Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Persadanta bage pe Acara Peringeten

Persadanta bage pe Acara Peringeten

“Andiko ulina ras senangna, adi kalak si ersenina ersada perarih!”​—MASMUR 133:1.

ENDE-ENDEN: 149, 99

1, 2. Bas tahun 2018 enda, acara kai si mpersada nterem jelma alu cara si luar biasa? Janah ngkai? (Nen gambar pemena artikel.)

I BAS tanggal 31 Maret 2018, lit jutan kalak i sebelang doni enda reh ku acara si ilakoken sekali ngenca setahun. Kenca sundut matawari, Saksi-Saksi Jahwe bage pe nterem kalak si deban radu ras pulung guna mperingeti pengorbanen si nggo ilakoken Jesus. Tiap tahun, acara Peringet-ingeten Kematen Jesus ngenca si mpersada nterem jelma alu cara si luar biasa.

2 Pasti meriah kel akap Jahwe bage pe Jesus sanga iidahNa tiap jam i belang-belang doni enda lit jutan kalak reh ku acara si penting e. Ikataken bas Pustaka maka “nterem kal jelma. Ise pe la ngasup meligaisa! Kalak si nterem e rehna i bas kerina bangsa, suku, negara ras i bas kerina cakap nari,” ersurak ia, nina, “Keselamatenta reh i bas Dibatanta nari, e me si kundul i kursi Kinirajan e  dingen i bas Anak Biri-Biri e nari!” (Ketangkasen 7:9, 10) Tiap tahun i bas acara Peringeten e, seh kel teremna kalak muji Jahwe bage pe Jesus perban kai si nggo ilakokenNa. Enda tuhu-tuhu luar biasa!

3. Penungkunen kai si man jawapenta bas artikel enda?

3 I bas artikel e, sidat kari jawapen arah empat penungkunen enda: (1) Uga carangku nikapken ukurku guna acara Peringeten gelah kudat manfaatna? (2) Uga acara Peringeten enda erban kerina umat Dibata ersada? (3) Kai si banci kulakoken gelah ikut aku erban umat Dibata ersada? (4) Lit nge acara Peringeten si terakhir? Adi lit, ndigan?

SIKAPKEN UKURTA GELAH SIDAT MANFAATNA

4. Engkai maka penting kel kita reh ku acara Peringeten?

Iperdiateken Jahwe bage pe Jesus usahanta guna reh ku acara Peringeten

4 Engkai maka penting kel kita reh ku acara Peringeten? Alasenna eme guna nembah Jahwe. Tek kita maka iperdiateken Jahwe bage pe Jesus usahanta guna reh ku acara si seh kel pentingna e. La kita nggit la reh ku acara e selain adi lit situasi si serius kel. Adi penting kel siakap acara e, tambah alasen Jahwe nulisken gelarta i bas “kitap kerna kalak si mbiar dingen mehamat man [Jahwe].” Kitap e pe igelari “kitap kegeluhen.” Kerina kalak si gelarna itulisken i je ibere Jahwe kegeluhen rasa lalap.​—Maleaki 3:16; Ketangkasen 20:15.

5. I bas minggu-minggu sope acara Peringeten, uga carandu ‘mereksa tuhu-tuhu kin kam erkiniteken’?

5 I bas minggu-minggu sope acara Peringeten, reh buena siban waktunta guna ertoto ras ngukuri uga kin deherna kita ras Jahwe. (Baca 2 Korinti 13:5.) Nina rasul Paulus man kalak Kristen, “Pereksalah man bandu: tuhu-tuhu kin kam erkiniteken.” Uga carana? Sungkuni banta: ‘Tek nge aku maka enda ngenca organisasi si ipake Jahwe guna ngelakoken peratenNa? Si mehulina nge kubereken sanga aku erberita ras ngajari kalak kerna berita si meriah? Arah perbahanenku teridah nge tek aku maka kita nggeluh bas wari-wari pendungi, janah lanai ndekah ikernepken me pemerentahen Setan enda? Tetap denga nge paguh kinitekenku man Jahwe ras Jesus bagi tangtangna aku ngelayani Jahwe mbarenda?’ (Matius 24:14; 2 Timotius 3:1; Heber 3:14) Alu ngukurken penungkunen enda banci ‘siuji’ uga kita situhuna.

6. (a) Sada ngenca cara gelah banci nggeluh si rasa lalap. Kai e? (b) Kai si ilakoken sekalak pertua i bas nikapken ukurna guna acara Peringeten? Uga caranta ngusihsa?

6 Sada cara nikapken ukurta guna acara Peringeten eme alu mbaca ras ngukuri kerna bahan si njelasken ngkai maka penting kel acara e. (Baca  Johanes 3:16; 17:3.) Sada ngenca cara gelah banci nggeluh si rasa lalap eme nandai Jahwe ras erkiniteken man AnakNa, Jesus. Sope acara e, sibanlah pelajaren pribadinta si erban kita reh deherna ku Jahwe ras Jesus. Enda me si ilakoken sekalak turang seninanta si nggo ndekah jadi pertua. Nggo ertahun-tahun dekahna ipepulungna artikel Sora Ermomo si mbahas kerna Peringeten ras kekelengen si ituduhken Jahwe ras Jesus man banta. Minggu-minggu sope Peringeten, ibacana mulihi artikel e janah iukurina alu mbages uga pentingna acara e. Mon-mon, itambahina ka sada ntah pe dua artikel guna ipepulungna. Janah ibaca ras iukurina ka pembacan Pustaka guna Peringeten. Ikatakenna maka alu ngelakoken si e lit si mbaru si banci ipelajarina tiap tahun. Tapi si pentingna, reh kelengna atena Jahwe ras Jesus. Kam pe, adi lakokenndu bage, reh kelengna atendu Jahwe ras Jesus. Iergaindu kai si nggo ilakokenNa bandu, janah melala datndu manfaat i bas Peringeten e nari.

ACARA PERINGETEN MPERSADA KITA

7. (a) Kai si itotoken Jesus i bas acara Peringeten si pemena? (b) Kai buktina maka ijawap Jahwe pertoton Jesus?

7 I bas berngi ipetandaken Jesus acara Peringeten e, ertoto Jesus kerna persadanna si meherga ras Bapana. Janah itotokenna ka murid-muridna gelah ersada bagi ia ras Bapana. (Baca Johanes 17:20, 21.) Ijawap Jahwe toto Anak si ikelengiNa e. Lebih asangken perpulungenta si deban, acara Peringeten mbuktiken maka Saksi-Saksi Jahwe ersada. Bas wari e, lit jutan kalak i belang-belang doni enda si mperingetisa amin gia beda negara ras warna kulitna. Janah ibuktiken kalak e tek ia maka Jahwe si ngutus AnakNa. I bas piga-piga ingan, la biasa akap kalak adi beda suku radu ras nembah Dibata, janah adi idah kalak si bage, nterem kalak la senang. Tapi la bage akap Jahwe ras Jesus. Meriah akapNa ngidah kita ersada bas Peringeten.

8. Kai si inubuatken Jahwe arah Esekiel?

8 Perban kita umat Jahwe, la ateta mamang ngidah kerina kita ersada. Persadan enda nggo inubuatken Jahwe arah Esekiel. IsuruhNa gelah ibuat Esekiel dua ciken, sada man “kerajan Juda” sada nari man “kerajan Israel,” janah ibabana ciken e duana gelah jadi sada. (Baca Esekiel 37:15-17.) Ituriken i bas “Pertanyaan Pembaca” i Menara Pengawal bulan Juli 2016, “Arah nabi Esekiel inubuatken Jahwe maka mulih me umatNa ku Taneh Perjanjin janah ipersada me kalak e mulihi jadi sada bangsa. Ikataken ka maka umat Dibata i bas wari-wari pendungi ipersada jadi sada umat.”

9. Kai buktina maka nubuat Esekiel terjadi bas acara Peringeten?

9 Mulai tahun 1919, iatur janah ipersada Jahwe me mulihi kalak si ipilih ku surga. Kalak e seri ras ciken man “kerajan Juda.” Kenca e, reh buena ka kalak si arapenna nggeluh i doni ikut ras kalak e nembah Dibata. Kalak si arapenna nggeluh i doni seri ras  ciken man “kerajan Israel.” Ijanjiken Jahwe maka ipersadaNa ciken e janah ‘ibahanNa jadi sada ciken’ bas tanNa. (Esekiel 37:19) IbanNa kalak si ipilih ku surga bage pe ‘biri-biri si deban’ jadi “sada rarasen.” (Johanes 10:16; Sakaria 8:23) Gundari, dua terpuk enda ersada janah radu ras ngelayani Jahwe. Sada Rajana eme Jesus Kristus, i bas nubuat Esekiel igelari ia “suruh-suruhenKu Daud.” (Esekiel 37:24, 25) Tiap tahun bas Peringeten, sanga ras-ras kita mperingeti kematen Jesus, siidah me ersada dua terpuk enda bagi nubuat Esekiel. Tapi uga caranta ikut erban umat Dibata tetap ersada?

SI BANCI SILAKOKEN GELAH UMAT DIBATA TETAP KOMPAK

10. Kai si banci silakoken gelah umat Dibata tetap kompak?

10 Kai cara si pemena si banci silakoken gelah umat Dibata tetap kompak? Alu jadi kalak si meteruk ukur. Sanga Jesus i doni, ikatakenna man murid-muridna maka kalak e arus meteruk ukur. (Matius 23:12) Kalak bas doni enda pentingen akapna bana asangken si deban. Tapi, adi meteruk ukur kita siergai turang senina si lit tanggung jawapna bas runggun janah sibegiken katana. Alu bage, ersada me runggun e. Si pentingna, adi meteruk ukur  kita, meriah ukur Dibata sabap “kalak si meganjang ukurna itulak Dibata, tapi man kalak si meteruk ukurna icidahkenNa lias ateNa.”​—1 Petrus 5:5.

11. Ngkai maka alu ngukuri roti ras anggur e erban kita ersada?

11 Kai cara si peduaken? Siukuri kai kin situhuna erti roti ras anggur e. Siukuri e sope Peringeten ras khususna sanga Peringeten. (1 Korinti 11:23-25) Roti si la itama ragi ertina daging Jesus si sempurna si ikorbankenna man banta. Anggur merah ertina dareh Jesus. Tapi la bias terjeng meteh e saja. Perlu ka siinget maka korban tebusen enda eme bukti kekelengen Jahwe ras Jesus. Ibere Jahwe AnakNa man banta janah nggit Jesus mate guna kita. Adi siinget kekelengen Kalak e, enda erban kita ngkelengi Ia ka. Kekelengenta man Jahwe e me si erban kita ersada.

Adi simaafken kalak si deban, ersada me kita (Nen paragraf 12, 13)

12. Pelajaren kai si banci sidat arah cerita Jesus kerna sekalak raja ras budakna?

12 Kai cara si peteluken? Nggit kita ngelupaken salah kalak. Adi simaafken kalak, sibuktiken maka bujur kel sikataken man Jahwe perban iampuniNa kesalahenta arah korban tebusen Jesus. Iceritaken Jesus kerna sekalak raja ras budakna si njelasken maka penting kel simaafken kesalahen kalak. Cuba bacandu Matius 18:23-34 janah sungkuni bandu, ‘Kudalanken nge kai si iajarken Jesus? Sabar nge aku janah nggit nge aku ngangkai turang seninangku? Kuinget nge lalap kesalahen kalak bangku?’ Payo, lit kesalahen si keleken asangken kesalahen si deban. Perban la kita sempurna, mesera siakap ngelupakenca. Tapi, arah cerita Jesus enda sieteh kap kai si erban meriah ukur Jahwe. (Baca Matius 18:35.) Menurut Jesus, labo imaafken Jahwe kita adi la simaafken turang seninanta si nggo tuhu-tuhu robah. Enda arus siukuri alu mbages. Emaka, gelah banci kita tetap kompak, simaafkenlah kalak bagi si iajarken Jesus.

13. Uga carana gelah banci kita tetap erdame ras turang seninanta?

13 Adi nggit kita ngelupaken kesalahen turang seninanta, dame kita ras ia. Ikataken rasul Paulus maka arus kel kita erusaha ersada janah erdame ras turang seninanta. (Epesus 4:3) Emaka, sope acara Peringeten ras khususna i bas Peringeten, siukurilah uga perbahanenta man kalak si deban. Cuba sungkuni bandu, ‘Iidah kalak nge maka lanai aku merawa man kalak si erban aku sakit hati? Iidah kalak nge maka erusaha kel aku gelah erdame ras tetap kompak ras ia?’ Perlu kel siukuri penungkunen enda.

14. Uga caranta ndalanken nasehat Paulus?

14 Kai cara si peempatken? Perkelenglah kita bagi Jahwe. (1 Johanes 4:8) Ula min sikataken, “Kukelengi ia perban ia turang seninangku, tapi situhuna la aku senang ngenen ia.” Adi bage ninta, la siikutken nasehat Paulus gelah ‘ola kita pergelut sapih-sapih kita erkiteken kekelengen.’ (Epesus 4:2) Perdiateken maka nina Paulus labo ngenca ‘ola kita pergelut’ tapi ikatakenna ka “erkiteken kekelengen.” Enda lit bedana. Erbage-bage kalak si  lit bas runggun, tapi Jahwe si narik kerina kalak e. (Johanes 6:44) Pasti melala si mehuli i bas kalak e si erban keleng ate Jahwe ia. Adi Jahwe pe keleng ateNa kalak e, ngkai maka kita lang? Iperentahken Jahwe kita gelah sikelengi min turang seninanta.​—1 Johanes 4:20, 21.

ACARA PERINGETEN SI TERAKHIR

15. Ja nari sieteh maka lit pagi paksana acara Peringeten si terakhir?

15 Lit pagi paksana, reh kita ku acara Peringeten si terakhir. Ja nari sieteh? Ikataken Paulus man kalak Kristen si ipilih ku surga, maka sanga iperingeti kalak e kematen Jesus tiap tahun, ‘iberitakenna me kematen Tuhan, seh ngayak ia reh mulihken.’ (1 Korinti 11:26) I bas nubuat Jesus kerna kedungen doni enda, ikatakenna ka kerna ‘kerehenna.’ Kerna kiniseran si mbelin si nandangi reh, nina, “Teridah tanda Anak Manusia si isuruh Dibata i langit janah tangis kerina bangsa manusia i doni enda. Idahna me pagi Anak Manusia si isuruh Dibata e reh i datas embun; alu kuasa ras kiniulin si mbelin. Kenca bage terbegi me sora trompet si megang jenari isuruhNa me malekat-malekatNa ndarat ku belang-belang doni enda. Ipepulung malekat-malekat e me kalak si enggo ipilih Dibata i bas tampuk doni nari ku tampukna si deban.” (Matius 24:29-31) ‘Ipepulung Jesus me kalak si enggo ipilih’ sanga kerina kalak e lawes ku surga. Enda terjadi kenca kiniseran si mbelin imulai tapi sope perang Harmagedon. Bas perang e, Jesus ras si 144.000 ngelawan raja-raja doni enda, janah menang. (Ketangkasen 17:12-14) Emaka, acara Peringeten si terakhir eme sope Jesus “reh” mpepulung kalak si ipilih.

16. Engkai maka erusaha kel kam gelah banci reh ku acara Peringeten bas tahun enda?

16 Emaka, rehlah ku acara Peringeten bas tanggal 31 Maret 2018 enda. Janah pindolah man Jahwe gelah sampatiNa kam ikut i bas erban umat Dibata ersada. (Baca Masmur 133:1.) Bas sada paksa pagi, lanai bo siperingeti Kematen Jesus. Emaka sope e terjadi, rehlah kita ku acara Peringeten tiap tahun. Enda mbuktiken maka meherga siakap persadanta.