndu. Perdiateken kai nina Raquel, ”Paksa rempet aku itadingken perbulangenku 18 bulan si lewat, ceda kal pusuhku. Tuhu-tuhu getem kal kuakap. Labo ngenca pusuhku si ceda tapi mesui ka kuakap dagingku. Enda erbanca rusur aku mbiar.”

  • Mungkin mekelek kal penakitndu tempa-tempa lanai tertambari. Banci saja seri perasanndu ras Jop, si ngatakenca, ”Nggo me; nggo leja aku nggeluh.” (Jop 7:16) Mungkin seri ka perasanndu ras Luis, sekalak dilaki si umurna 80 tahun, si ngatakenca, ”Maun-maun nimai matena naring kuakap aku e.”

  • Ntah banci saja kam kebenen kalak si ikelengindu. Enda erbanca perlu kal kam pengapul. Nina Robert, ”Paksa anakku mate i bas kecelakan pesawat, tangtangna la aku tek. Tapi kenca si e, dungna perasanku bali bagi si ikataken Pustaka, bagi itebak pedang kuakap pusuhku.”—Lukas 2:35.

Robert, Luis, Raquel, ras Julian ndatken pengapul i tengah keadan si seh kal beratna. Enda idatna i bas Dibata—Si Mada Kuasa nari. Uga nge Dibata nikapken pengapul? Nggit nge Ia ngapuli kita?