Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

“Megermetlah man Kai si Ipelajarindu, Jadilah Pentar”

“Megermetlah man Kai si Ipelajarindu, Jadilah Pentar”

“O anak perana, . . . megermetlah man kai si ipelajarindu, jadilah pentar.”​—KUAN-KUANEN 8:32, 33.

ENDE-ENDEN: 56, 89

1. Uga carana gelah kita pentar? Kai gunana man banta?

KEPENTAREN rehna bas Jahwe nari, janah nggit Ia mbagikenca man si deban. Sibaca bas Jakup 1:5, “Tapi adi lit i bas kam si kurang kepentarenna, ertotolah ia man Dibata si mereken kepentaren man bandu. Sabap Dibata kap mereken kepentaren man kerina jelma alu melumbar.” Sada cara gelah kita pentar eme ngaloken pengajaren Dibata. Alu bage, banci kita ndauh arah kai si salah janah tetap ndeher ras Jahwe. (Kuan-kuanen 2:10-12) Ras lit ka arapenta guna nggeluh rasa lalap.​—Judas 21.

2. Uga carana gelah keleng ateta pengajaren Dibata?

2 Perban kita la sempurna ntah pe perban carata ipebelin, mon-mon mesera siakap ngaloken pengajaren ntah pe la cocok siakap e man banta. Tapi kenca sigejapken sendiri kai gunana pengajaren Dibata, siteh me maka keleng kel kepeken ate Jahwe kita. Ikataken bas Kuan-kuanen 3:11, 12, “Kune kam iajarken [Jahwe], o anakku, perdiatekenlah e.” Kenca si e, nina ka, “Iukum [Jahwe] kap kalak si ikelengiNa.” Tek kita maka si mehulina nge  ate Jahwe si berekenNa banta. (Baca Heber 12:5-11.) Perban tuhu-tuhu itandai Jahwe kita, pengajarenNa lalap cocok bagi si iperluken kita. Bas artikel enda, sibahas kari empat pengajaren: (1) ngajari diri sendiri, (2) pengajaren si arus ibereken orang tua man anakna, (3) pengajaren si ialoken kita bas runggun, ras (4) si ndauh sakiten asangken inasehati.

PENTAR KITA ADI SIAJARI DIRITA

3. Uga carana gelah reh beluhna anakta ngajari dirina sendiri? Bereken contohna.

3 Adi siajari dirita, banci sikuasai perbahanen ras perukurenta. Sanga kita lahir labo mis banci siajari dirita tapi arus sipelajari. Contohna, sanga anak-anak erlajar maba sepeda, salah sada orang tuana biasana nagangi sepeda e gelah ula ia ndabuh. Tapi sanga anak e erlajar, mon-mon ilepasken orang tuana sepeda ndai ntisik. Kenca nggo yakin orang tua e maka anakna ndai nggo beluh, nggo terus ilepaskenna. Bage ka pe, adi sabar orang tua e ngelatih anakna janah ‘ngajari dingen negu-negu ia bagi si ngena ate [Jahwe],’ banci reh beluhna dungna anakna e ngajari dirina sendiri janah pentar.​—Epesus 6:4.

4, 5. (a) Engkai maka ngajari diri sendiri jadi bagin si penting kel i bas “manusia si mbaru”? (b) Engkai maka ula kitik ukurta sanga kita erban kesalahen?

4 Bage ka pe kalak si nandai Jahwe kenca ia nggo dewasa. Amin pe nggo banci iajarina dirina sendiri, lenga bo ia jadi kalak Kristen si dewasa. Tapi kenca ipakena “manusia si mbaru” janah iusahakenna gelah bali bagi Kristus, nggo reh dewasana ia. (Epesus 4:23, 24) Adi banci siajari dirita, enda erban kita banci “nadingken kegeluhen si la ngena ate Dibata ras sura-sura doni, gelah nggeluh kita ngkuasai dirita, bujur dingen sisembah Dibata alu kegeluhenta i doni enda.”​—Titus 2:12.

5 Tapi kerina kita erdosa. (Pengerana 7:20) Emaka adi siban kesalahen, labo ertina lenga banci siajari dirita ntah pe la banci siajari dirita. Sipelajari bas Kuan-kuanen 24:16, “Kalak bujur piga-piga kali guling tapi terus ia keke ka mulihi.” Uga ayat enda nampati kita “keke ka mulihi”? Labo perban gegehta tapi kesah si badia. (Baca Jesaya 12:2.) Ulih kesah si badia termasuk ngkuasai diri, si ertina seri kel ras ngajari diri sendiri.

6. Uga carana gelah reh riahna siakap mpelajari Kata Dibata? (Nen gambar pemena artikel.)

6 Ertoto, erlajar Pustaka, janah ngukurisa, e pe banci nampati kita gelah reh beluhna ngajari diri sendiri. Tapi uga adi mesera akapndu erlajar Pustaka ntah pe la meriah akapndu erlajar? Ula kitik ukurndu. Peturutlah Jahwe si nampati kam gelah “rusur muas” man Kata Dibata. (1 Petrus 2:2) Pindo gelah sampati Jahwe kam ngajari dirindu sendiri, alu bage banci ibanndu waktundu erlajar Pustaka. Mungkin banci imulaindu erlajar piga-piga menit lebe. Reh dekahna, reh gampangna akapndu janah nggo meriah akapndu erlajar. Dungna, nggo banndu lalap waktundu guna ngukuri perukuren Jahwe si meherga.​—Masmur 77:13.

7. Engkai maka ngajari diri sendiri erban kita banci ndatken cita-cita rohanita?

 7 Adi siajari dirita sendiri, enda banci erban kita ndatken cita-cita rohanita. Contohna, igejapken sada perbapan maka nggo bene semangatna, emaka ibanna tujunna jadi perintis biasa. Uga ngajari diri sendiri nampati ia? Ibacana artikel bas majalahta kerna merintis janah itotokenna kerna si e. Ngelakoken si e erban reh paguhna hubungenna ras Jahwe. Sanga banci, merintis ekstra ka ia. La ipeturutna kai pe mpengadi ia; tapi tetap iutamakenna tujunna e. Kenca piga-piga waktu, jadi perintis biasa me ia.

PEBELIN ANAKNDU ALU PENGAJAREN JAHWE

Bage anak-anak lahir, labo mis banci ietehna apai si benar ras apai si salah, emaka perlu ia ilatih (Nen paragrap 8)

8-10. Uga gelah banci ipebelin orang tua anakna guna ngelayani Jahwe? Bereken contohna.

8 Ibere Jahwe tanggung jawap man orang tua guna mpebelin anakna ras ‘ngajari dingen negu-negu ia bagi si ngena ate [Jahwe].’ (Epesus 6:4) Memang mesera kel ngelakokenca bas doni si gundari enda. (2 Timotius 3:1-5) Sanga anak-anak lahir, lenga ietehna apai si benar ras apai si salah,  janah pusuh ras perukurenna lenga ilatih. Emaka perlu ia iajari. (Roma 2:14, 15) Ijelasken sada pakar Pustaka, kata Junani “ajari” banci ka iterjemahken “mpebelin anak” gelah jadi kalak dewasa si ertanggung jawap.

9 Sanga iajari orang tua anakna alu mehuli, igejapken anak e maka ia aman. Ipelajarina maka kebebasen e lit batasna janah kerina si ilakokenna lit akibatna, mehuli ntah pe lang. Emaka penting kel ipindo orang tua kepentaren man Jahwe gelah banci mpebelin anakna. Pendapat kerna mpebelin anak la seri bas tiap ingan, janah pendapat e terus berubah. Tapi, orang tua si megiken Dibata la iterka-terkana kerna kai si arus ilakokenna ntah pe tek man pengalamen ras pendapat manusia saja.

10 Banci kita erlajar arah Nuah. Sanga ikataken Jahwe man bana gelah ibangunna bahtra, la iteh Nuah uga carana. Pindona penampat Jahwe, janah sibaca maka “ilakoken Nuah kerina” tepat bagi si ikataken Jahwe bana. (Kejadin 6:22) Kai hasilna? Bahtra e nelamatken Nuah ras keluargana! Nuah pe berhasil ngajarken anakna. Engkai? Perban tek ia man kepentaren si rehna arah Dibata. Tutus ate Nuah ngajari anakna janah iberekenna contoh si mehuli, si labo gampang i bas jaman si jahat sope Banjir si Mbelin.​—Kejadin 6:5.

11. Engkai maka arus iusahaken orang tua kel ngajari anakna?

11 Adi kam orang tua, uga carandu ngelakoken tepat bagi si ikataken Jahwe? Begikenlah Jahwe. Peturutlah kam isampati Jahwe mpebelin anakndu. Gunakenlah nasehat arah Pustaka bage pe organisasiNa. Alu bage, pasti ngata bujur kel anakndu man kai si ilakokenndu! Itulis sada turang senina si dilaki, “Bujur kel kukataken kerna cara orang tuaku mpebelin aku. Ilakokenna si mehulina gelah kena ku pusuhku.” Ikatakenna maka isampati orang tuana ia ndeher ras Jahwe. Memang, nggo pe ilakoken orang tua asa bancina ngajari anakna, banci jadi itadingken anakna Jahwe. Tapi orang tua si ngusahaken si mehulina ndatken hasil si mehuli janah banci iarapkenna bas sada wari pagi mulihken ka anakna e ku Jahwe.

12, 13. (a) Adi anak ipecat, uga cara orang tua mbuktiken maka patuh ia man Dibata? (b) Uga sada keluarga ndatken manpaat perban patuh orang tuana man Jahwe?

12 Sada ujin si meserana kel man piga-piga orang tua guna patuh eme sanga anakna ipecat. Iakui sada turang senina si anakna ipedarat janah lawes arah rumah nari, “Kudaram-darami bas majalahta ntah lit alasen gelah banci aku jumpa ras anakku bage pe kempuku.” Tapi alu mehuli isampati dilakina ia guna meteh maka lanai bo kalak e si ertanggung jawap man anakna janah kalak e perlu setia man Jahwe.

13 Piga-piga tahun kenca si e, mulihken me anakna ndai. Nina mamakna, “Gundari hampir tiap wari aku itelpon ntah pe SMS-na! Janah iergaina kel aku ras bapakna perban tehna patuh kami man Dibata. Ndeher kel kami gundari.” Adi ipedarat anakndu, ‘ernalem nge kam man Dibata alu bulat ukur’? Ibuktikenndu nge man baNa  maka ‘la kam ernalem man pemetehndu’? (Kuan-kuanen 3:5, 6) Ingetlah, pengajaren bas Jahwe nari mbuktiken man banta uga pentarna Ia ras uga kelengna ateNa kita. Ula pernah lupakenndu maka ibereNa AnakNa man kerina manusia, termasuk pe man anakndu. Ate Jahwe kerina kalak dat kegeluhen si rasa lalap. (Baca 2 Petrus 3:9.) Emaka orang tua, teruslah kam tek man pengajaren Jahwe ras petunjukNa si benar, amin gia sakit kapndu sanga kam patuh. Begikenlah pengajaren Dibata, janah ula lawanndu.

BAS RUNGGUN

14. Uga carana gelah erguna petunjuk Jahwe si iberekenNa arah ‘budak si tutus’ man banta?

14 Erjanji Jahwe guna mperdiateken, ngelindungi, ras ngajari runggun Kristen. IlakokenNa alu piga-piga cara. Contohna, ipilihNa AnakNa guna mperdiateken runggun, janah itugasken Jesus ‘budak si tutus’ guna mereken pangan rohani gelah banci kita tetap setia. (Lukas 12:42) Ibereken “budak” e petunjuk si meherga man banta, ntah pe pengajaren. Banci jadi, pernah ibegindu khotbah ntah pe ibacandu artikel i bas salah sada majalahta si dungna ngubah perukuren ras perbahanenndu. Pasti meriah akapndu erban perubahen e, sebap enda ertina ipeturutndu Jahwe si ngajari kam.​—Kuan-kuanen 2:1-5.

15, 16. (a) Uga gelah erguna pendahin pertua e man banta? (b) Kai si arus silakoken gelah reh riahna akap pertua e ndahiken dahinna?

15 Isediaken Kristus ka pertua guna mperdiateken runggun. Ikataken Pustaka kalak enda “pemere-pemere” guna manusia. (Epesus 4:8, 11-13) Uga gelah erguna pendahin pertua e banta? Siusihlah kinitekenna bage pe contohna si mehuli, janah siikutken nasehat si iberekenna arah Pustaka. (Baca Heber 13:17.) Keleng ate pertua e kita janah ndeher atena kita ku Dibata. Adi iperdiateken kalak e la kita pulung ntah pe nggo bene semangatta, pasti minter iusahaken kalak e nampatisa. Pasti begikenna kita janah alu perkeleng iberena semangat ras nasehat si mejile arah Pustaka. Inenndu nge maka penampat arah kalak e eme bukti kekelengen Jahwe man bandu?

16 Ingetlah maka labo gampang akap pertua mereken nasehat. Uga nge akapndu perasan nabi Natan sanga ngerana man Raja Daud si muniken dosana si serius? (2 Samuel 12:1-14) Uga nge perasan rasul Paulus sanga ipersingetina rasul Petrus, salah sada arah 12 rasul, si ulin perbahanenna man kalak Kristen si Jahudi asangken si la Jahudi? Arus Paulus pang ngelakokenca. (Galati 2:11-14) Emaka, kai nge si ilakokenndu gelah la mesera akap pertua mereken pedah man bandu? Meteruk ukurlah, ngata bujur, janah nggit min kam adi ipindona ngerana. Nenlah maka penampatna e eme bukti kekelengen Dibata. Pasti erguna man bandu, janah pertua pe meriah kapna ndahiken dahinna.

17. Uga pertua nampati turang seninata?

17 Ikataken sada turang senina maka masa laluna erban mesera kapna ngkelengi Jahwe, dungna stres ia.  Nina, “Kuteh maka arus aku ngerana ras pertua. La aku irawaina ntah pe isalahkenna, tapi isemangatina ras ipegegehina. Tiap dung kenca perpulungen, la soal uga sibukna kalak e, sadalah gia lit lalap si nungkun uga keadanku. Perban masa laluku, la patut kuakap aku ikelengi Jahwe. Tapi terus igunaken Jahwe runggun ras pertua guna mereken kekelengenNa man bangku. Ertoto aku maka lanai aku nggit nadingken Ia.”

SI NDAUH SAKITEN ASANGKEN INASEHATI

18, 19. Kai si ndauh sakiten asangken inasehati? Bereken contohna.

18 Banci jadi sakit siakap sanga inasehati, tapi ndauh sakiten akibat si dat kita perban nulak nasehat e. (Heber 12:11) Banci kita erlajar arah kai si terjadi man Kain ras Raja Sedekia. Sanga idah Dibata maka segat ate Kain adekna janah ibunuhna atena, ipersingetiNa Kain, “Engkai maka kam merawa? Engkai kam jutjut? Adi mehuli perbahanenndu, tentu cirem kam. Tapi erkiteken perbahanenndu jahat, dosa ngerimrim i lebe-lebe pintun. Ikuasaina atena kam, tapi kam arus naluken ia.” (Kejadin 4:6, 7) Itulak Kain nasehat Jahwe, ibunuhna adekna, janah menderita ia segedang geluhna. (Kejadin 4:11, 12) Adi ibegiken Kain Dibata, labo perlu inanamina penderitan e. 

19 Sedekia raja si lemah ras jahat. Sanga ia merentah, parah kel situasi kalak Jerusalem. Lalap ipersingeti nabi Jeremia si Sedekia gelah ia robah. Tapi itulak raja e nasehat bas Jahwe nari, janah ngeri kel akibatna. (Jeremia 52:8-11) La ate Jahwe sinanami penderitan si la perlu!​—Baca Jesaya 48:17, 18.

20. Kai pagi si terjadi man kalak si ngaloken ajaren Dibata ras kalak si lang?

20 Gundari nterem kalak nokoh-nokohi pengajaren Dibata janah la diatena. Tapi lanai ndekah, kerina kalak si nulak pengajaren Dibata ndatken akibat si seh kel sakitna. (Kuan-kuanen 1:24-31) Emaka “megermetlah man kai si ipelajarindu, jadilah pentar.” Bagi nina Kuan-kuanen 4:13, “ingetlah lalap kai si enggo ipelajarindu. Jagai lalap, sabap e kap kegeluhenndu.”