Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

“Ersinarlah Ban Terang Kena” gelah Jahwe Imuliaken

“Ersinarlah Ban Terang Kena” gelah Jahwe Imuliaken

“Ersinarlah ban terang kena i lebe-lebe jelma si nterem, gelah banci imuliakenna Bapak kena.”​—MATIUS 5:16.

LAGU: 77, 59

1. Kai si erban kita bahagia?

MERIAH kel siakap perban iban umat Dibata terangna ersinar! Tahun si lewat, lit lebih 10.000.000 kalak si erlajar Pustaka. Janah lit ka jutan kalak si nggit reh ku acara Peringeten ras mpelajari pemere Jahwe si mbelinna eme tebusen.​—1 Johanes 4:9.

2, 3. (a) Kai si la banci ngambati terangta ersinar? (b) Kai si man bahasenta bas artikel enda?

2 Saksi-Saksi Jahwe lit i sebelang doni, emaka bahasa si igunakenna pe la seri. Amin gia bage, tetap kita ersada muji Jahwe. (Ketangkasen 7:9) Bahasa kai gia sipake, i ja pe kita tading, banci kita tetap ersinar “jadi si nerangi doni i tengah-tengah kalak e.”​—Pilipi 2:15.

3 Pelayanenta, persadan Kristenta, bage pe semangatta i bas erberita banci erban Jahwe imuliaken. Uga gelah terangta ersinar alu telu cara e?​—Baca Matius 5:14-16.

 SAMPATI KALAK SI DEBAN NGELAYANI JAHWE

4, 5. (a) Selain beritata, kai ka si banci erban terangta terus ersinar? (b) Kai hasilna adi kita mehuli? (Nen gambar pemena artikel.)

4 Erberita ras ngajar cara si penting gelah terangta terus ersinar. (Matius 28:19, 20) Bas tahun 1925, ikataken artikel si erjudul “Light in the Darkness (Terang i bas Kegelapen)” maka i bas wari-wari pendungi labo lit kalak si banci tetap setia man Tuan adi la kin igunakenna “kesempaten kai pe si erban terangna terus ersinar.” Nina ka, “Arus iberitakenna berita si meriah man kerina jelma i sebelang doni, janah ia pe arus erdalan bas terang e.” (The Watch Tower 1 Juni 1925) Selain beritata, perbahanenta pe erban Jahwe ipuji. Nterem kalak si mperdiateken kita sanga kita erberita. Banci itehna uga kita bage pe Dibatata, adi cirem kita janah mejuah-juah ninta man bana.

Selain beritata, perbahanenta pe erban Jahwe ipuji

5 Nina Jesus man murid-muridna, “Adi masuk kena ku sada rumah katakenlah, ‘Mejuah-juah!’” (Matius 10:12) Bas daerah Jesus erberita mbarenda, nggo biasa akap kalak ngundang kalak si la itandaina masuk ku rumahna. Tapi, melala daerah gundari, lanai biasa bage. Rusur kalak mbiar ntah pe terganggu akapna adi lit kalak si la itandaina reh ku rumahna. Tapi adi ramah janah mehuli kita, lanai kalak e mbiarsa. Sanga kam jaga gerai, pernah nge iperdiatekenndu adi cirem kam janah ialo-alondu kalak, lanai kalak e segan reh muat baca-bacanta? Malahen, banci jadi nggit kalak e ngerana-ngerana ras kita!

6. Kai si nampati pasangen si nggo metua bas Inggris gelah banci terus erberita?

6 Bas Inggris, lit pasangen si nggo metua si lanai banci bagi mbarenda rusurna erberita arah rumah ku rumah perban nggo kurang kesehatenna. Emaka itama kalak e baca-bacanta i datas meja i lebe-lebe rumahna. Rumahna deher sekolah, emaka banci iidah orang tua baca-bacanta e sanga ia ngelegi anakna mulih sekolah. Ibuat piga-piga orang tua baca-bacanta e, termasuk ka buku Pertanyaan Kaum MudaJawaban Yang Praktis, Jilid 1 ras 2. Lit turang seninata si perintis si rusur nemani kalak e. Iperdiateken piga-piga orang tua, turang seninata e ndai ramah kalakna janah pasangen ndai pe meriah akapna nampati kalak si deban. Dungna, lit sada orang tua si nggit erlajar Pustaka.

7. Uga carandu nampati pengungsi bas daerahndu?

7 Mbaru-mbaru enda, nterem kalak si pindah ku negara si deban jadi pengungsi. Uga carata nampati pengungsi bas daerahta gelah itandaina Jahwe? Pertama, banci pelajarindu uga ngataken mejuah-juah bas bahasana.  Selain si e, banci ka sipake aplikasi JW Language guna mpelajari piga-piga kata gelah nggit ia ngerana-ngerana ras kita. Banci ka sicidahken video-video ras baca-bacanta i bas bahasana si lit i jw.org.​—Ulangen 10:19.

8, 9. (a) Uga perpulungen tengah pekan nampati kita? (b) Kai si banci ilakoken orang tua gelah reh beluhna anak-anakna mereken komentar?

8 Enggo ibereken Jahwe kerina si iperluken gelah mejile carata erberita. Misalna, kai si nggo sipelajari bas Perpulungen Pelayanen ras Kegeluhen Kristen nampati kita gelah reh beluhna ndahi mulih ras banci simulai pelajaren Pustaka.

9 Biasana, kalak si reh ku perpulungenta rusur terkesan man komentar si ibereken anak-anak. Emaka ajarilah anakndu gelah mereken komentar alu kata-katana sendiri. Piga-piga kalak nggit jadi Saksi perban ibegina komentar si sederhana arah anak-anak janah arah ukurna nari.​—1 Korinti 14:25.

CARA GELAH LEBIH ERSADA

10. Uga kebaktin jabu banci nampati keluarga-keluarga gelah lebih ersada?

10 Adi siusahaken keluargata tetap dame ras ersada, enda banci erban Jahwe ipuji. Misalna, kam orang tua, banlah Kebaktin Jabu kena alu ratur. Enterem keluarga nonton JW Broadcasting ras-ras, kenca si e ibahasna  pelajaren kai saja si banci idatna. Ingetlah, cara ngajari anak si kitik denga beda ras ngajari anak si nggo remaja. Usahakenlah gelah kerina anggota keluargandu ndatken manpaat arah kebaktin jabundu.​—Masmur 148:12, 13.

Ertemanlah kita ras kalak si nggo metua (Nen paragrap 11)

11-13. Kai si banci silakoken gelah runggunta lebih ersada?

11 Uga cara anak muda ikut erban runggun tetap ersada janah mpegegehi kalak si deban gelah terang kalak e terus ersinar? Salah sada carana eme erteman ras si nggo metua. Sungkuni kalak e kai si erban ia banci tetap ngelayani Jahwe seh asa gundari. Pasti melala datndu pelajaren je nari. Enda banci mpegegehi kam bage pe ia! Kerina kita, nguda ntah pe metua, mehulilah min pengalo-ngalota man peminat si reh ku Bale Kerajan. Banci katakenndu mejuah-juah man bana, cirem kam, sampati ia ndarami ingan kundulna, janah petandaken ia man kalak si deban. Banlah ia bagi keluargandu.

12 Adi itugasken kam mandu perpulungen guna erberita, sampatilah si nggo metua gelah terangna tetap ersinar. Sesuaikenlah kondisina ras daerahna erberita. Anak mudalah ban temanna erberita. Turang senina si nggo metua bage pe si lit masalah kesehatenna rusur kitik ukurna perban lanai banci bagi mbarenda rusurna erberita. Pasti terpegegehi kel ia adi ermediate kita man bana janah siangkai uga keadanna. Amin gia ia nggo metua janah nggo ndekah jadi Saksi, tapi adi mehuli kita man bana enda banci erban ia terus semangat erberita.​—Imamat 19:32.

Iusahakenndu nge gelah lebih itandaindu turang seninandu i bas runggun?

13 Meriah ukur kalak Israel banci ngelayani Jahwe ras-ras. Itulis pemasmur, “Andiko ulina ras senangna, adi kalak si ersenina ersada perarih!” (Baca Masmur 133:1, 2.) Ipeserina persadan e ras minak wangi si meherga si erban kulitta mejile ras merim. Kita pe banci erban turang seninata ermeriah ukur adi siban ia jadi temanta janah mehuli kita man bana. Enda banci erban runggun lebih ersada. Iusahakenndu nge gelah lebih itandaindu turang seninandu i bas runggun?​—2 Korinti 6:11-13.

14. Kai si banci ilakokenndu gelah terangndu banci ersinar bas inganndu tading?

14 I ja pe kam tading, terangndu banci terus ersinar. Adi mehuli kam, tetanggandu banci nggit erlajar kerna Jahwe. Sungkuni bandu, ‘Uga pendapat tetanggaku kerna aku? Rapi ras bersih nge rumahku? Sekitar rumahku pe bage ka nge kuban? Nggit nge aku nampati tetanggaku?’ Sungkuni Saksi si deban kai pengaruh perbahanen ras usihenna si mehuli man keluargana,  tetanggana, temanna erdahin, ntah pe teman sekolahna.​—Epesus 5:9.

TERUSLAH ERJAGA-JAGA

15. Engkai maka arus terus kita erjaga-jaga?

15 Gelah terangta terus ersinar, arus siinget kita nggeluh bas wari-wari pendungi. Piga-piga kali ikataken Jesus man murid-muridna, “Teruslah erjaga-jaga.” (Matius 24:42; 25:13; 26:41) Adi ndekah denga siakap “kiniseran si mbelin” e reh, pasti la sigunaken kerina kesempaten guna erberita man kerina jelma. (Matius 24:21) Enda banci erban terangta lanai ersinar janah dungna mate.

16, 17. Kai nge si erban kita tetap semangat erberita?

16 Gundari, arus kita lebih erjaga-jaga. Keadan doni enda reh dekahna reh rontangna. Tapi siteh kedungen doni enda, pasti reh bas waktu si nggo itentuken Jahwe. (Matius 24:42-44) Janahta nimai, arus kita sabar janah siinget arapenta bas masa depan. Bacalah Pustaka tiap wari, janah teruslah ertoto man Jahwe. (1 Petrus 4:7) Erlajarlah arah turang senina si  nggo ertahun-tahun tetap setia ngelayani Jahwe. Contohna, banci bacandu pengalamen bas artikel si erjudul, “Tujuh Puluh Tahun Memegang Punca Baju Seorang Yahudi,” bas Menara Pengawal 15 April 2012 halamen 18-21.  

17 Teruslah sibuk ngelayani Jahwe. Mehulilah kam man kalak si deban janah ergaullah kam ras turang senina. Pasti meriah ukurndu janah la gejapndu reh me Kerajan Dibata. (Epesus 5:16) Melala kel si nggo ilakoken umat Dibata bas seratus tahun enda. Janah gundari kita reh sibukna perban pendahin Jahwe nggo reh buena. Enda me si erban terangta terus ersinar!

Melala manpaat sidat adi reh pertua mpermakani kita (Nen paragrap 18, 19)

18, 19. Uga pertua-pertua nampati kita gelah terus ngelayani Jahwe? Bereken contohna.

18 Amin gia rusur kita salah, tetap ibereken Jahwe kesempaten ngelayani Ia. Guna nampati kita, ibere Jahwe “pemere” man banta, eme pertua-pertua bas runggun. (Baca Epesus 4:8, 11, 12.) Emaka, adi reh pertua ku rumahta, banlah e jadi kesempaten guna erlajar arah ia janah mbegiken nasehatna.

19 Contohna, lit pasangen i Inggris si melala masalah bas perjabunna, emaka ipindona penampat man dua pertua. Nina diberuna maka dilakina la jadi kepala keluarga si rohani. Iakui dilakina maka ia la beluh ngajar janah la lit ibanna kebaktin jabu si ratur bas keluargana. Isampati pertua pasangen enda alu ngukuri contoh si ibereken Jesus. Iiahken pertua e si dilaki gelah ngikuti cara Jesus mperdiateken murid-muridna. Iiahkenna ka si diberu gelah sabar man dilakina. Iberekenna ka piga-piga saran uga carana erban kebaktin jabu ras dua anakna. (Epesus 5:21-29) Iusahaken dilakina kel gelah jadi kepala keluarga si lebih mehuli. Isemangati pertua ia gelah ula nyerah ras tek maka pasti isampati Jahwe ia. Perban pertua e perkeleng janah mehuli, dungna tersampati keluarga e!  

20. Kai hasilna adi terangndu terus ersinar?

20 “Sangap kal kalak si [erpengarapen man Jahwe], si nggeluh ngikutken kerina perentahNa.” (Masmur 128:1) Pasti kam bahagia adi terangndu terus ersinar. Emaka ajarilah kalak gelah itandaina Dibata, usahakenlah gelah keluargandu bage pe runggun tetap ersada, ras tetaplah erjaga-jaga. Pasti idah kalak perbahanenndu si mehuli e, dungna imuliakenna Bapakta, Jahwe.​—Matius 5:16.