Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Perbedan si Ngelayani Jahwe ras si Lang

Perbedan si Ngelayani Jahwe ras si Lang

‘Sekali nari iidahndu me kai lainna kalak bujur ras kalak jahat.’​—MALEAKI 3:18, Terjemahan Dunia Baru (NW).

ENDE-ENDEN: 61, 53

1, 2. Engkai maka mesera kel iakap umat Dibata gundari? (Nen gambar pemena artikel.)

ENTEREM dokter ras perawat erdahin i deher pasien si penakitna menular. Ermediate ia man pasienna perban isampatina atena. Tapi, perlu ka kalak e hati-hati gelah ula ia tertular penakit pasienna e. Seri ras Saksi-Saksi Jahwe. Nterem kita tading ras erdahin ras kalak si sifat-sifat ras perbahanenna la mehuli. Emaka, pasti mesera kel siakap gundari.

2 I bas wari pendungi enda, kalak si la ngkelengi Dibata la ia nggit ndalanken pedah-pedahNa kerna kai si benar ras kai si salah. Ikataken Paulus sifat-sifat kalak e sanga itulisna surat man Timotius. Nina Paulus maka reh deherna kita ku kedungen doni enda, reh lalana me sifat-sifat si la mehuli e. (Baca 2 Timotius 3:1-5, 13, [NW] *  Nen keterangen tambahen.) Amin gia la ateta ngena sifat-sifat e, banci ka nge kita terpengaruh arah cara kalak e rukur, pengeranana, ras perbahanenna. (Kuan-kuanen 13:20) I bas artikel enda, sibahas kari kai bedana sifat-sifat e ras sifat-sifat umat Dibata. Sipelajari ka uga carana gelah ula kita terpengaruh sifat-sifatna si la mehuli sanga nampati ia erlajar kerna Jahwe.

3. Uga saja sifat kalak si ikataken bas 2 Timotius 3:2-5?

3 Ikataken Paulus maka i bas wari-wari pendungi “mbue reh kiniseran.” Emaka itulisna lit 19 sifat-sifat si la mehuli si nggo biasa bas jamanta gundari. Sifat-sifat enda mirip bagi si itulis Paulus bas Roma 1:29-31, tapi sifat-sifat si ikataken Paulus bas suratna man Timotius nggunaken kata-kata si la lit i Kitap-Kitap Junani Kristen si apai pe. Ibenai Paulus kata-katana alu ngataken “sanga si e pagi manusia.” Tapi labo kerina manusia la mehuli sifatna. Kalak Kristen beda kel sifatna.​—Baca Maleaki 3:18, NW * Nen keterangen tambahen.

CARANTA NGENEN DIRINTA

4. Uga kin kalak si sombong e?

4 Kenca ikataken Paulus maka nterem pagi kalak ngukurken dirina saja ras mata duiten, ikatakenna ka maka sifat-sifat kalak pagi tual, meganjang rukur, ras sombong. Kalak si bage ulin akapna ia asangken kalak si deban perban mejile ntah pe ganteng ia, pentar, bayak, ntah pe meganjang pangkatna. Kalak si bage ipuji-puji atena lalap. Nina sekalak pakar, “Ibanna ingan persembahen bas pusuhna janah isembahna dirina sendiri.” Ikataken piga-piga kalak maka sifat si bage tuhu-tuhu mejin kel, janah kalak si sombong pe ciga ka nge atena ngidah kalak sombong.

5. Ise umat Jahwe si setia si jadi sombong?

5 Segat kel ate Jahwe kalak sombong. Janah ciga ateNa “mata si megombang.” (Kuan-kuanen 6:16, 17) Kalak si sombong la banci jadi teman Dibata. (Masmur 10:4) Sombong eme sifat Setan. (1 Timotius 3:6) Tapi si sedihna, piga-piga umat Jahwe dungna sombong. Contohna, Raja Ussia bas Juda nari. Ertahun-tahun dekahna setia ia man Jahwe. Tapi nina Pustaka, “Kenca Raja Ussia enggo megegeh, turah ukurna meganjang, janah e erbahanca ia ndabuh. Ilawanna [Jahwe].” Lawes ia ku rumah pertoton janah itutungna si merim-merim si labo tugasna. Selain si e, Raja Hiskia si setia pe pernah ka sombong.​—2 Kronika 26:16; 32:25, 26.

6. Engkai maka situhuna lit nge alasen Daud jadi sombong? Tapi ngkai ia meteruk rukur?

6 Piga-piga kalak jadi sombong perban merupa ia, terkenal, beluh ia main musik, megegeh, ntah pe melala si mujisa. Kerina si enda ndai lit i bas Daud, tapi tetap ia meteruk rukur. Contohna, kenca ibunuh Daud si Goliat, ikataken Saul man bana banci ia erjabu ras anakna. Tapi nina Daud, “Ise kin aku, janah kai kin keluargangku maka  banci aku jadi kela raja?” (1 Samuel 18:18) Engkai maka Daud banci meteruk rukur? Ietehna maka kerina sifat-sifat, kebeluhen, bage pe tugas-tugas si idatna perban Dibata meteruk rukur janah nggit nampati ia. (Masmur 113:5-8) Ieteh Daud maka kerina si lit i bas ia rehna bas Jahwe nari.​—Bandingken ras 1 Korinti 4:7.

Kalak pe banci rembak ku Dibata adi idahna umat Jahwe si meteruk rukur

7. Kai si perlu siinget gelah kita meteruk rukur?

7 Bagi Daud, umat Jahwe si gundari pe erusaha gelah meteruk rukur. Janah luar biasa kel siakap meteh maka Jahwe, Dibata si Meganjangna pe meteruk rukur. Sidalanken ateta pedah enda, “Pakekenlah paken ate perkuah, mehuli, rukur meteruk, lemah-lembut dingen saber.” (Kolose 3:12) Sieteh maka keleng ate “la meganjang ukur, la sombong.” (1 Korinti 13:4) Adi iidah kalak kita meteruk rukur, banci jadi ia pe nggit erlajar kerna Jahwe. Bali bagi sekalak perbulangen si la Saksi banci dungna ngelayani Jahwe perban mehuli perbahanen ndeharana si Saksi. Kalak pe banci rembak ku Dibata adi idahna umat Jahwe si meteruk rukur.​—1 Petrus 3:1.

PERBAHANENTA MAN KALAK SI DEBAN

8. (a) Uga iakap kalak kerna la patuh man orang tua gundari? (b) Kai nina Pustaka man anak-anak?

8 Ikataken Paulus uga perbahanen kalak man kalak si deban bas wari-wari pendungi. Itulisna maka anak-anak pagi la patuh man orang tua. Gundari, melala buku, film, bage pe acara TV si erban biasa siakap la patuh man orang tua. Tapi situhuna, anak si la patuh man orang tuana erpengaruh ku masyarakat. Nggo ndekah ieteh kalak kerna si enda. Contohna, mbarenda i Junani, dilaki si mekpek orang tuana, lanai lit hakna bas masyarakat. Bage pe bas hukum Roma, kalak si mekpek bapana seri hukumenna ras pemunuh. I bas Kitap-Kitap Heber ras Junani pe iperentahken gelah anak-anak patuh man orang tuana.​—Keluaren 20:12; Epesus 6:1-3.

9. Kai si erban anak-anak nggit patuh man orang tuana?

9 Uga carana gelah anak-anak patuh man orang tuana amin gia kalak si deban la bage? Adi iukuri anak e kerina si nggo ilakoken orang tuana bana, pasti ngata bujur kel ia janah nggit ia patuh man orang tuana. Perlu ka ieteh anak muda maka Dibata, Bapanta kerina, nuruh ia gelah patuh man orang tuana. Adi si mehuli ikataken anak muda kerna orang tuana, enda erban teman-temanna pe ngergai orang tuana ka. Memang, adi la lit kekelengen orang tua man anakna, reh serana iakap anak-anak patuh man bana. Tapi, adi igejapkenna maka tuhu-tuhu keleng ate orang tuana ia, enda erban ia patuh man orang tuana amin gia mesera akapna. Ikataken  sekalak turang senina si gelarna Austin, “Amin gia rusur ateku ngelawan, tapi ibereken orang tuaku peraturen si masuk akal, ijelaskenna ngkai maka iberekenna peraturen e, janah rusur kalak e ngerana-ngerana ras aku. Enda erban aku nggit patuh. Ermediate kel kalak e bangku, janah enda erban aku erusaha erban ia senang.”

10, 11. (a) Sifat kai saja si lit bas kalak si la ngkelengi kalak si deban? (b) Uga belinna kekelengen kalak Kristen situhu-tuhu man kalak si deban?

10 Ikataken Paulus ka sifat-sifat si deban si mbuktiken maka lanai lit keleng ate man kalak. Kenca ikatakenna kerna “la patuh man orang tua,” ikatakenna ka kerna la meteh ngata bujur. Enda masuk akal, perban kalak si la meteh ngata bujur la iergaina kai si nggo ilakoken kalak bana. Ikataken Paulus ka maka kalak pagi la setia. Kalak e la nggit arih-arih, enda ertina kalak e la nggit erdame ras kalak si deban. Tukang hina ia ras penghianat, kasar janah meser kata-kata si ibelaskenna man kalak si deban bage pe man Dibata. Janah kalak pe pagi tukang pitnah, ikatakenna si la tuhu gelah ceda gelar kalak. *—Nen keterangen tambahen.

11 Umat Jahwe keleng kel atena kalak si deban, beda ras nterem kalak i doni enda. Enda payo kel. Bas Hukum Musa perentah si pentingna eme ngkelengi Dibata, kenca e ngkelengi temanta manusia. (Matius 22:38, 39) Ikataken Jesus ka maka tanda kalak Kristen si tuhu-tuhu eme perban kalak e sikeleng-kelengen. (Baca Johanes 13:34, 35.) Janah musuh pe ikelengina.​—Matius 5:43, 44.

12. Ja nari sieteh maka keleng ate Jesus manusia?

12 Arah kegeluhen Jesus ibuktikenna maka keleng kel atena manusia. Lawes ia arah kuta ku kuta guna mberitaken berita si meriah kerna Kerajan Dibata man kerina kalak. Ipepalemna kalak si buta, lumpuh, sakit kusta, ras kalak si pasek. Ipegeluhna kalak si mate. (Lukas 7:22) Janah nggit Jesus mate guna nelamatken manusia amin pe melala kalak segat atena ia. Kekelengen Jesus seri kel ras kekelengen Bapana. I belang-belang doni, Saksi-Saksi Jahwe ngusih Jesus i bas ngkelengi temanna manusia.

13. Kai hasilna adi keleng ateta kalak si deban?

13 Adi keleng ateta kalak si deban, banci ia nggit erlajar kerna Jahwe. Contohna, lit sekalak dilaki i Thailand lawes ia ku kebaktin regional janah luar biasa kel akapna sanga idahna turang seninanta sikeleng-kelengen. Kenca mulih je nari, ipindona erlajar Pustaka dua kali seminggu. Kenca e erberita ia ku kerina keluargana. Enem bulan ngenca kenca si e, dat sekolah pembacan Pustaka ia i Bale Kerajan. Keleng nge ateta kalak si deban? Sungkuni bandu, ‘Erusaha nge aku nampati anggota keluargaku, turang senina i bas runggunku, bage pe kalak si kujumpai i bas aku erberita? Kukelengi nge kalak si deban bagi Jahwe?’

 SERIGALA RAS BIRI-BIRI

14, 15. Uga sifat-sifat kalak i bas wari pendungi enda? Tapi uga sifatna kenca nggo robah?

14 I bas wari pendungi enda, melala sifat kalak si la mehuli, emaka arus kita hati-hati gelah ula terpengaruh. Contohna, nterem kalak la atena ngena si mehuli. Segat atena kai si mehuli. Lit ka si la ikuasaina dirina, merampus. Lit si keras kepala. Labo iukurina lebe perbahanenna e janah la diatena kai akibatna man kalak si deban.

15 Enterem kalak, mbarenda sifatna bagi binatang si merawa, tapi gundari nggo berubah. Perubahen enda nggo itulis i bas Pustaka. (Baca Jesaya 11:6, 7.) Sibaca i je maka binatang si merawa, bagi serigala ras singa nggeluh pagi alu dame ras binatang si melemuk bagi biri-biri bage pe anak lembu. Engkai maka banci kalak e dame? Inubuatken bas Pustaka, “Doni enda dem alu pemeteh kerna [Jahwe].” (Jesaya 11:9) Binatang labo banci erlajar kerna Jahwe, nubuat enda maksudna manusia si nggo berubah sifat-sifatna.

Pustaka si Badia banci ngobah kegeluhen! (Nen paragraf 16)

16. Uga Pustaka nampati sekalak jelma berubah?

Labo gampang erban perubahen, tapi isampati kesah si badia kalak si atena erban Dibata senang

16 Enterem turang seninanta mbarenda merawa bagi serigala tapi gundari nggo lembut. Banci ibacandu pengalamen kalak e i bagin “Pustaka si Badia Ngobah Kegeluhen,” bas jw.org. Kalak si nggo erlajar ras ngelayani  Jahwe lanai bagi kalak si tempa-tempa isembahna Dibata tapi la idalankenna kai nina Dibata. Kalak si tempa-tempa isembahna Dibata, perbahanenna la seri ras kai si ipelajarina. Tapi, mbue umat Jahwe si mbarenda merampus, gundari ‘ipakena manusia si mbaru si itepa rikutken tempas Dibata, dingen icidahkenna bana i bas kegeluhen si tuhu-tuhu adil dingen badia.’ (Epesus 4:23, 24) Sanga sekalak jelma erlajar kerna Dibata, isadarina me maka perlu idalankenna kai si ipelajarina e. Dungna, kai si itekina, perukurenna, ras perbahanenna berubah. Labo gampang erban perubahen, tapi isampati kesah si badia kalak si atena erban Dibata senang.

“KALAK SI BAGENDA ULA DEHERI”

17. Uga carana gelah ula sempat kita tertular sifat kalak si la mehuli?

17 Gampang mbedakenca kalak si ngelayani Dibata ras lang. Arus kita hati-hati gelah ula kita tertular sifat si la mehuli arah kalak si la ngelayani Jahwe. Ateta siikutken min perentah Jahwe gelah ula deheri kalak si sifatna bagi si itulis bas 2 Timotius 3:2-5. Tapi arus denga kita erdahin, sekolah, ntah pe tading ras kalak si bage. Amin gia bage, ula sempat perukuren ras perbahanenta bagi kalak e. Uga carana? Ndeherlah kita ku Jahwe alu erlajar Pustaka janah erteman ras kalak si ngkelengi Ia.

18. Kai si banci silakoken gelah nggit kalak nandai Jahwe?

18 Sisampati ka ateta kalak erlajar kerna Jahwe. Daramilah cara gelah banci erberita, sipindo man Jahwe gelah tepat kata-katanta janah tepat ka waktuna kita ngerana. Itandai kalak min maka kita Saksi-Saksi Jahwe. Alu bage, perbahanenta banci erban Dibata ipuji, labo dirinta. Iajari Jahwe kita gelah “nadingken kegeluhen si la ngena ate Dibata ras sura-sura doni, gelah nggeluh kita ngkuasai dirinta, bujur dingen sisembah Dibata alu kegeluhenta i doni enda.” (Titus 2:11-14) Iperdiateken kalak kap kita adi siusih Jahwe janah silakoken kai si meriah akapNa. Banci jadi nina kalak, “Ikut ate kami ras kam, sabap enggo ibegi kami Dibata ras kam kap.”​—Sakaria 8:23.

^ par. 2 2 Timotius 3:1-5, 13 (NW), “Sebap manusia pagi ngkelengi dirina saja, mata duiten, tual, meganjang rukur, tukang hina, la patuh man orang tua, la meteh ngata bujur, la setia, la lit kekelengenna, la nggit arih-arih, tukang pitnah, la ikuasaina dirina, merampus, la atena ngena si mehuli, penghianat, keras kepala, sombong, lanai diatena Dibata tapi kesenangenna saja si idaramina, tempa-tempa isembahna Dibata tapi la idalankenna kai nina Dibata. Kalak si bagenda ula deheri. Tapi kalak jahat ras penipu reh dekahna reh jahatna, itipuna kalak janah ia pe kena tipu.”

^ par. 3 Maleaki 3:18 (NW), “Sekali nari iidahndu me kai lainna kalak bujur ras kalak jahat, kalak si nembah man bangKu ras kalak si lang.”

^ par. 10 Kata Junani man kata “tukang pitnah” ntah pe “lalap nalahken kalak” eme di·aʹbo·los. I bas Pustaka kata e ipake man Setan, si ipitnahna Dibata.